ក្រុមកីឡាករ-កីឡាការិនីប៉េតង់កម្ពុជា បាននាំយកមេដាយចំនួន៧គ្រឿងមកជូនជាតិ តាមរយៈការប្រកួតកីឡាប៉េតង់ជ្រើសរើសជើងឯកអាស៊ីលើកទី៣“The 3rd Asian Patanque Champion ships 2019 Hanoi, Vietnam” នៅទីក្រុងហាណូយ ប្រទេសវៀតណាម ដែលការប្រកួតបានប្រព្រឹត្តទៅចាប់ពីថ្ងៃទី១៧ ដល់ ២៣ ខែធ្នូ ឆ្នាំ២០១៩។
លោក សូ ម៉ៃសុខគា អគ្គលេខាធិការសហព័ន្ធ និងជាប្រធានប្រតិភូដឹកនាំបានឲ្យដឹងថា ក្រុមប៉េតង់កម្ពុជាដណ្តើមបានមេដាយចំនួន៧គ្រឿង រួមមានមេដាយមាសចំនួន៥គ្រឿង មេដាយប្រាក់ចំនួន១គ្រឿង និងមេដាយសំរឹទ្ធចំនួន១គ្រឿង ។ សម្រាប់មេដាយមាសទី១ ជាមេដាយក្រុមបានទៅលើកីឡាករ សុខ ចាន់មាន កីឡាករ ញ៉ែម បូរ៉ា កីឡាករ យ៉ា ចាន់ដារ៉ារិទ្ធ និងកីឡាករ យឹម សុភក្រ ដែលបានយក ឈ្នះក្រុមកីឡាករថៃក្នុងលទ្ធផល១៣ទល់១២នៅវគ្គផ្ដាច់ព្រ័ត្រ ។
មេដាយមាសទី២ ទទួលបានពីវិញ្ញាសាវាយ៣នាក់ទល់៣នាក់យុវជន គឺមានកីឡាករ កុយ ភក្ត្រា កីឡាករ ទីវ រដ្ឋា និងកីឡាករ ជា ហេងឧត្តមរស្មី យកឈ្នះកីឡាករថៃក្នុងលទ្ធផល១៣ទល់៤នៅវគ្គផ្ដាច់ព្រ័ត្រ ។
ចំណែកមេដាយមាសទី៣បានលើវិញ្ញាសាវាយយកពិន្ទុ ដោយកីឡាការិនី កែ ឡេង បានយកឈ្នះកីឡាការិនីថៃក្នុងលទ្ធផល៤២ទល់២៤ និងមេដាយមាសទី៤ក៏បានលើវិញ្ញាសាវាយយកពិន្ទុដូចគ្នាដោយកីឡាករ សុខ ចាន់មាន បានយកឈ្នះកីឡាករថៃ ក្នុងលទ្ធផល៤៦ទល់៣៤នៅវគ្គផ្ដាច់ព្រ័ត្រ ។ មេដាយមាសទី៥ ជាមេដាយពានរង្វាន់សមាគមបានលើក្រុមកីឡាការិនី ។
ចំណែកមេដាយសំរឹទ្ធ១រកបានដោយកីឡាករ ភាព សុរ៉ាឃីម លើវិញ្ញាសាវាយយកពិន្ទុ និងមេដាយប្រាក់១រកបានលើវិញ្ញាសាចម្រុះ៣នាក់ទល់នឹង៣នាក់(បុរស២នាក់-នារី១នាក់)៕ (កែសម្រួលដោយ ៖ បុប្ផា)
ចែករំលែកព័តមាននេះ