តាមប្រភពគេហទំព័រផ្លូវការរបស់រដ្ឋបាលខេត្តប៉ៃលិន រមណីដ្ឋានទឹកធ្លាក់ចម្ការខ្នុរ ឬ គេហៅថា «បរយ៉ាខា» ជារមណីយដ្ឋានកែច្នៃមួយកន្លែងកំពុងតែល្បីរន្ទឺ មានភ្ញៀវទេសចរជាតិ និងអន្តរជាតិបានចូលទៅលេងកំសាន្តយ៉ាងច្រើនកុះករ ទាំងភ្ញៀវជាតិ និងបរទេស ។
រមណីយដ្ឋាននេះផងដែរត្រូវបានបង្កើតឡើងដោយថ្វីដៃរបស់ក្រុមគ្រួសារមួយហើយដាក់ឈ្មោះថា រមណីយដ្ឋាន«ចម្ការខ្នុរ» ឬហៅថារមណីយដ្ឋាន«ទឹកជ្រោះបរយ៉ាខា» ដែលស្ថិតនៅជាប់នឹងមាត់ជ្រោះក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ដែលវារំលេចទៅដោយទេសភាពទឹកជ្រោះដ៏ត្រជាក់លាយឡំជាមួយនឹងទោងដែលត្រូវបានគេរៀបដាក់នៅលើផ្លូវទឹកហូរសាកសមសម្រាប់អ្នកដែលចង់លំហែកាយ និងអ្នកចូលចិត្តថតរូប (Selfie) ជាមួយនឹងទេសភាពធម្មជាតិពិតៗ និងមានកន្លែងសម្រាប់អង្គុយញាំអីជាប់នឹងមាត់ជ្រោះផងដែរ ។
បើសិនជាចង់ធ្វើដំណើរទៅលេងរមណីយដ្ឋានចម្ការខ្នុរនេះ គឺត្រូវចេញពីទីរួមខេត្តបាត់ដំបង កាត់តាមជើងភ្នំសំពៅតាមបណ្តោយផ្លូវជាតិលេខ៥៧ឆ្ពោះទៅទិសខាងលិច ដែលមានចម្ងាយប្រហែលជាង៨០គីឡូម៉ែត្រដល់ក្រុងប៉ៃលិន រួចហើយបន្តធ្វើដំណើរទៅទិសខាងលិចឆៀងទៅខាងត្បូងចម្ងាយពីក្រុងប៉ៃលិនប្រហែលជា៥ទៅ៦គីឡូម៉ែត្រ ដោយឆ្លងកាត់តាមផ្លូវលំមួយកន្លែងនឹងអាចទៅរកឃើញរមណីយដ្ឋាននោះហើយ ៕
កែសម្រួលដោយ ៖ សំណាង
ចែករំលែកព័តមាននេះ