ខេត្តបន្ទាយមានជ័យ ៖ ត្រីទឹកសាបនាំចេញទៅលក់នៅប្រទេសថៃ តាមច្រកទ្វារអន្តរជាតិប៉ោយប៉ែតឆ្នាំនេះ មានចំនួនតិចជាងឆ្នាំមុន ។ នេះបើតាមការឲ្យដឹងពីអាជីវករនិងមន្ត្រីជលផល ។ អាជីវករនាំចូលត្រីល្អិតក្លាស្សេនិងប្រហុកដែលសុំមិនបញ្ចេញឈ្មោះ បានប្រាប់កោះសន្តិភាពថា…
ខេត្តបន្ទាយមានជ័យ ៖ ត្រីទឹកសាបនាំចេញទៅលក់នៅប្រទេសថៃ តាមច្រកទ្វារអន្តរជាតិប៉ោយប៉ែតឆ្នាំនេះ មានចំនួនតិចជាងឆ្នាំមុន ។ នេះបើតាមការឲ្យដឹងពីអាជីវករនិងមន្ត្រីជលផល ។ អាជីវករនាំចូលត្រីល្អិតក្លាស្សេនិងប្រហុកដែលសុំមិនបញ្ចេញឈ្មោះ បានប្រាប់កោះសន្តិភាពថា ឆ្នាំមុនៗត្រីល្អិតនិងប្រហុកនាំចេញទៅលក់នៅទឹកដីថៃ តាមច្រកទ្វារអន្តរជាតិប៉ោយប៉ែត ក្នុង១ថ្ងៃៗយ៉ាងតិចជាង១០តោន ទាំងគាត់ទាំងគេ ។ កាលឆ្នាំមុនៗ ត្រីសម្បូរ ឈ្មួញថៃទទួលទិញ១គីឡូក្រាម២២ឬ២៣បាត(ប្រាក់ថៃ)តែប៉ុណ្ណោះ ។
ដោយឡែក ឆ្នាំនេះត្រីពុំសូវសម្បូរព្រោះទឹកតូច តម្លៃត្រីប្រហុកកំភ្លាញ ថៃទទួលទិញ១គីឡូក្រាមជាង៣០បាត ហើយគ្មានប្រហុកលក់ចេញឲ្យគេទៀត ។ ប្រភពដដែលនិយាយទៀតថា ឆ្នាំមុនៗត្រីក្លាស្សេ ឬត្រីប្រហុកនាំចេញទៅលក់ឲ្យឈ្មួញថៃចាប់ពីខែវិច្ឆិការហូតដល់ខែកុម្ភៈទើបស្បើយ តែសម្រាប់ឆ្នាំនេះការនាំចេញត្រីទៅលក់ឲ្យឈ្មួញថៃ ហាក់ស្បើយតាំងពីដើមខែធ្នូ ពោលគឺទាំងគេទាំងគាត់នាំចេញមួយថ្ងៃមិនបាន៤ទៅ៥តោនទេ ហើយថ្ងៃខ្លះសឹងតែរក២ទៅ៣តោនមិនបានផង ។
ទីតាំងលើកដាក់ត្រីនាំចេញទៅថៃមួយកន្លែងផ្សេងទៀត នៅខាងលិចជាប់នឹងស្ថានីយរថភ្លើងក្រុងប៉ោយប៉ែត ប្រាប់ថា កាលឆ្នាំមុនៗ រថយន្តដឹកត្រីក្លាស្សេឬប្រហុកបានចូលចតដើម្បីសាង ឬ លើកដាក់មិនដាច់ទេ ។ ដោយឡែកឆ្នាំនេះម្ចាស់ទីតាំងដដែលនិយាយថា ចាប់ពីដើមខែធ្នូ ឆ្នាំ២០១៩ ការនាំចូលត្រីទៅលក់នៅដីថៃមានចំនួនតិចតួចបំផុត ដោយថ្ងៃខ្លះស្ទើរតែគ្មានទៀតផង ។ ដោយឡែកត្រីទឹកសាប(ត្រីរ៉ស់) គ្រាន់តែជាត្រីឆ្លងកាត់ មិនមែនជាត្រីក្នុងស្រុកឡើយ ។
ជំុវិញករណីនេះ លោក ម៉េង មុនីរ័ក្ស នាយសង្កាត់រដ្ឋបាលជលផលប៉ោយប៉ែត ប្រាប់តាមទូរស័ព្ទ ដោយទទួលស្គាល់ការពិតថា ការនាំចេញត្រីក្លាស្សេនិងត្រីប្រហុកទៅលក់ឲ្យឈ្មួញថៃតាមច្រកទ្វារអន្តរជាតិប៉ោយប៉ែត ឆ្នាំនេះបើប្រៀបធៀបនឹងឆ្នាំមុនៗពិតជាមានចំនួនតិចជាងមែន ។ លោកបន្តថា ពេលនេះត្រីទឹកសាប(ត្រីល្អិត)និងប្រហុកត្រីកំភ្លាញ នាំចេញទៅថៃមួយថ្ងៃមិនដល់៥តោនផង ខណៈឆ្នាំមុនៗថ្ងៃខ្លះនាំចេញពី៨ទៅ១០តោនតាមច្រកទ្វារអន្តរជាតិប៉ោយប៉ែត ។ បញ្ហាថយចុះចំនួនត្រីទឹកសាបឆ្នាំនេះ ត្រូវបានលោកនាយសង្កាត់រដ្ឋបាលជលផលអះអាងថាមកពីឆ្នាំនេះទឹកតូច ហើយផ្ទៃទឹកក្នុងអាងទន្លេសាបមានចំនួនតិច ។
បើទោះជាកន្លងមក រាជរដ្ឋាភិបាលបានធ្វើប្រតិភូកម្មផ្ទេរអំណាចដល់ថ្នាក់ក្រោមជាតិក្តី តែមន្ត្រីជលផលនៅក្រុងប៉ោយប៉ែតមានយ៉ាងតិច៣ទៅ៤ក្រុមផ្សេងគ្នា ខ្លះមកពីថ្នាក់ជាតិ ខ្លះមកពីអធិការដ្ឋានរដ្ឋបាលជលផលខាងជើងបឹងទន្លេសាប ធ្វើការនៅក្រុងប៉ោយប៉ែត ដែលសង្ស័យពាក់ព័ន្ធនឹងផលប្រយោជន៍ ។ ករណីនេះ ប្រភពពីមន្ត្រីខាងលើទទួលស្គាល់ថា ពិតជាមានមន្ត្រីជលផលថ្នាក់ជាតិ ខណ្ឌ និងផ្នែក ធ្វើការនៅក្រុងប៉ោយប៉ែត៣ទៅ៤ក្រុមមែន ។
យ៉ាងណាក៏ដោយ ករណីនេះកោះសន្តិភាពមិនអាចទាក់ទងសុំកាបំភ្លឺពីមន្ត្រីជំនាញពាក់ព័ន្ធបានទេ ព្រោះមិនស្គាល់លេខទូរស័ព្ទ ៕
ចែករំលែកព័តមាននេះ