ខេត្តព្រះវិហារ ៖ កាលពីថ្ងៃទី១៩ កុម្ភៈ ឆ្នាំ ២០១១ គណៈប្រតិភូធនាគារជាតិនៃកម្ពុជា និងក្រុមហ៊ុនអែតវូត ដែលដឹកនាំដោយលោកជា ចាន់តូ ទេសាភិបាលធនាគារជាតិនៃកម្ពុជា បានចុះ សួរសុខទុក្ខ នាយទាហាន នាយទាហានរង និងពលទាហានក្នុងកងពលតូចអន្តរាគមន៍លេខ១ ដែលឈរជើងនៅទិសអូរតាថាវ ។
នៅក្នុងឱកាសនោះលោកឧត្តមសេនីយ៍ទោ ព្រហ្ម ផេង មេបញ្ជាការកងពលតូចអន្តរាគមន៍លេខ១ បានរាយការណ៍ជូនគណៈប្រតិភូអំពីសភាពការណ៍ទូទៅ នៅតាមព្រំដែនប្រាសាទព្រះវិហារ មុនពេលការផ្ទុះសង្គ្រាមកាលពីថ្ងៃទី៤ កុម្ភៈ រហូតមកដល់ក្រោយថ្ងៃដែលក្រុមប្រឹក្សាសន្តិសុខនៃអង្គការសហប្រជាជាតិប្រជុំសម្រេចឱ្យប្រទេសកម្ពុជា និងប្រទេសសៀម ឈប់បាញ់គ្នាជាអចិន្ត្រៃយ៍ ។ ប៉ុន្តែទោះជាមានសេចក្តីសំរេចរបស់អង្គការសហប្រជាជាតិក៏ដោយ ក៏កងទ័ពសៀមនៅតែគប់គ្រាប់បែក និងបាញ់ផ្លោងកាំភ្លើងធំចូលមកក្នុងទឹកដីនៃប្រទេសកម្ពុជាពីរបីថ្ងៃក្រោយមកទៀត ដោយមិនបានគោរពបទឈប់បាញ់គ្នាឡើយ ។
លោកមេបញ្ជាការបានថ្លែងអំណរគុណយ៉ាងជ្រាលជ្រៅដល់គណៈប្រតិភូដែលដឹកនាំដោយលោកជា ចាន់តូ ទេសាភិបាលធនាគារជាតិនៃកម្ពុជា និងក្រុមហ៊ុនអ៊ែតវូត ដែលបានមកសួរសុខទុក្ខនាយទាហាន នាយទាហានរង និងពលទាហាន និងបាននាំយកអំណោយជាថវិកា និងគ្រឿងឧបភោគ បរិភោគមកឧបត្ថម្ភដល់កងទ័ពយើងជាបន្តបន្ទាប់រហូតមក។ ក្រោយពីបានស្តាប់សេចក្តីរាយការណ៍អំពីសភាពការណ៍នៅតាមព្រំដែនប្រាសាទព្រះវិហារ រួចមក លោកទេសាភិបាលធនាគារជាតិនៃកម្ពុជា បានថ្លែងអំណរគុណដល់លោកព្រហ្ម ផេង មេបញ្ជាការ នាយទាហាន នាយទាហានរង ពលទាហាន និងក្រុមគ្រួសារទាំងអស់ នៅក្នុងកងពលតូចអន្តរាគមន៍លេខ១ និងបាន
កោតសរសើរដល់វីរភាពដ៏អង់អាចក្លាហានរបស់យុទ្ធជនយើងដែលហ៊ានធ្វើពលិកម្មគ្រប់បែបយ៉ាង ដើម្បីការពារអធិបតេយ្យ និងបូរណភាពទឹកដីមិនឱ្យសត្រូវឈ្លានពានបានឡើយ។
លោកទេសាភិបាលធនាគារជាតិនៃកម្ពុជាក៏បានលើកឡើងពីប្រសាសន៍ប្រកបដោយគតិបណ្ឌិតរបស់សម្តេចអគ្គមហាសេនាបតី តេជោ ហ៊ុន សែន អំពីសមរភូមិមុខផ្សារភ្ជាប់នឹងសមរភូមិក្រោយ ដែលសម្តេចតែងតែគិតគូរដល់សមរភូមិមុខជានិច្ច បើទោះបីជាសម្តេចមានការមមាញឹកក្នុងការងារយ៉ាងណាក៏ដោយ ។ យើងទាំងអស់គ្នាដែលជានាយទាហាន នាយទាហានរង និងពលទាហានទាំងអស់ ត្រូវចេះស្រឡាញ់គ្នាជួយយកអាសាគ្នា ជាពិសេសបញ្ហាហូបចុក ត្រូវមានអនាម័យ ដើម្បីថែរក្សាសុខភាព ហើយត្រូវប្រុងប្រយ័ត្នខ្ពស់ក្នុងការងារ ដើម្បីត្រៀមតទល់ជាមួយសត្រូវដែលមានបំណងឈ្លានពានទឹកដីយើង ។
លោកទេសាភិបាលដែលជាប្រធានគណៈប្រតិភូក៏បានប្រកាសនូវអំណោយដែលយកមកចែកជូននៅពេលនោះរួមមានអង្ករ៥តោន មី២០០កេស ទឹកដោះគោ១០កេស ត្រីខកំប៉ុង២០កេស ទឹកស៊ីអ៊ីវ១២០យួរ ទឹកត្រី១២០យួរ អំបិល៣០០គីឡូក្រាម សៀង ២៥០គីឡូក្រាម ឆៃប៉ូវ ២៥០គីឡូក្រាម ទឹកបរិសុទ្ធ១០០កេស ស្ករគ្រាប់១០កេស កាហ្វេ៥កេស ស្ករ.ស ១០បាវ កៅស៊ូតង់៥០ផ្ទាំង (តង់១ទំហំ១២ម៉ែត្រការ៉េ) និងថវិកា៣៥.០០០.០០០រៀល ។ គ្រួសារយុទ្ធជនចំនួន១៨គ្រួសារក្នុង១គ្រួសារទទួលបានឃីត១កញ្ចប់ និងថវិកា៥០.០០០រៀល ។ ក្រុមហ៊ុនអែតវូត ក៏បានផ្តល់អំណោយជាទឹកបរិសុទ្ធ១០០កេស ត្រីខ៣០កេស ស្ករ.ស៥០គីឡូក្រាម នំធុង៣០ធុង ផ្លែត្រឡាច១០០គីឡូក្រាម ផ្លែល្ពៅ១០០គីឡូក្រាម និងថវិកា២០លានរៀល ។ ដោយឡែក កាលពីថ្ងៃទី៧ កុម្ភៈ ឆ្នាំ២០១១ លោកជា ចាន់តូ និងលោកជំទាវខៀវ ស៊ីណា បានឧបត្ថម្ភស័ង្កសី៤០០សន្លឹក វិទ្យុទាក់ទង មី ត្រីខ អស់ថវិកាសរុបជាង១៣លានរៀលផងដែរ ៕
ចែករំលែកព័តមាននេះ