ខេត្តកណ្ដាល ៖ ជនសង្ស័យម្នាក់បានធ្វើសកម្មភាពបោកយកម៉ូតូ១គ្រឿងពីបុរសជាអ្នករត់ម៉ូតូឌុបម្នាក់ ដោយប្រាប់ថាខ្ចីជិះទៅយកខោអាតែមួយភ្លែតទេ ព្រោះតែជាមនុស្សធ្លាប់ស្គាល់គ្នា ទើបបុរសអ្នករត់ម៉ូតូឌុបព្រមឲ្យខ្ចី ស្រាប់តែជននោះយកទៅលក់ក្នុងតម្លៃ៤០០ដុល្លារ រួចគេចខ្លួនបាត់ស្រមោលតែម្ដង ជាហេតុធ្វើឲ្យជនរងគ្រោះគ្មានម៉ូតូសម្រាប់រត់ឌុបរកប្រាក់ចិញ្ចឹមជីវិតឡើយ ហើយជនរងគ្រោះខំតាមរកជនសង្ស័យអស់រយៈពេល៨ខែ រហូតមកដល់ថ្ងៃទី២៣ ខែធ្នូ ឆ្នាំ២០១៩ ទើបជួបក៏បានឃាត់ខ្លួនប្រគល់ជូននគរបាលចាត់ការតាមច្បាប់តែម្ដង។
ជនឆបោកខាងលើនោះឈ្មោះសៀម ឌឿ ភេទប្រុស អាយុ៣៣ឆ្នាំ មុខរបរមិនពិតប្រាកដ មានទីលំនៅក្នុងភូមិទឹកជា ឃុំពើក ស្រុកអង្គស្នួល ខេត្តកណ្តាល។ ចំណែកបុរសជាអ្នករត់ឌុបរងគ្រោះឈ្មោះជ័យ ភ័ស្ត ភេទប្រុស អាយុ៣៧ឆ្នាំ មានទីលំនៅក្នុងភូមិដំណាក់អំពិល ឃុំដំណាក់អំពិល ស្រុកអង្គស្នួល ខេត្តកណ្តាល ។ រីឯម៉ូតូមួយគ្រឿងដែលបាត់បង់ម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ ១GJ-៩៦៧៤ ។
តាមប្រភពព័ត៌មានបានឲ្យដឹងថា ហេតុការណ៍ខាងលើនេះបានកើតឡើងតាំងពីវេលាម៉ោង៤និង៥នាទីរសៀលថ្ងៃទី១ ខែមេសា ឆ្នាំ២០១៩ ម្ល៉េះដោយពេលនោះជនរងគ្រោះបានរត់ឌុបហើយបានត្រូវបានប្អូនជនសង្ស័យហៅឲ្យដឹកទៅផ្ទះ លុះពេលទៅដល់ ជនសង្ស័យក៏បានខ្ចីម៉ូតូពីជនរងគ្រោះដោយនិយាយថា «ទៅយកខោអាវមួយភ្លែត» ប៉ុណ្ណោះ ខណៈនោះដោយសារតែជាមនុស្សស្គាល់គ្នា ទើបជនរងគ្រោះព្រមឲ្យខ្ចី ហើយជនសង្ស័យក៏បានជិះទៅបាត់រហូតតែម្ដង។
តាមប្រភពដដែលបានបន្តថា រហូតមកដល់ថ្ងៃទី២៣ ខែធ្នូ ទើបជនរងគ្រោះតាមរកឃើញជនសង្ស័យក៏ឃាត់ខ្លួនប្រគល់ជូននគរបាលចាត់ការតាមច្បាប់ ហើយជនសង្ស័យបានសារភាពថា ខ្លួនពិតជាបានឆបោកយកម៉ូតូពីជនរងគ្រោះបានសម្រេចមែន រួចហើយជិះយកទៅលក់នៅម្តុំភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ បានប្រាក់ចំនួន៤០០ដុល្លារ រួចយកមកចាយវាយអស់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ