រាជធានីភ្នំពេញ ៖ លោកឧបនាយករដ្ឋមន្ត្រី ប្រាក់ សុខុន បានប្រកាសជាផ្លូវការថា កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុប លើកទី១៣នឹងប្រព្រឹត្តទៅនៅថ្ងៃទី១៦-១៧ ខែវិច្ឆិកា ឆ្នាំ២០២០ នៅរាជធានីភ្នំពេញ ក្រោមមូលបទ «ការពង្រឹងពហុភាគីនិយមដើម្បីកំណើនរួមគ្នា» ។
លោកឧបនាយករដ្ឋមន្ត្រីបានបង្ហាញវីដេអូរយៈពេលបីនាទី ស្ដីពីការប្ដេជ្ញា និងការត្រៀមខ្លួនរបស់កម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ ។ ការលើកឡើងរបស់ឯកឧត្តម ឧបនាយករដ្ឋមន្ត្រីបានទទួលការសារទរយ៉ាងខ្លាំងពីសំណាក់រដ្ឋមន្ត្រី ការបរទេសអាស៊ី-អឺរ៉ុប និងអ្នកចូលរួមកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុបលើកទី១៤ ។
លោកឧបនាយករដ្ឋមន្ត្រីក៏បានជម្រាបជូនអង្គប្រជុំផងដែរថា កម្ពុជាក៏នឹងរៀបចំព្រឹត្តិការណ៍ក្រៅកិច្ចប្រជុំកំពូលចំនួន០៧ រួមមាន (១) កិច្ចប្រជុំភាពជាដៃគូសភាអាស៊ី-អឺរ៉ុប (២) វេទិកាសេដ្ឋកិច្ច និងធុរកិច្ចអាស៊ី-អឺរ៉ុប (៣) កិច្ចប្រជុំកំពូលថ្នាក់ដឹកនាំវ័យក្មេងមូលនិធិអាស៊ី-អឺរ៉ុប (៤) វេទិកាតុមូលនិពន្ធនាយកមូលនិធិអាស៊ី-អឺរ៉ុប (៥) វេទិកាការងារអាស៊ី-អឺរ៉ុប (៦) វេទិកាប្រជាជនអាស៊ី-អឺរ៉ុប និង(៧) មហោស្រពវប្បធម៌កិច្ចប្រជុំអាស៊ី-អឺរ៉ុប ។
ជាកិច្ចបញ្ចប់អង្គប្រជុំទាំងមូលសំដែងការសារទរ និងរង់ចាំចូលរួមកិច្ចប្រជុំកំពូលអាស៊ី-អឺរ៉ុបលើកទី១៣ នៅរាជធានីភ្នំពេញ ។
សូមជម្រាបថា ការលើកឡើងរបស់លោកឧបនាយករដ្ឋមន្ត្រីធ្វើឡើងនៅក្នុងកិច្ចប្រជុំនេះបានប្រព្រឹត្តទៅពីថ្ងៃទី១៥ ដល់ថ្ងៃទី១៦ ខែធ្នូ ឆ្នាំ២០១៩ នៅទីក្រុងម៉ាឌ្រីត ប្រទេសអេស្ប៉ាញ ។ រដ្ឋមន្ត្រីការបរទេសបានបញ្ជាក់ជាថ្មីម្តងទៀតនូវការគាំទ្រគោលការណ៍ស្នូលរបស់ ASEM មានជាអាទិ៍ កិច្ចសន្ទនា ភាពក្រៅផ្លូវការភាពបត់បែនសមភាព និងការគោរពគ្នាទៅវិញទៅមកដោយឈរលើស្មារតីនៃការឯកភាពគ្នា ភាពជាដៃគូស្មើភាព និងផលប្រយោជន៍ទៅវិញទៅមក ៕
ចែករំលែកព័តមាននេះ