រាជធានីភ្នំពេញ ៖ ក្នុងចំណោមមេដាយទាំង៤៦គ្រឿងដែលកម្ពុជាទទួលបានពីព្រឹត្តិការណ៍កីឡាស៊ីហ្គេមលើកទី៣០នៅហ្វ៊ីលីពីនមានមេដាយចំនួន២ដណ្ដើមបានដោយកីឡាការិនីវ័យក្មេងកូនកាត់អាមេរិក២រូប។
អ្នកទាំងពីរកំពុងជួយលើកតម្កើងវិស័យកីឡាកម្ពុជា ដែលកន្លងមកធ្លាប់តែទទួលការមាក់ងាយពីប្រទេសជាដៃគូនោះផង ។ ជោគជ័យ របស់កីឡាការិនីកូនកាត់អាមេរិកទាំងពីរមិនត្រឹមតែពលរដ្ឋខ្មែរទូទាំងប្រទេសកោតសរសើរ នោះទេសូម្បីតែតំណាងជាន់ខ្ពស់របស់ស្ថានទូតអាមេរិក ក៏សរសើរថាអ្នកទាំងពីរ គឺជាអ្នកជំនាន់ក្រោយ ដែលបានធំធាត់នៅអាមេរិក តែបានមករួមចំណែកអភិវឌ្ឍន៍មុខមាត់កម្ពុជា តាមរយៈវិស័យកីឡាផងដែរ។
កីឡាការិនីប្រភេទជឺជិតស៊ូ កញ្ញា ខាន់ ចេ សា (Khan Jessa) គឺជាអ្នកជួយឱ្យកម្ពុជា ទទួលបានមេដាយមាសលើវិញ្ញាសានេះ ខណៈដែលកីឡាការិនីប្រភេទតេក្វាន់ដូ កញ្ញា ថិប កាសាន់ទ្រេ នីកូល (Tubbs Casandre Nicole) ទទួលបានមេដាយប្រាក់ពីព្រឹត្តិការណ៍ស៊ីហ្គេមមុននេះក្ដៅៗ ។ យោងតាមបញ្ជាក់ កញ្ញា ខាន់់ ចេ សា ដែលមានអាយុ១៨ឆ្នាំ គឺជាកីឡាការិនីជឺជិតស៊ូ ដែលបានកើត និងធំធាត់នៅរដ្ឋកាលីហ្វ័រនីញ៉ា សហរដ្ឋអាមេរិក ដោយសារតែនាងមានឪពុកជាជនជាតិខ្មែរ និងមានម្តាយជាជនជាតិម៉ិកស៊ិកកាត់អាមេរិក ។
នាងជាជនជាតិអាមេរិកដែលមានឈាមជ័របីសាសន៍ តែក្រោយពេលធំធាត់បែរជាចិញ្ចឹមចិត្តមកជួយកម្ពុជាតាមរយៈការវិវឌ្ឍខ្លួនក្លាយជាកីឡាការិនីជឺជិតស៊ូ ហើយបានបម្រើការងារជាកីឡាការិនីជម្រើសជាតិតំណាងឱ្យប្រទេសកម្ពុជា ។ នាងបានសាងស្នាដៃជូនកម្ពុជា ដោយទទួលបាន មេដាយមាសពីព្រឹត្តិការណ៍កីឡាអាស៊ី(Asian Games) នៅឥណ្ឌូណេស៊ី កាលពីឆ្នាំ២០១៨ រួចមកហើយដែរ។
កីឡាការិនីជឺជិតស៊ូ ដែលមានឈ្មោះហៅក្រៅថា Khan Jessa រូបនេះ ទទួលបានមេដាយមាសថ្មីមួយទៀតពីព្រឹត្តិការណ៍ស៊ីហ្គេមក្ដៅៗ ។ ជ័យជម្នះនាព្រឹត្តិការណ៍កីឡាស៊ីហ្គេមដែលទើបបញ្ចប់ ខាន់ ចេ សា បានយកឈ្នះ កីឡាការិនីវៀតណាម Duong Thi Thanh Minh នៅវគ្គ១/៤ក្នុងលទ្ធផល ១០០-០ ហើយ បន្តយកឈ្នះកីឡាការិនីសិង្ហបុរី Teh May Yong ១០០-០ ដូចគ្នា នៅវគ្គពាក់កណ្តាល ផ្តាច់ព្រ័ត្រ ។
នៅវគ្គផ្តាច់ព្រ័ត្រនាងបាន យកឈ្នះកីឡាការិនី ម្ចាស់ផ្ទះហ្វ៊ីលីពីន Napolis Jenna Kaila ជាមួយនឹងលទ្ធផលមានប្រៀប ជាង (Wins by Advantages) បើទោះបីពិន្ទុនៅក្នុងពេលប្រកួតគឺស្មើគ្នា២-២ក្ដី ។ នាងត្រូវបានគេចាត់ទុកជាគ្រាប់ពេជ្រថ្មីដែលកាន់តែមានពន្លឺជួយឱ្យកម្ពុជាមានការទទួលស្គាល់ បន្ទាប់ពីនាងក្លាយជាម្ចាស់មេដាយមាសជឺជិតស៊ូ(Jiu-jitsu)
ទម្ងន់ក្រោម៤៩គីឡូក្រាមនៅស៊ីហ្គេម ។ នាងកាន់ តែទទួលបានការសរសើរនៅពេលមហាជនដឹងថានាងគឺជាជនជាតិអាមេរិកពាក់កណ្ដាល ដែលមានន័យថា ទោះជារស់នៅសោយសុខក្នុងប្រទេសមហាអំណាច តែនាងនៅតែក្រាញននៀលមកជួយកម្ពុជាឱ្យមានមុខមាត់លើឆាកអន្តរជាតិ។
ចំណែកកីឡាការិនីតេក្វាន់ដូ Tubbs Casandre Nicole ដែលមានឈ្មោះខ្លីថាCassie Tubbs ឯណោះវិញ ក៏ទទួលបានការសរសើរមិនខុសគ្នាដែរ បន្ទាប់ពីទទួលបានមេដាយលើកទីពីរក្នុងព្រឹត្តិកឹត្តិការណ៍កីឡាស៊ីហ្គេម ដោយកាលពី ឆ្នាំ២០១៧ កីឡាការិនីដែលរស់នៅអាមេរិកជាមួយម្តាយជាជនជាតិខ្មែរ និងឪពុកជនជាតិ អាមេរិក រូបនេះ ធ្លាប់បានមេដាយសំរឹទ្ធរួច ម្តងហើយ ។ ក្នុងការប្រកួតទម្ងន់ក្រោម៦២គីឡូក្រាម នាព្រឹត្តិការណ៍កីឡាស៊ីហ្គេមនៅហ្វ៊ីលីពីន កីឡាការិនីរូបនេះបានយកឈ្នះកីឡាការិនី ឥណ្ឌូណេស៊ី Yusuf Shaleha ដោយពិន្ទុ១៧-១០ តែបានចាញ់កីឡាការិនីវៀតណាម Pham Thi Thu Hien ក្នុងពិន្ទុទាំងប្រផិតប្រផើយ១១-៩ នៅវគ្គផ្តាច់ព្រ័ត្រ ហើយទទួលបានមេដាយប្រាក់ ។
មកទល់ពេលនេះ កីឡាការិនី កូនកាត់អាមេរិក ទាំងពីរទទួលការចាប់អារម្មណ៍យ៉ាងខ្លាំងពី សំណាក់មហាជនទាំងក្នុងនិងក្រៅប្រទេសតាមរយៈស្នាដៃដែលនាងដណ្ដើមបាន ។ អ្វីដែលកាន់តែសរសើរគឺពួកនាងទាំង២ប្រកាសថា នឹងនៅតែបន្តជួយកម្ពុជាឱ្យតែកម្ពុជាត្រូវការ បើទោះជានាងមានឱកាសរស់នៅយ៉ាងសុខស្រួលលើទឹកដីអាមេរិកក្ដីក៏មិនភ្លេចជាតិសាសន៍ខ្មែរដែរ៕ (កែសម្រួលដោយ៖ បុប្ផា)
ចែករំលែកព័តមាននេះ