វង្ស វិឆ័យ និងកីឡាករថៃដល់ថ្ងៃដណ្ដើមខ្សែក្រវាត់អន្តរជាតិ និងទឹកប្រាក់5ពាន់ដុល្លារ
- ភ្នំពេញ
រាជធានីភ្នំពេញ ៖ នៅថ្ងៃទី២២ ធ្នូ ឆ្នាំ២០១៩ ស្អែកនេះ កីឡាករកម្ពុជា វង្ស វិឆ័យ និងកីឡាករថៃ…
រាជធានីភ្នំពេញ ៖ នៅថ្ងៃទី២២ ធ្នូ ឆ្នាំ២០១៩ ស្អែកនេះ កីឡាករកម្ពុជា វង្ស វិឆ័យ និងកីឡាករថៃ…
រាជធានីភ្នំពេញ ៖ នៅថ្ងៃទី២២ ធ្នូ ឆ្នាំ២០១៩ ស្អែកនេះ កីឡាករកម្ពុជា វង្ស វិឆ័យ និងកីឡាករថៃ Phat Oubun នឹងប៉ះគ្នាដណ្ដើមខ្សែក្រវាត់អន្តរជាតិ និងទឹកប្រាក់៥ពាន់ដុល្លារ នៅលើសង្វៀនទូរទស្សន៍អាស៊ីអាគ្នេយ៍ បន្ទាប់ពីអ្នកទាំងពីរឆក់បានតំណែងលេខ១ប្រចាំពូល រៀងខ្លួន ។ ការប្រកួតដែលកំពុងធ្វើឱ្យអ្នកស្នេហាវិស័យប្រដាល់ផ្ដោតការតាមដានយ៉ាងយកចិត្តទុកដាក់នេះ ត្រូវបានប្រកាសថា អ្នកឈ្នះមិនត្រឹមតែទទួលបានខ្សែក្រវាត់អន្តរជាតិប៉ុណ្ណោះទេ តែក៏ទទួលបានទឹកប្រាក់ចំនួន៥ពាន់ដុល្លារផងដែរ ។
ការប្រកួតវគ្គផ្ដាច់ព្រ័ត្រ របស់ព្រឹត្តិការណ៍កំពូលជើងឯក Champion មួយនេះ លេខ១ ទទួលបានខ្សែក្រវាត់១ ពាន១ និងទឹកប្រាក់៥០០០ដុល្លារ លេខ២ ទទួលបាន៣០០០ដុល្លារ លេខ៣ ទទួលបាន១៥០០ដុល្លារ និងលេខ៤ ទទួលបាន១០០០ដុល្លារ។
ការប្រកួតដែលនឹងចាប់ផ្ដើមធ្វើនៅថ្ងៃអាទិត្យ ស្អែកនេះ កីឡាករ ឡុង សុភី ឬ នី សុភី និងកីឡាករថៃ Chhouk Chhai ក៏នឹងត្រូវប្រកួតគ្នាយកលេខ៣ផងដែរ។
ការប្រកួតមួយនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារប៉ុស្តិ៍អាស៊ីអាគ្នេយ៍មានអ្នកទស្សនាច្រើនកកកុញស្រាប់ព្រោះតែស្ថានភាពទីតាំង ស្របគ្នាដែលការប្រកួតក្នុងព្រឹត្តិការណ៍ប្រដាល់អ្នកប្រយុទ្ធកំពូលថាមពលឆេមពាន ធ្វើឡើងចំថ្ងៃសម្រាកផងកាន់តែមានអ្នកទស្សនាកកកុញថែមទៀត ។
កីឡាករកម្ពុជា២រូប ដែលមានឈ្មោះប្រកួតយកខ្សែក្រវាត់ នឹងក្លាយជាគូប្រកួតស៊ីសាច់ហុតឈាមជាមួយគ្នា ។ អ្នករៀបចំការប្រកួតបានអះអាងថា កីឡាករទាំង២ប៉ះគ្នាក្នុងការប្រកួតលើកនេះ នឹងធ្វើឱ្យកក្រើកសង្វៀនទូរទស្សន៍អាស៊ីអាគ្នេយ៍ ដោយម្នាក់ៗគ្រាន់តែដឹងថានឹងត្រូវឡើងប្រកួតប៉ះគ្នា គឺទាំងកីឡាករកម្ពុជា និងបរទេស សុទ្ធតែបានត្រៀមខ្លួន ហើយមានការរំពឹងថាល្អមើលសម្រាប់ជំនួបមួយនេះ ។ កីឡាករទាំងពីរបានបង្ហាញពីការត្រៀមខ្លួនច្បាស់លាស់ខ្លាំងណាស់ ខណៈដែលកីឡាករ២រូបទៀត គឺ ឡុង សុភី ឬ នី សុភី និង កីឡាករថៃ Chhouk Chhai ដែលត្រូវប៉ះគ្នាយកលេខ៣ ក៏នឹងស៊ីសាច់ហុតឈាមមិនខុសគ្នា។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា ២រូបដែលមានឈ្មោះឡើងប្រកួតដណ្ដើមប្រាក់រង្វាន់ និងខ្សែក្រវាត់អន្តរជាតិក្នុងព្រឹត្តិការណ៍ប្រដាល់នេះ ទាំងភាគីកម្ពុជា និងថៃសុទ្ធតែជាកីឡាករជើងខ្លាំង ដែលលោករំពឹងខ្ពស់សម្រាប់ការប៉ះគ្នា ដោយសារតែគេប៉ះគ្នាក្នុងនាមដណ្ដើមជើងឯក និងប្រាក់រង្វាន់ មិនមែនប្រកួតមិត្តភាព។
បើទោះជាគេត្រូវប្រឈមនឹងកីឡាករថៃល្អសម្រាប់ការប្រកួតលើកនេះ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករកម្ពុជារូបនេះភាគច្រើន ។ លោកយល់ថា ម្ខាងៗ ពិតជាចង់ឈ្នះដាច់ខាត ខណៈដែលអ្នកណាឈ្នះ ក្រៅពីបានមុខមាត់ និងទឹកប្រាក់តម្លៃខ្លួនក្នុងនាមជាអ្នកឈ្នះខ្ពស់ជាងហើយ ក៏បានទទួលទំនុកចិត្តពីអ្នកគាំទ្រជាងមុនបន្ថែម ។ ប៉ុន្តែបើការប្រកួតនេះ បែរជាចាញ់ព្រោះតែប្រកួតមិនបានល្អវិញ មិនខុសពីត្រូវបាក់មុខ និងរងការរិះគន់ពីអ្នកគាំទ្រនោះទេ ។
លោកជឿជាក់ថាកីឡាករកម្ពុជាគូនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ហើយពិតជាបើកការប្រកួតមិនលាក់ដៃ ដើម្បីជៀសផុតពីការរិះគន់ណាមួយមិនខាន ។ អ៊ីចឹងហើយ ទើបលោកយល់ថា ជំនួបរវាងជើងខ្លាំងទាំង៤នឹងមិនធម្មតាសម្រាប់ការប្រកួតទាំងមូល ដោយសារតែភាគីខាងណាក៏មិនចង់បាក់មុខ ។
លោកថា ការប្រកួតរបស់ពួកគេ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលកីឡាករកម្ពុជា ក៏នៅតែមានក្រេឌីត តែពិបាកទុកចិត្តពីភាពខ្លាំង១០០ភាគរយ ដោយសារកីឡាករថៃក៏មិនធម្មតា ។ លោកយល់ថា កីឡាករថៃជាដៃគូខ្លាំង តែគេក៏មិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះដែរ ដោយសារតែបទពិសោធន៍ប្រហាក់ប្រហែលគ្នា ៕ (កែសម្រួលដោយ ៖ បុប្ផា)
ចែករំលែកព័តមាននេះ