ក្រុងហុងកុង ៖ ពួកបាតុករស្និទ្ធប្រជាធិបតេយ្យហុងកុង កាលពីរសៀលថ្ងៃទី២២ធ្នូបានប្រមូលផ្ដុំគ្នា សម្ដែងសាមគ្គីភាពជាមួយពួកជនជាតិភាគតិចអ៊ិស្លាមអ៊ួយហ្គួរក្នុងប្រទេសចិន។ ពួកគេបានប្រៀបធៀបវាសនាពួកគេទៅនឹងវាសនារបស់ពួកអ៊ួយហ្គួរ ដែលបែបនេះនាំឲ្យចិនមានកំហឹង។
កងកម្លាំងប៉ូលិសបានធ្វើ្វអន្តរាគមន៍ដើម្បីបំបែកបាតុកម្មនោះ បន្ទាប់ពីពួកអ្នកតវ៉ានាំគ្នាទាញទម្លាក់ទង់ជាតិចិនពីអគារមួយរបស់រដ្ឋាភិបាល។
ការបង្កើតប្រព័ន្ធត្រួតពិនិត្យនិងពន្ធនាគារនានា ក្នុងតំបន់ស៊ីនជាំងចិនដែលមានជនជាតិភាគតិចអ៊ួយហ្គួរ ត្រូវបានតាមដានដោយព្រូយបារម្ភនៅហុងកុង ជាកន្លែងកើតមានចាប់តាំងពីខែមិថុនាមក នូវវិបត្តិនយោបាយធ្ងន់ធ្ងរបំផុត ក្រោយការប្រគល់ដែនដីនោះមកឲ្យចិនវិញពីឆ្នាំ១៩៩៧មក។ តំបន់ពាក់កណ្ដាលស្វយ័តហុងកុង ជួបប្រទះនឹងបាតុកម្មជាប់រដឹកដើម្បីបរិហារការចុះថយនៃសេរីភាពឬការតបតដោយហិង្សារបស់ប៉ូលិសក្នុងបាតុកម្ម។
ជាញឹកញាប់គេស្ដាប់ឮពួកបាតុករហុងកុងស្រែកពាក្យនានាស្និទ្ធពួកអ៊ួយហ្គួរ តែលើកនេះពួកគេបានប្រមូលផ្ដុំគ្នាជាពិសេស សម្ដែងការគាំទ្រនិងសាមគ្គីភាពចំពោះពួកអ៊ូយហ្គួរ។ មនុស្សប្រមាណជា១០០០នាក់់បានប្រមូលផ្ដុំគ្នានៅទីលានមួយទល់មុខមាត់សមុទ្រ ដើម្បីស្ដាប់បណ្ដាវាគ្មិនដែលអះអាងថា ចិនអាចអនុវត្តនៅហុងកុងការបង្ក្រាបដូចនៅស៊ិនជាំង។
បាតុករម្នាក់បានស្រែកតាមប្រដាប់បំពងសំឡេងថា យើងមិនត្រួវបំភ្លេចពួកអ្នកដែលប្រកាន់ឆន្ទៈ ដូចការតស៊ូរបស់យើងដើម្បីសេរីភាពនិងលទ្ធិប្រជាធិបតេយ្យ និងចងកំហឹងចំពោះបក្សកុំមុយនីស្តចិនឡើយ។ បាតុករច្រើននាក់គ្រវីទង់របស់តួរគីស្ថានខាងកើត ជាទង់ប្រើដោយពួកបំបែកខ្លួនអ៊ួយហ្គូរ។
ក្នុងនាមនៃការតស៊ូប្រឆាំងលទ្ធិបំបែកខ្លួននិយមនិងភេរវកម្មអ៊ិស្លាមនិយម ចិនបានពង្រឹងយ៉ាងខ្លាំងបណ្ដាវិធានការត្រួតពិនិត្យនៅស៊ីនជាំង ចាប់តាំងពីប្រមាណជា២ឆ្នាំមកហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ