ខេត្តបាត់ដំបង ៖ ជនHackerចំនួន២នាក់ ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាល នៃស្នងការខេត្តធ្វើការឃាត់ខ្លួនជាបន្តបន្ទាប់ កាលពីល្ងាចថ្ងៃទី២០ ធ្នូ ស្ថិតនៅកន្លែងផ្សេងគ្នាក្នុងក្រុងបាត់ដំបង ដែលជាប់ពាក់ព័ន្ធនឹងសកម្មភាពចូលHack អាខោនហ្វេសប៊ុកអ្នកដទៃ…
ខេត្តបាត់ដំបង ៖ ជនHackerចំនួន២នាក់ ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាល នៃស្នងការខេត្តធ្វើការឃាត់ខ្លួនជាបន្តបន្ទាប់ កាលពីល្ងាចថ្ងៃទី២០ ធ្នូ ស្ថិតនៅកន្លែងផ្សេងគ្នាក្នុងក្រុងបាត់ដំបង ដែលជាប់ពាក់ព័ន្ធនឹងសកម្មភាពចូលHack អាខោនហ្វេសប៊ុកអ្នកដទៃ ដើម្បីប្រព្រឹត្តអំពើទុច្ចរិត ។
លោកឈឿង គឹមសុង នាយការិយាល័យព្រហ្មទណ្ឌកំរិតស្រាលបានឱ្យដឹងថា ជនHackerទាំង២នាក់នោះ ម្នាក់ឈ្មោះ សេង ភារ៉ា ហៅពេទ្យ ភេទប្រុស អាយុ២៩ឆ្នាំ មានមុខរបរជាពេទ្យធ្មេញ រស់នៅភូមិឈើទាល ឃុំឈើទាល ស្រុកបាណន់ និងម្នាក់ទៀត ឈ្មោះ ឈុន ពិសិដ្ឋ ភេទប្រុស អាយុ២៨ឆ្នាំ រស់នៅភូមិចំការសំរោង២ សង្កាត់ចំការសំរោង ក្រុងបាត់ដំបង ។
លោកនាយការិយាល័យរូបនេះបានប្រាប់ថា កិច្ចប្រតិបត្តិការបង្ក្រាបក្រុមHacker គណនីយហ្វេសប៊ុកទាំង២នាក់នេះ ក៏មានកិច្ចសហការជាមួយកម្លាំងការិយាល័យព្រហ្មទណ្ឌកំរិតធ្ងន់នៃស្នងការខេត្តកែប ក្រោមការបញ្ជាផ្ទាល់ពីលោកស្នងការខេត្តបាត់ដំបង ។ បើតាមបណ្ដឹង ជនទាំង២នាក់នេះបានប្រព្រឹត្តបទល្មើសនេះយ៉ាងធំដុំ នៅលើកចុងក្រោយថ្មីៗនេះនៅក្នុងខេត្តកែប ។
បើតាមព្រឹត្តហេតុប្រព្រឹត្តបទល្មើស ជនទាំង២នាក់នេះ ធ្លាប់ចូលHack គណនីហ្វេសប៊ុកគេជាច្រើនករណី ដើម្បីយកមកប្រើប្រាស់ក្នុងគោលដៅទុច្ចរិតបន្លំ«ឆាត»ខ្ចីលុយអ្នកដទៃរាប់ម៉ឺនដុល្លារ ។ ក្រោយពីបន្លំឆាតខ្ចីលុយគេបានសម្រេច ជននេះបានណែនាំឱ្យម្ចាស់លុយនោះវេរតាមបណ្ដាញវេរលុយនានាមកឱ្យខ្លួនជាបន្តបន្ទាប់។
តាមការបំភ្លឺខ្លះៗពីជនរងគ្រោះបាននិយាយថា ជនទុច្ចរិតឈ្មោះឈុន ពិសិដ្ឋ និងឈ្មោះសេង ភារ៉ា ហៅពេទ្យនេះ បានលួចចូលគ្រប់គ្រងអាខោនហ្វេសប៊ុកអ្នកដទៃ រួចបន្លំឆាតមកសុំខ្ចីលុយម្ចាស់អាខោននានា ដែលស្និទ្ធ និងម្ចាស់អាខោនដែលខ្លួនលួចចូលនោះ ។ ជនរងគ្រោះបានបញ្ជាក់ថា ដោយសារតែឃើញម្ចាស់អាខោនដែលត្រូវគេHack ជាមនុស្សស្គាល់គ្នាជិតស្និត ទើបសម្រេចឲ្យលុយខ្ចី។ ប៉ុន្តែក្រោយពីបានវេរលុយឱ្យជនទុច្ចរឹតរួចរាល់ ក៏មានការសង្ស័យ ហើយបានទំនាក់ទំនងសួរនាំរវាងម្ចាស់អាខោននិងម្ចាស់លុយ ទើបដឹងថា ចាញ់បោកជនHacker តែអ្វីៗជ្រុលហូសអស់ទៅហើយ។
លោកឧត្តមសេនីយ៍ត្រី ជេត វណ្ណនី ស្នងការរងខេត្តបានមានប្រសាសន៍ថា កន្លងទៅ ជនម្នាក់ឈ្មោះឈុន
ពិសិដ្ធ ធ្លាប់ត្រូវបានកម្លាំងស្នងការខេត្តចាប់បញ្ជូនទៅឲ្យក្រសួងម្ដង ហើយពាក់ព័ន្ធនឹងបទល្មើស Hacker គណនីហ្វេសប៊ុកអ្នកដទៃនេះដែរ ។ ប៉ុន្តែក្រោយពីរួចទោសទណ្ឌ ជននេះមិនរៀងចាល ហើយថែមទាំងនាំបក្សពួកប្រព្រឹត្តបទល្មើសដដែលនេះយ៉ាងកក្រើកនិងជាច្រើនលើកទៀត រហូតត្រូវបានចាប់ខ្លួនជាថ្មី ក្នុងបទល្មើសដដែលៗ ។
លោកស្នងការរងបានបញ្ជាក់ថា បច្ចុប្បន្នការិយាល័យជំនាញកំពុងតែធ្វើការសាកសួរ និងបានប្រគល់ជូនទៅកម្លាំងការិយាល័យជំនាញ នៃស្នងការខេត្តកែប ដើម្បីចាត់បន្តតាមនីតិវិធី ។
ចែករំលែកព័តមាននេះ