ឆ្នាំថ្មីកាន់តែខិតជិតមកហើយ ហើយវាជាពេលដែលអ្នកត្រូវតែកំណត់គោលដៅផ្នែកហិញ្ញវត្ថុសម្រាប់ឆ្នាំក្រោយ និងបង្កើតយុទ្ធសាស្ត្រច្បាស់លាស់ដើម្បីសម្រេចគោលដៅទាំងនោះ ។
វិធីមួយដែលងាយជាងគេក្នុងការធ្វើដូចនេះគឺការរៀនសូត្រពីអ្នកដទៃដែលបានសម្រេចគោលដៅស្រដៀងគ្នារួចមក ។ ដើម្បីជួយដល់អ្នកក្នុងការគិតរកគោលដៅ និងយុទ្ធសាស្ត្រ ខាងក្រោមនេះគឺជាដំបូន្មានរបស់សេដ្ឋី និងទីប្រឹក្សាផ្នែកលុយមួយចំនួនដែលអាចជួយឲ្យអ្នករកលុយបានកាន់តែច្រើនក្នុងឆ្នាំ ២០២០ខាងមុខនេះ៖
១. វិនិយោគលើខ្លួនឯង៖
អ្នកស្រី បាបារ៉ា ខូខូរ៉ាន (Barbara Corcoran) ដែលជាស្ថាបនិកក្រុមហ៊ុន The Corcoran Group និងជាវិនិយោគិនដ៏គួរឲ្យគោរពលើកម្មវិធី Shark Tank បានប្រាប់មកថា គោលដៅជារៀងរាល់ឆ្នាំរបស់អ្នកស្រីគឺវិនិយោគលើខ្លួនឯង ។ ពេលដែលអ្នកស្រីទទួលបានប្រាក់កម្រៃដំបូង អ្នកស្រីបានយកវាទៅទិញអាវក្រៅមួយតម្លៃ ៣៤០ដុល្លារ ។ អ្នកស្រីមិនបានស្តាយក្រោយទេព្រោះអាវក្រៅនោះបានធ្វើឲ្យអ្នកស្រីមានអារម្មណ៍ថាដូចជាស្តេចអចលនទ្រព្យ និងធ្វើឲ្យមនុស្សជុំវិញអ្នកស្រីគិតដូច្នេះដែរ ។
២. ត្រៀមខ្លួនសម្រាប់ហានិភ័យធំទាំងបួន៖
អ្នកស្រី ហ្គែល ខូដ័រ ហ្វីសឺ (Gail Corder Fischer) ដែលជាសហស្ថាបនិក និងអគ្គនាយករងរបស់ក្រុមហ៊ុន Fischer & Company បានប្រាប់មកថា ដើម្បីការពារទ្រព្យសម្បត្តិរបស់អ្នក អ្នកត្រូវតែឆ្លាតវៃ និងត្រៀមខ្លួនសម្រាប់ការគម្រាមកំហែងធំៗទាំងបួននោះគឺ បំណុល មរណភាព ការលែងលះគ្នា និងការសម្រេចចិត្តមិនល្អ ។
ដោយហេតុដូចនេះ អ្នកត្រូវតែចេះទុកលុយសម្រាប់ពេលមានអាសន្ន និងលុយសម្រាប់ការវិនិយោគនៅថ្ងៃអនាគត ពង្រីកអាជីវកម្ម និងសម្រាប់ស្ថានការដែលមិនអាចមើលឃើញដទៃ ។
៣. ឲ្យលុយធ្វើការឲ្យអ្នក៖
ស្ថាបនិកក្រុមហ៊ុន Cardone Capital គឺលោក ហ្គ្រាន់ ខាដូន (Grant Cardone) បានចែករំលែមកថា អ្នកមិនគួរទុកលុយចោលមិនធ្វើអ្វីទេ តែអ្នកគួរតែយកវាទៅវិនិយោគដើម្បីបង្កើនប្រភពចំណូល ។ ហើយវាមិនមែនមានន័យថាអ្នកត្រូវតែវិនិយោគលើអចលនទ្រព្យតែមួយទេ ។ ផ្ទុយមកវិញ អ្នកគួរចាត់ទុកឆ្នាំ ២០២០ ជាឆ្នាំដែលអ្នកវិនិយោគលើខ្លួនឯងដោយរៀនជំនាញថ្មី ឬពង្រឹងជំនាញដែលខ្លួនមានដើម្បីបង្កើនប្រសិទ្ធិភាពការងារ ៕ កែសម្រួលដោយ ៖ សុឃាក់
ចែករំលែកព័តមាននេះ