ADផ្ទាំងផ្សព្វផ្សាយពាណិជ្ជកម្ម

ប្រធានសហព័ន្ធកីឡាហែលទឹកបំផុសយុវជនឱ្យហ្វឹកហាត់កីឡាត្រៀមប្រកួតសុីហ្គេម

4 ឆ្នាំ មុន

កំពង់ចាម
២៥ ខែ ធ្នូ ឆ្នាំ ២០១៩ ម៉ោង ០៩:០៨

ខេត្តកំពង់ចាម ៖ លោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូននិងជាប្រធានសហព័ន្ធកីឡាហែលទឹកកម្ពុជាមានប្រសាសន៍ក្រើនរំលឹកនិងដាស់តឿនដល់ក្មួយៗ ជាយុវជនសូមចូលរួមហ្វឹកហាត់កីឡាហែលទឹកឲ្យបានផុសផុលនិងស្ទាត់ជំនាញសម្រាប់ត្រៀមប្រកួតស៊ីហ្គេមនៅក្នុងឆ្នាំ២០២៣ខាងមុខជាពេលដែលកម្ពុជាធ្វើជាម្ចាស់ផ្ទះ ។ លោករដ្ឋមន្ត្រីថ្លែងបែបនេះនៅក្នុងឱកាសបិទការប្រកួតកីឡា ហែលទឹកជ្រើសរើសជើងឯកថ្នាក់ជាតិពានរង្វាន់តេជោសែនលើកទី៥…

លោករដ្ឋមន្ត្រីថ្លែងបែបនេះនៅក្នុងឱកាសបិទការប្រកួតកីឡា ហែលទឹកជ្រើសរើសជើងឯកថ្នាក់ជាតិពានរង្វាន់តេជោសែនលើកទី៥ ឆ្នាំ២០១៩ នៅ មណ្ឌលកីឡាហែលទឹកតេជោសែន ខេត្តកំពង់ ចាម កាលពីល្ងាចថ្ងៃទី២៣ ធ្នូ ២០១៩។

លោករដ្ឋមន្ត្រីក្រសួងសាធារណៈការនិងដឹក ជញ្ជូនស៊ុន ចាន់ថុល បានលើកឡើងបន្តថា នៅក្នុងឆ្នាំ២០២៣ ខាងមុខនេះ ប្រទេសកម្ពុជាយើងនឹងធ្វើជាម្ចាស់ផ្ទះនៃការប្រកួតកីឡាស៊ីហ្គេម ដូច្នេះសូមឲ្យក្មួយៗចូលរួមហ្វឹកហាត់កីឡា ហែលទឹក និងកីឡាផ្សេងទៀតធ្វើយ៉ាងណាឲ្យបានផុលផុសនិងមានសមត្ថភាពខ្ពស់ដើម្បីត្រៀមប្រកួតយកជ័យជម្នះជូនជាតិ ។

លោករដ្ឋមន្ត្រីក៏បានរំលឹកផងដែរថា នៅក្នុងសម័យសង្គមរាស្ត្រនិយម កីឡាករកីឡាការិនីនៅក្នុងខេត្តកំពង់ចាមបានទៅចូលរួមប្រកួតនៅបរទេសដោយដណ្ដើមបានមេដាយជាច្រើនមកជូនជាតិជាពិសេសគឺកីឡាហែលទឹកនៅខេត្តកំពង់ចាមនេះតែម្ដង ។ ដើម្បីលើកកម្ពស់វិស័យកីឡាឱ្យមានការរីកចម្រើនរាជរដ្ឋាភិបាលបានបង្កើតអាងហែលទឹកនៅតាមបណ្ដាខេត្តមួយចំនួន ដើម្បីពង្រឹងសមត្ថភាពដល់កីឡាករកីឡាការិនីឲ្យកាន់តែមានច្រើនឡើងប្រកបដោយគុណភាព។

លោក យី វាសនា អគ្គលេខាធិការគណៈ កម្មាធិការជាតិប៉ារា៉ឡាំពិកកម្ពុជាដែលមានវត្តមាននៅពេលនោះដែរ បានសំណូមពរដល់ក្រុមកីឡាករ-កីឡាការិនីហែលទឹកដែលមកចូលរួមការប្រកួតនាពេលនេះ សូមហ្វឹកហាត់បំប៉នសមត្ថភាពឲ្យកាន់តែប្រសើរឡើងថែមទៀត។លោកបន្តថា តាមការសង្កេតដោយផ្ទាល់ប្អូនៗ កីឡាករកីឡាការិនីដែលធ្លាប់បានប្រកួតនាពេលកន្លងមកនិងការប្រកួតនាពេលនេះឃើញថាសមត្ថភាពកាន់តែល្អប្រសើរជាងលើកមុន។

ដោយមើលឃើញពីសមត្ថភាពបែបនេះរូបលោករំពឹងថាក្នុងពេលទៅចូលរួមប្រកួតស៊ីហ្គេមខាងមុខនៅប្រទេសគេនឹងដណ្ដើមបានមេដាយយកមកជូនជាតិមិនខាន។

សូមបញ្ជាក់ថា ក្លិបកីឡាដែលបានចូលរួមប្រកួតចាប់តាំងពីថ្ងៃទី២០ដល់២៣ ធ្នូ នេះមានចំនួន៨ក្រុមជាលទ្ធផល ចំណាត់ថ្នាក់លេខ១ បានទៅលើក្លិបហែលទឹកក្រសួងសាធារណការនិងដឹកជញ្ជូន ។ លេខ២បានទៅលើក្លិបហែលទឹកក្រសួងមហាផ្ទៃ, លេខ៣បានទៅលើក្លិបហែលទឹកក្រសួងសេដ្ឋកិច្ចនិងហិរញ្ញវត្ថុ, លេខ៤បានទៅលើក្លិបហែលទឹកនាគរាជកំពង់ចាម, លេខ៥ បានទៅលើក្លិបហែលទឹកក្រសួងព័ត៌មាន, លេខ៦បានទៅលើក្លិបហែលទឹកត្បូងឃ្មុំ, លេខ៧បានទៅលើក្លិបហែលទឹកប្លីដូហ្វីន ស្វីមមីង និងលេខ៨បានទៅលើក្លិបប៉ារ៉ាឡាំពិកកម្ពុជា៕ (កែសម្រួលដោយ ៖ បុប្ផា)