មានវិធីច្រើនណាស់ដែលមនុស្សម្នាក់អាចអនុវត្តដើម្បីរកលុយបានច្រើន ហើយសូម្បីតែក្មេងអាយុ ៨ឆ្នាំម្នាក់ក៏អាចមានសមត្ថភាពក្នុងការសម្រេចបានគោលដៅនេះដែរ ។ ទស្សនាវដ្តី Forbes បានឲ្យដឹងក្នុងពេលថ្មីៗនេះថា កុមារឈ្មោះ រ៉ៃអេន ខាជី (Ryan Kaji) ដែលមានអាយុ៨ឆ្នាំ រកចំណូលបានដល់ទៅ២៦លានដុល្លារពីវីឌីអូដែលខ្លួនបង្ហោះលើ YouTube ក្នុងឆ្នាំនេះ ។
កុមារនេះបានចាប់ផ្តើមចែករំលែកពីវីដេអូបង្ហាញពីខ្លួនកំពុងលេងរបស់លេង និងធ្វើពិសោធនវិទ្យា សាស្ត្រផ្សេងៗ ។ តែកុមារនេះមិនមែនជាក្មេងតែមួយរូបដែលជួយរកទ្រព្យរាប់លានដុល្លារដល់គ្រួសារទេ ។ កុមារី អាន់ណាស្តាសៀ រ៉ាដហ្សីនស្កាយ៉ា (Anastasia Radzinskaya) រកចំណូលបាន១៨លានដុល្លារដែរ ក្នុងឆ្នាំនេះដោយគ្រាន់តែថតវីដេអូប្រលែងលេងជាមួយនឹងឪពុករបស់ខ្លួន ។
Forbes បានកត់សម្គាល់ថា មនុស្សម្នាក់អាចរកចំណូលបានច្រើនលើ YouTube ប្រសិនបើពួកគេចេះពីគន្លឹះសំខាន់ៗមួយចំនួន ហើយកុមារជាទូទៅតែងតែចូលចិត្តមើលកុមារដទៃលេងសប្បាយ ។ តែគ្រាន់តែបង្ហោះវីដេអូទាំងនេះ គឺមិនគ្រប់គ្រាន់ក្នុងការជួយឲ្យពួកគេរកលុយបានរាប់លានដុល្លារក្នុងមួយឆ្នាំឡើយ ។ ដូចតារាវ័យក្មេងខាងលើអ្នកទាំងពីរមានក្រុមហ៊ុនធំៗដែលចុះកុងត្រាជាមួយដើម្បីឲ្យពួកគេផ្សាយពាណិជ្ជកម្មឲ្យ ។
តែវិធីរកលុយនេះអាចនឹងត្រូវបញ្ចប់ក្នុងពេលខ្លីខាងមុខ ព្រោះតែ YouTube ទើបតែចេញវិធានការថ្មី ដើម្បីឆ្លើយតបនឹងការចោទប្រកាន់ពីគណៈកម្មាធិការពាណិជ្ជកម្មអាមេរិកថា បានល្មើសនឹងច្បាប់ការពារឯកជនភាពលើអ៊ីនធើណេតរបស់កុមារ ។
ជាលទ្ធផល ក្រុមហ៊ុននេះបាននិយាយថាពួកគេនឹងហាមមិនឲ្យមានការផ្សាយពាណិជ្ជកម្មលើ YouTube ដែលមានគោលដៅលើកុមារ ។ លើសពីនេះទៅទៀត ក្រុមហ៊ុនអាចនឹងធ្វើឲ្យមនុស្សកាន់តែមានការលំបាកក្នុងការរកវីឌីអូសម្រាប់កុមារផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ