ខេត្តស្ទឹងត្រែង ៖ យ៉ាងហោចណាស់ក្រុមក្មេងទំនើងប្រមាណជា១១នាក់ត្រូវកម្លាំងកងរាជអាវុធហត្ថបង្ក្រាបបានរួចនាំទៅធ្វើការអប់រំ បន្ទាប់ពួកគេប្រើប្រាស់ម៉ូតូបំពាក់បំពង់សឺម៉ាំងកែច្នៃបំពងសំឡេងឮៗបង្កការរំខាន់ដល់ប្រជាពលរដ្ឋ។
មេបញ្ជាការកងរាជអាវុធហត្ថ ខេត្តស្ទឹងត្រែងលោក អៀង វ៉ាន់ឌី បានអោយដឹងថា ការបង្ក្រាបក្រុមក្មេងទំនើងខាងលើនេះគឺធ្វើឡើងក្រោមកិច្ចសហការពីគណៈបញ្ជាការឯកភាពក្រុង ។ លោកបន្តថាការចុះបង្ក្រាបក្រុមក្មេងទំនើងខាងលើ គណៈបញ្ជាការឯកភាពក្រុងនិងកម្លាំងអាវុធហត្ថចុះប្រតិបត្តិការកាលពីយប់ថ្ងៃទី១៩ ធ្នូ ឆ្នាំ២០១៩ ក្នុងក្រុងស្ទឹងត្រែងដោយបានឃាត់ខ្លួនមនុស្សចំនួន១១នាក់ជាមួយម៉ូតូចំនួន៩គ្រឿង ក្នុងនោះមានម្នាក់ជាប់ពាក់ព័ន្ធជាមួយបទល្មើគ្រឿងញៀន និងចោរកម្មដែលមានដីការបញ្ជាអោយចាប់ខ្លួនរបស់តុលាការផងដែរ។
លោកមេបញ្ជាការកងរាជអាវុធហត្ថខេត្តបានបន្តថា ក្រុមក្មេងទំនើងខាងលើមិនមែនចាប់ខ្លួនបញ្ជូននោះទេគឺឃាត់ខ្លួនដើម្បីធ្វើការអប់រំ ណែនាំនិងមានចំណាត់ការបន្តពីគណៈ បញ្ជាការឯកភាពក្រុង ។ ដោយឡែកជនសង្ស័យឈ្មោះ ចាន់ តយ ត្រូវបញ្ជូនទៅតុលាការដោយសារមាន ដីកាបញ្ជាអោយចាប់ខ្លួនរបស់តុលា ការ។
គួរបញ្ជាក់ថា ក្នុងប្រតិបត្តិការចុះបង្ក្រាបក្រុមក្មេងនើងខាងលើនេះដោយសារមានការមិនពេញចិត្តចំពោះទង្វើដែលបង្កអោយប៉ះពាល់ដល់សាធារណៈជន និងមានការស្នើទៅអាជ្ញាធរក្រុង និងសមត្ថកិច្ចជាបន្តបន្ទាប់៕ (កែសម្រួលដោយ ៖ ធីតា)
ចែករំលែកព័តមាននេះ