ខេត្តកណ្តាល ៖ នៅល្ងាចថ្ងៃទី២៣ ខែធ្នូ ឆ្នាំ២០១៩ លោក ជួន វណ្ណះ ចៅក្រមស៊ើបសួរសាលាដំបូងខេត្តកណ្តាលបានសម្រេចចេញដីការឃុំខ្លួនក្រុមចោរក្មេងៗដែលតែងតែធ្វើសកម្មភាពដេញស្ទាក់វៃយកម៉ូតូតាមផ្លូវដាក់ពន្ធនាគារបណ្តោះអាសន្នពីបទ«លួចមានទម្ងន់ទោសដោយសារការប្រព្រឹត្តហិង្សា» តាមមាត្រា៣៥៣…
ខេត្តកណ្តាល ៖ នៅល្ងាចថ្ងៃទី២៣ ខែធ្នូ ឆ្នាំ២០១៩ លោក ជួន វណ្ណះ ចៅក្រមស៊ើបសួរសាលាដំបូងខេត្តកណ្តាលបានសម្រេចចេញដីការឃុំខ្លួនក្រុមចោរក្មេងៗដែលតែងតែធ្វើសកម្មភាពដេញស្ទាក់វៃយកម៉ូតូតាមផ្លូវដាក់ពន្ធនាគារបណ្តោះអាសន្នពីបទ«លួចមានទម្ងន់ទោសដោយសារការប្រព្រឹត្តហិង្សា» តាមមាត្រា៣៥៣ មាត្រ៣៥៧ នៃក្រមព្រហ្មទណ្ឌ ប្រព្រឹត្តនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល កាលពីថ្ងៃទី២២ ខែធ្នូ ឆ្នាំ២០១៩ វេលាម៉ោង២និង៥០នាទី ។
ជនត្រូវចោទចំនួន៧នាក់ ទី១-ឈ្មោះចែម ពិចាក់ ភេទប្រុស អាយុ១៨ឆ្នាំ ជនជាតិខ្មែរ មុខរបរនិស្សិតច្បាប់ឆ្នាំទី១ នៅភូមិបឹងធំទី១ សង្កាត់បឹងធំ ខណ្ឌកំបូល, ទី២ឈ្មោះ ស្រស់ សុខនាង ភេទប្រុស អាយុ១៦ឆ្នាំ ជនជាតិខ្មែរ សិស្សថ្នាក់ទី១១ នៅភូមិត្រពាំងត្រប់ សង្កាត់បឹងធំ ខណ្ឌកំបូល, ទី៣-ឈ្មោះ អឿន រតនា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតនៅភូមិបឹងធំទី២ សង្កាត់បឹងធំ ខណ្ឌកំបូល, ទី៤-ឈ្មោះ ហោ សូរិយា ភេទប្រុស អាយុ១៦ឆ្នាំ ជនជាតិខ្មែរ មុខរបរកសិករ នៅភូមិបឹងធំទី១សង្កាត់បឹងធំ ខណ្ឌកំបូល, ទី៥-ឈ្មោះ រស់ សំអូន ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិត នៅភូមិបឹងធំទី១ សង្កាត់បឹងធំ ខណ្ឌកំបូល, ទី៦-ឈ្មោះ ជី ភីរ៉ា ភេទប្រុស អាយុ១៦ឆ្នាំ កម្មកររោងចក្រ នៅភូមិបឹងធំទី១ សង្កាត់បឹងធំ ខណ្ឌកំបូល និងទី៧-ឈ្មោះ តាល់ ច័ន្ទបញ្ញា ភេទប្រុស អាយុ២០ឆ្នាំ មុខរបរមិនពិត នៅភូមិបឹងធំទី១សង្កាត់បឹងធំ ខណ្ឌកំបូល ។
ជនរងគ្រោះទី១-ឈ្មោះ រុំ ឆារ៉ាត់ ភេទប្រុស អាយុ១៦ឆ្នាំ ជនជាតិខ្មែរ មុខរបរសិស្ស នៅភូមិត្រពាំងនប់ ឃុំក្រាំងម្កាក់ ស្រុកអង្គស្នួល ខេត្តកណ្តាល, ទី២-ឈ្មោះ ញួន ពន្លឺ ហៅរ៉ូត ភេទប្រុស អាយុ២០ឆ្នាំ ជនជាតិខ្មែរ មុខរបរជាងជួសជុលម៉ាស៊ីនត្រជាក់នៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល និងទី៣-ឈ្មោះ ភ័ក្រ ពិទិ ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្សថ្នាក់ទី១១ នៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល ។
នគរបាលស្រុកអង្គស្នួលបានឱ្យដឹងថា នៅមុនពេលកើតហេតុជនរងគ្រោះបានទៅរាំកម្សាន្តនៅក្លិមម្តុំផ្សារដីហ៊ុយ ហើយបានជួបនឹងជនសង្ស័យនៅក្នុងក្លិបរាំនោះដែរ ដល់ម៉ោងជាងមួយរំលងអធ្រាត្រជនរងគ្រោះចេញមកផ្ទះវិញឃើញជនសង្ស័យនៅក្នុងក្លិបនៅឡើយ ។ លុះខ្លួនមកដល់ក្លោងទ្វារវត្តកោះអណ្តែតស្រាប់ឃើញជនសង្ស័យមានគ្នាប្រហែល១០នាក់ជិះម៉ូតូចេញតាមពីក្រោយមានកាំបិតមានបំពង់ទីប ខ្លួនជិះរត់ដល់ចំណុចកើតហេតុ ខ្លួនដកយកសោម៉ូតូរត់គេចទើបជនសង្ស័យខឹងយកម៉ូតូមិនបានទើបកាប់ និងវាយម៉ូតូរួចជិះគេចទៅបាត់តែម្តង ។
តាមចម្លើយសារភាពរបស់ឈ្មោះ តាល់ ច័ន្ទបញ្ញា បានសារភាពថា ខ្លួនជាអ្នកកាន់ដែកបំពង់ទីបវាយ ឯឈ្មោះ បាន មករា ហៅប៊ែ ជាអ្នកកាន់កាំបិតកាប់យកផ្លាកលេខម៉ូតូទៅបាត់ហើយគេចខ្លួន ៕
កែសម្រួលដោយ ៖ សំណាង
ចែករំលែកព័តមាននេះ