ខណៈដែលទីផ្សារសម្រាប់ការនាំចេញរបស់កម្ពុជាអាចនឹងប្រឈមមុខការលំបាក បើសិនជាកម្ពុជាបាត់បង់សិទ្ធិ រួចពន្ធនៅក្នុងគម្រោងអ្វីៗទាំងអស់លើកលែងតែអាវុធ ( EBA) នោះ ប្រទេសកម្ពុជាបានសម្លឹងឃើញទីផ្សារយក្សនៅអាស៊ី ដើម្បីថែរក្សាកំណើនសេដ្ឋកិច្ចរបស់ខ្លួន ។ ការជំរុញអំពីការពង្រីកទីផ្សារនៅអាស៊ីត្រូវបានធ្វើឡើងនៅក្នុងសន្និបាតបូកសរុបការងាររបស់ក្រសួងពាណិជ្ជកម្មកាលពីសប្តាហ៍កន្លងទៅ។
លោកឧបនាយករដ្ឋមន្ត្រី អូន ព័ន្ធមុន្នីរ័ត្ន ក្នុងនាមជាតំណាងរបស់សម្តេចតេជោបានប្រាប់ដល់មន្ត្រីក្រសួងពាណិជ្ជកម្មឲ្យខិតខំជំរុញការធ្វើសេរីភាវូបនីយកម្ម និងសមាហរណកម្មក្នុងតំបន់ និងពិភពលោក តាមរយៈការបន្តកិច្ចសហការជាមួយក្រសួង-ស្ថាប័នពាក់ព័ន្ធ ដើម្បីពន្លឿនការចុះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) នៅក្នុងឆ្នាំ២០២០ និងខិតខំចរចាកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា-ចិន និងកម្ពុជា-សាធារណរដ្ឋកូរ៉េ ដើម្បីជំរុញការធ្វើពិពិធកម្មទីផ្សារនាំចេញរបស់កម្ពុជា សំដៅគាំទ្រការអភិវឌ្ឍកំណើនសេដ្ឋកិច្ច ដែលជាគោលដៅនៃយុទ្ធសាស្ត្រចតុកោណដំណាក់កាលទី៤ ។
កម្ពុជាបានងាកមកយកចិត្តទុកដាក់ខ្លាំងចំពោះទីផ្សារនាំចេញនៅងាស៊ី នៅពេលដែលកម្ពុជាប្រឈមនឹងលទ្ធភាពអាចបាតប់បង់សិទ្ធិ រួចពន្ធសម្រាប់ការនាំចេញទំនិញពិសេសសម្លៀកបំពាក់និងស្បែកជើងទៅកាន់ទីផ្សារអឺរ៉ុប បើសិនជានៅខែកុម្ភៈ ខែមុខនេះសហភាពអឺរ៉ុបសម្រេចចិត្តព្យួរគម្រោង EBA ពីប្រទេសកម្ពុជាដោយសារតែអ្វីដែលគេហៅថា ដំណើរថយក្រោយនៃលទ្ធិប្រជាធិបតេយ្យ ។
ប្រទេសចិនបច្ចុប្បន្នកំពុងតែក្លាយទៅជាប្រទេសសំខាន់បំផុតសម្រាប់ដង្ហើមសេដ្ឋកិច្ចកម្ពុជាទាំងលើទិដ្ឋភាពជំនួយ ការវិនិយោគ និងការធ្វើពាណិជ្ជកម្ម ។ កាលពីឆ្នាំ២០១៨ ពាណិជ្ជកម្មរវាងកម្ពុជានិងចិនមានទំហំជាទឹកប្រាក់ ៧៤០០ លានដុល្លារដោយក្នុងនោះកម្ពុជានាំចេញទៅប្រទេសចិនមានទំហំទឹកប្រាក់ ១៣៧៧ លានដុល្លារ ។
ចំណែកពាណិជ្ជកម្មរវាងកម្ពុជា និងកូរ៉េខាងត្បូងវិញមានទំហំតូចនៅឡើយ បើទោះបីជាវាមានកំណើនក្តី ។ ពាណិជ្ជកម្មរវាងកម្ពុជា និងកូរ៉េខាងត្បូងមានទំហំជាទឹកប្រាក់ប្រមាណតែប្រហែល១០០០លានដុល្លារប៉ុណ្ណោះនៅក្នុងមួយឆ្នាំ ។ តើប្រទេសអាស៊ីដូចជា ចិន កូរ៉េខាងត្បូង និងជប៉ុនអាចនឹងមានលទ្ធភាពជំនួសទីផ្សារ ផលិតផលរបស់កម្ពុជានៅអឺរ៉ុប ឬយ៉ាងណានោះគ្មាននរណាអាចទាន់ទស្សន៍ទាយបានឡើយ ៕
ចែករំលែកព័តមាននេះ