រាជធានីភ្នំពេញ ៖ កាលពីព្រឹកថ្ងៃទី២០ ខែធ្នូ ឆ្នាំ២០១៩ បុរសជាជាតិស្បែកខ្មៅម្នាក់ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញបញ្ជូនទៅសាលាដំបូងពាក់ព័ន្ធរក្សាទុក និងជួញគ្រឿងញៀនប្រមាណ៣គីឡូក្រាម ។
ជនសង្ស័យឈ្មោះ FRANK UBALE អាយុ៥០ឆ្នាំ ជនជាតិនីហ្សេរីយ៉ា មុខរបរមិនពិតប្រាកដ និងបានមកស្នាក់នៅក្នុងបន្ទប់ជួលលេខ៩ ជាន់ទី១ ផ្លូវបេតុងលេខ១៩ ភូមិត្រពាំងថ្លឹង៤ សង្កាត់ចោមចៅ១ ខណ្ឌពោធិ៍សែនជ័យ ។
ជនសង្ស័យត្រូវបានកម្លាំងមូលដ្ឋានអាវុធហត្ថខណ្ឌពោធិ៍សែនជ័យ ដឹកនាំដោយលោកវរសេនីយ៍ឯក ជឹម ឫទ្ធី សហការជាមួយកម្លាំងជំនាញ នៃការិយាល័យស្រាវជ្រាវបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ មានលោកវរសេនីយ៍ទោ ប៉ាន់ សុភាព ជានាយការិយាល័យ បានធ្វើការបង្ក្រាបជាក់ស្តែងកាលពីល្ងាចថ្ងៃទី១៦ ខែធ្នូ នៅចំណុចផ្លូវបេតុង នឹងបន្ទប់ជួលខាងលើ បន្ទាប់ពីមានការស្រាវជ្រាវអស់រយៈពេលជាង៣ខែ ។
នៅពេលឃាត់ខ្លួន ជនសង្ស័យបានឆ្លើយសារភាពថា គ្រឿងញៀនប្រមាណ៣គីឡូក្រាមនោះគឺពិតជារបស់ខ្លួនប្រាកដមែន ដែលបានរក្សាទុកសម្រាប់ជួញដូរ និងចែកចាយ ក្នុងភូមិសាស្ត្រលើទីផ្សារងងឹតក្នុងរាជធានីភ្នំពេញ ។ ជនសង្ស័យបានសារភាពទៀតថា ខ្លួនមានបក្ខពួកចំនួន២នាក់ទៀតជាជនជាតិ នីហ្សេរីយ៉ា ដែលបានរកស៊ីជួញដូរគ្រឿងញៀនជាមួយគ្នា តែបក្ខពួកទាំង២នាក់នោះកំពុងរត់គេចខ្លួន ៕ (កែសម្រួលដោយ ៖ ធីតា)
ចែករំលែកព័តមាននេះ