រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីហ៊ុនសែនបានព្រមានថា ប្រសិនបើផ្សារដោះដូរទំនិញកម្ពុជា វៀតណាម និងជាផ្សារគំរូបរាជ័យនោះអភិបាលខេត្តត្បូងឃ្មុំនឹងត្រូវដកចោល ។
សម្តេចតេជោហ៊ុន សែន បានបញ្ជាក់ថា ក្នុងពិធីសម្ពោធដាក់ដំណើរផ្សារគំរូដោះដូរទំនិញរវាងកម្ពុជា និងវៀតណាម នៅព្រំដែនកម្ពុជា វៀតណាមនៅខេត្តត្បូងឃ្មុំ នាព្រឹកថ្ងៃទី២៤ ខែធ្នូនេះ បញ្ជាក់ថា បើផ្សារគំរូនេះបរាជ័យនោះការបង្កើតផ្សារផ្សេងក៏បរាជ័យដែរ ដូច្នេះ អភិបាលខេត្ត ត្រូវតែគិតគូររឿងនេះ បើមិនដូច្នេះទេ និងដកចេញពីតំណែង ។
សម្តេចបានគូសបញ្ជាក់ថា ៖«ផ្សារនេះជាផ្សារគំរូ បើផ្សារនេះបរាជ័យផ្សារដែលយើងគ្រោងបង្កើតទៀតក៏គ្មានវឌ្ឍនភាពទេ ។ អីញ្ចឹងអភិបាលនៅកន្លែងនេះត្រូវមើលផ្សារនេះ ។ បើផ្សារនេះបរាជ័យលោកឯងក៏មិនអាចឈរជើងនៅកន្លែងនេះទេ ខ្ញុំដកចោល ។ រឿងយើងនិយាយឲ្យច្បាស់» ។ សម្តេចក៏បានព្រមានថា តិចពេលប្រជាពលរដ្ឋនាំទំនិញចេញយកលុយប៉ុណ្ណេះ នាំចូលយកលុយប៉ុណ្ណោះ រឿងនេះត្រូវនិយាយឲ្យហើយ ។ រឿងនេះជាប្រតិភូកម្ម បើមិនអាចគ្រប់គ្រងបាន គឺចប់ហើយ មិនចាំបាច់មកគ្រប់គ្រងខេត្តនេះទៀតទេ ។
សម្តេចតេជោបានបន្តថា រាជរដ្ឋាភិបាលបានខិតខំធ្វើការប្រែក្លាយតំបន់អតីតសមរភូមិទាំងអស់ឲ្យទៅជាតំបន់ទីផ្សារ និងប្រែក្លាយតំបន់ព្រំដែនទាំងអស់ទៅជាព្រំដែនសន្តិភាព សន្តិភាព និងសហប្រតិបត្តិការ និងការអភិវឌ្ឍ ។ ជាក់ស្តែងជាង៤០ឆ្នាំមុន និង៤០ឆ្នាំក្រោយ យើងឃើញមានការអភិវឌ្ឍយ៉ាងណា ។ ជាមួយគ្នានោះដែរ សម្តេចតេជោបានលើកឡើងថា រដ្ឋាភិបាលវៀតណាមព្រមព្រៀងជាផ្លូវការបានទិញស្រូវពីកម្ពុជា៣០ម៉ឺនតោន ។
ដូចច្នេះសូមក្រសួងពាណិជ្ជកម្មនៃប្រទេសទាំងពីរត្រូវបានធ្វើការគ្រប់គ្រងឲ្យបានទាំងសងសាង ព្រោះថា នៅកន្លែងនេះ ជាកន្លែងលក់ដូរមួយដែលមានសណ្តាប់ធ្នាប់ និងត្រូតពិនិត្យបាន ។ សម្តេចក៏បានបញ្ជាក់ថា ពីការត្រួតពិនិត្យមិនមែនជាឧបសគ្គរារាំងដល់នៃការដល់ដូរធ្វើពាណិជ្ជកម្មរបស់ប្រជាជនទេ ។
មន្ត្រីគយ និងមន្ត្រីអន្តោប្រវេសន៍មិនត្រូវធ្វើការរំខានណាមួយដល់ប្រជាជនរកស៊ីនៅតំបន់ផ្សារគំរូនេះទេ ។ ប្រសិនបើមានការរំខានណាមួយនៅតំបន់នេះ ហើយនៅតំបន់នេះប្រជាពលរដ្ឋនិងបង្កើតច្រករបៀបរកស៊ីដោយខ្លួនឯង ប៉ុន្តែកុំឲ្យធ្វើជាបញ្ហាគ្រប់គ្រងមិនបាន ។ បើគ្រប់គ្រងមិនបាននឹងបើកដៃឲ្យឧក្រិដ្ឋជនធ្វើចរាចរណ៍គ្រឿងញៀន និងធ្វើឧក្រិដ្ឋកម្មផ្សេងៗទៀតនៅតាមច្រកនោះ ៕
ចែករំលែកព័តមាននេះ