រាជធានីភ្នំពេញ ៖ យុវជនជាជនសង្ស័យចំនួន១១នាក់ចូលផឹកស៊ីនៅក្នុងក្លិបកម្សាន្តឌីស្កូមួយកន្លែងនៅម្ដុំផ្សារដីហុយ ហើយបានឃើញយុវជន៣នាក់ទៀតចូលទៅផឹកស៊ីរាំរែកនៅក្នុងក្លិបនោះដែរ។ លុះពេលជនរងគ្រោះជិះម៉ូតូចេញពីក្លិបត្រឡប់ទៅផ្ទះវិញ ស្រាប់តែក្រុមជនសង្ស័យបានជិះម៉ូតូដេញតាមកាប់និងវាយប្លន់តាំងពីផ្សារដីហុយរហូតដល់ភូមិសាស្ត្រស្រុកអង្គស្នួលទើបទាន់។ ប៉ុន្តែសកម្មភាពនេះមិនបានសម្រេចឡើយ ដោយក្រុមជនរងគ្រោះផ្ដួលម៉ូតូនិងដកកូនសោររត់ចេញ ហើយក្រុមជនសង្ស័យខឹងបានវាយនិងកាប់បំផ្លាញម៉ូតូ បន្ទាប់មកកម្លាំងនគរបាលស្រុកអង្គស្នួលអន្តរាគមន៍ចាប់បាន៧នាក់ ចំណែក៤នាក់ទៀតរត់គេចបាត់ស្រមោល។
ហេតុការណ៍ខាងលើនេះបានកើតឡើងកាលពីម៉ោង២និង៥០នាទីយប់រំលងអាធ្រាត្រឈានចូលថ្ងៃទី២២ ខែធ្នូ ឆ្នាំ២០១៩ នៅក្នុងភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល ។
នគរបាលបានឲ្យដឹងថា យុវជនជាជនសង្ស័យទាំង៧នាក់ខាងលើរួមមាន ១-ឈ្មោះចែម ពិចាក់ អាយុ១៨ឆ្នាំ ជានិស្សិតច្បាប់ឆ្នាំទីមួយ, ២-ឈ្មោះស្រស់ សុខនាង អាយុ១៦ឆ្នាំ សិស្សថ្នាក់ទី១១។ ៣-ឈ្មោះអឿន រតនា អាយុ១៧ឆ្នាំ មុខរបរមិនពិត ៤-ឈ្មោះហោ សូរិយា អាយុ១៦ឆ្នាំ ជាកសិករ ៥-ឈ្មោះរស់ សំអូន អាយុ១៧ឆ្នាំ មុខរបរមិនពិត ៦-ឈ្មោះជី ភីរ៉ា អាយុ១៦ឆ្នាំ ជាកម្មកររោងចក្រ ៧-ឈ្មោះតាល់ ច័ន្ទបញ្ញា អាយុ២០ឆ្នាំ មុខរបរមិនពិត។ ចំណែកបក្ខពួកចំនួន៤នាក់ទៀតដែលរត់គេចខ្លួនបាត់រួមមាន ១-ឈ្មោះលី សុខលីម អាយុ១៦ឆ្នាំ ជាកម្មកររោងចក្រ ២-ឈ្មោះជា ផលឡី អាយុ១៦ឆ្នាំ ជារោងចក្រ ៣-ឈ្មោះបាន មករា ហៅប៊ែ អាយុ១៨ឆ្នាំ ជាកម្មកររោងចក្រ និង៤-ឈ្មោះអ៊ុយ សំអឿន អាយុ១៩ឆ្នាំ មុខមិនពិត ។ ជនសង្ស័យទាំង១១នាក់នេះរស់នៅភូមិបឹងធំទី១សង្កាត់បឹងធំ ខណ្ឌកំបូលរាជធានីភ្នំពេញ។
តាមប្រភពខាងលើបានបន្តឲ្យដឹងទៀតថា ដោយឡែកយុវជនរងគ្រោះមានគ្នាចំនួន៣នាក់រួមមាន ១-ឈ្មោះរុំ ឆារ៉ាត់ អាយុ១៦ឆ្នាំ ជាសិស្ស នៅភូមិត្រពាំងនប់ ឃុំក្រាំងម្កាក់ ស្រុកអង្គស្នួល ខេត្តកណ្តាល ២-ឈ្មោះញួន ពន្លឺហៅរ៉ូត អាយុ២០ធ្នាំ ជាជាងជួសជុលម៉ាស៊ីនត្រជាក់ ៣-ឈ្មោះភ័ក្រ ពិទិ អាយុ១៧ឆ្នាំ ជាសិស្សថ្នាក់ទី១១ ។ ជនរងគ្រោះទាំង៣នាក់នោះមានទីលំនៅក្នុងភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល។
ក្រោយពេលចាប់ខ្លួនជនសង្ស័យខាងលើ នគរបាលដកហូតបានម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០២០ ពណ៌ខ្មៅ, ម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១HR-៧២៧២, ដែកទីប១កំណាត់ ប្រវែង១ម៉ែត្រ(ជារបស់ជនសង្ស័យ) ។ ចំណែកម៉ូតូរបស់ជនរងគ្រោះ៣គ្រឿងទៀតរួមមានម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៩ ពណ៌ខ្មៅ១ ពាក់ផ្លាកលេខ កណ្តាល ១AF-២៩៧០, ម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៧ ពណ៌ទឹកមាស ពាក់ផ្លាកលេខ ភ្នំពេញ ១GT-២៦៤៦ និងម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៧ ពណ៍ខ្មៅ ពាក់ស្លាកលេខ ភ្នំពេញ ១GP-៤៤១៨ ។
នគរបាលខាងលើបានបញ្ជាក់បន្ថែមទៀតថា នៅមុនពេលកើតហេតុ ក្រុមជនរងគ្រោះបានទៅរាំលេងនៅក្លិបកំសាន្តមួយកន្លែងម្តុំផ្សារដីហ៊ុយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងបានជួបជាមួយក្រុមជនសង្ស័យនៅក្នុងក្លឹបរាំនោះដែរ ប៉ុន្តែមិនបានចាប់អារម្មណ៍ថា ក្រុមជននោះគឺជាចោរឡើយ ។
តាមប្រភពដដែលបានបន្តថា លុះផឹកស៊ីរាំលេងរហូតដល់វេលាម៉ោងជាង១យប់រំលងអធ្រាត្រ ក្រុមជនរងគ្រោះបានជិះម៉ូតូចេញត្រឡប់ទៅផ្ទះវិញ ហើយបានឃើញសង្ស័យនៅក្នុងក្លិបនៅឡើយ ។ លុះពេលចេញផុត ស្រាប់តែក្រុមជនសង្ស័យបានដេញតាមរហូតដល់ដល់ចំណុចកើតហេតុ ជនរងគ្រោះក៏បានផ្ដួលម៉ូតូ និងដកសោររត់គេចខ្លួន ជាហេតុធ្វើឲ្យជនសង្ស័យយកម៉ូតូមិនបានក៏កាប់និងវាយបំផ្លាញម៉ូតូ រួចនាំគ្នាជិះម៉ូតូគេចទៅបាត់តែម្តង។
ក្រោយមក នគរបាលបានធ្វើការស្រាវជ្រាវទើបឈានដល់ការចាប់ខ្លួនជនសង្ស័យចំនួន៧នាក់ ចំណែកបក្ខពួក៤នាក់ទៀតកំពុងរត់គេចខ្លួននៅឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ