រាជធានីភ្នំពេញ ៖ សម្ដេចតេជោនាយករដ្ឋមន្ត្រី ហុ៊ន សែន មានប្រសាសន៍ថា គ្រូពេទ្យត្រូវទទួលស្គាល់នូវការខ្វះខាតដែលជាការត្អូញត្អែររបស់ប្រជាពលរដ្ឋនោះគឺ«ក្រមសីលធម៌ វិជ្ជាជីវៈ»ឥរិយាបថដែលប្រព្រឹត្តចំពោះអ្នកជំងឺ ដោយ គ្មានការរើសអើងបែកចែកទេ…
រាជធានីភ្នំពេញ ៖ សម្ដេចតេជោនាយករដ្ឋមន្ត្រី ហុ៊ន សែន មានប្រសាសន៍ថា គ្រូពេទ្យត្រូវទទួលស្គាល់នូវការខ្វះខាតដែលជាការត្អូញត្អែររបស់ប្រជាពលរដ្ឋនោះគឺ«ក្រមសីលធម៌ វិជ្ជាជីវៈ»ឥរិយាបថដែលប្រព្រឹត្តចំពោះអ្នកជំងឺ ដោយ គ្មានការរើសអើងបែកចែកទេ ជីវិតមនុស្សមិនថាអ្នកមាន មិនថាអ្នកក្រ គឺជីវិតតែមួយដូចគ្នា ។
សម្ដេចតេជោនាយករដ្ឋមន្ត្រី ហ៊ុន សែន មានប្រសាសន៍ទៀតថា យើងមានទាំងពេទ្យរដ្ឋ មានទាំងគ្លីនិកឯកជន ដូច្នេះសូមកុំដណ្ដើមអ្នកជំងឺគ្នា ។បើដណ្ដើមអ្នកជំងឺគ្នា សូមឱ្យមានការទទួលខុសត្រូវពីដើមរហូតដល់ចប់ ។ សម្ដេចតេជោនាយករដ្ឋមន្ត្រី បានមានប្រសាសន៍បែបនេះ នាព្រឹកថ្ងៃទី១៦ ខែធ្នូ នៅមជ្ឈមណ្ឌលសន្និបាតនិងពិព័រណ៍កោះពេជ្រ ក្នុងឱកាសអញ្ជើញជាអធិបតីក្រុងពិធីប្រគល់សញ្ញាបត្រដល់និស្សិតជ័យលាភីនៃសាកលវិទ្យាល័យវិទ្យាសាស្ត្រសុខាភិបាលចំនួន២.៥៨៨នាក់ ដែលបានបញ្ចប់ការសិក្សាដោយជោគជ័យ ។ សម្ដេចតេជោមានប្រសាសន៍ថា គ្លីនិកឯកជនដណ្ដើមអ្នកជំងឺព្យាបាល លុះដល់ថ្នាក់សង្គ្រោះ
លែងបានហើយ ចាប់ផ្ដើមបញ្ជូនទៅមន្ទីរពេទ្យរដ្ឋ ដល់អ្នកជំងឺស្លាប់នៅមន្ទីរពេទ្យរដ្ឋ ធ្វើឲ្យប្រជាជនមានការថ្នាំងថ្នាក់ ហើយដែលធ្ងន់ធ្ងរជាងគេគឺមន្ទីរពេទ្យកាល់ម៉ែត ។
ករណីនេះ សម្ដេចតេជោនាយករដ្ឋមន្ត្រី បានព្រមានមន្ទីរពេទ្យណាក៏ដោយ គឺត្រូវចេះទទួលខុសត្រូវតាំងពីដើមដល់ចប់ ។ បើអ្នកឯងទទួលមិនបានទេ ត្រូវបញ្ជូនទៅមន្ទីរពេទ្យរដ្ឋ ។ ជួនកាលចាប់ទទួលព្យាបាលអ្នកជំងឺបានពីរបីថ្ងៃយកលុយគេអស់មិនតិច រួចចាំបញ្ជូនទៅមន្ទីរពេទ្យរដ្ឋណាមួយ រួចហើយស្លាប់តាមផ្លូវក៏មានដែរ ។ក្រសួងសុខាភិបាលត្រូវយកចិត្តទុកដាក់ឲ្យបានហ្មត់ចត់ បើមិនដូច្នោះទេចេះតែថាស្រួលយកអ្នកជំងឺទៅព្យាបាល ដល់ព្យាបាលមិនជា បញ្ជូនទៅឲ្យស្លាប់នៅកន្លែងរដ្ឋ ។ ដូច្នេះគ្រាន់តែជាកន្លែងមួយចុងក្រោយ នេះគឺជារឿងមួយដែលមិនគប្បីទេ អ្នកទទួលខុសត្រូវព្យាបាលអ្នកជំងឺនៅតាមគ្លីនិកឯកជន ។
ទន្ទឹមនឹងការរីកចម្រើន អ្វីដែលខ្ញុំសំណូមពរនិងសុំបន្តសម្រាប់គ្រូពេទ្យ ទាំងគ្រូពេទ្យដែលកំពុងបម្រើការងារនៅតាមមន្ទីរពេទ្យ ឬមណ្ឌលសុខភាព ទាំងគ្រូពេទ្យនៅទីនេះ យើងត្រូវមើលឲ្យឃើញ ។ ទន្ទឹមនឹងមានវឌ្ឍនភាព យើងក៏ត្រូវទទួលស្គាល់ចំណុចខ្វះខាតដែលជាការត្អូញត្អែរ របស់ប្រជាពលរដ្ឋរបស់យើង គឺក្រមសីលធម៌វិជ្ជាជីវៈ ។ ចំណុចនេះ គឺជាចំណុចដែលគ្រូពេទ្យទាំងអស់ត្រូវតែផ្លាស់ប្ដូរឥរិយាបថដែលបានប្រព្រឹត្តចំពោះអ្នកជំងឺ ហើយបង្កើតទៅជាពាក្យសម្ដីត្រីមួយកន្ត្រកបើស្អុយមួយគឺស្អុយទាំងអស់ ។ ដូច្នេះ គ្រូពេទ្យត្រូវយកចិត្តទុកដាក់ថែមទៀតចំពោះអ្នកក្រីក្រ ដោយសារតែគាត់ក្រហើយទើបគាត់មករកយើង ។ ចំពោះអ្នកដែលមានប្រាក់កាស គេទៅរកមន្ទីពេទ្យឯប្រទេសក្រៅហើយ ឬក៏នៅមន្ទីរពេទ្យណាដែលមានសេវាឯកជន ។
អ្នកក្រីក្រនេះហើយដែលមកពឹងពាក់យើង យើងត្រូវតែផ្ដល់នូវការអាណិតស្រឡាញ់ យកចិត្តទុកដាក់ថែទាំព្យាបាលគាត់ឲ្យអស់លទ្ធភាព ។សម្ដេចតេជោ បានគូសបញ្ជាក់ថា ត្រូវខិតខំធ្វើទៅលើបញ្ហានេះ បើសិនជាបញ្ហាហ្នឹងមិនត្រូវបានកែប្រែទេ បើទោះជាបំពាក់រាប់រយរាប់ពាន់លានដុល្លារថែមទៀត វាក៏នៅតែមានបញ្ហាពាក្យសម្តីត្អូញត្អែរពីសំណាក់ប្រជាពលរដ្ឋដែរ។ ដូច្នេះ ទោះបីជាគ្រូពេទ្យក្នុងផ្នែករដ្ឋ ឬគ្រូពេទ្យក្នុងវិស័យឯកជនត្រូវគិត កុំយកលុយជាធំ ត្រូវយកជីវិតប្រជាជនធ្វើជាធំ រឿងលុយរឿងកាក់ទុកក្រោយ ធ្វើយ៉ាងម៉េចព្យាបាលជំងឺ ដោះស្រាយបញ្ហាការព្យាបាលជូនគាត់សិន កុំឃើញគាត់អត់មានប្រាក់បញ្ជូនគាត់ទៅកន្លែងផ្សេង ។
រឿងដែលដណ្ដើមគ្នាគឺនៅត្រង់កន្លែងហ្នឹង អ្នកដែលអត់មានប្រាក់ឲ្យទៅរកគេផ្សេង ។ អ្នកដែលមានប្រាក់ដណ្ដើមគ្នាទុក ដល់ពេលសង្គ្រោះលែងបាន ចាប់តាំងបញ្ជូនទៅមន្ទីរពេទ្យរដ្ឋ ។ ដូច្នេះសុំឱ្យគ្រប់មន្ទីរពេទ្យ ទាំងមន្ទីរពេទ្យរដ្ឋទាំងមន្ទីរពេទ្យឯកជន ធ្វើសកម្មភាពឱ្យស្របនឹងសីលធម៌ សកម្មភាពដើម្បីសង្គ្រោះជីវិតមនុស្សជាធំ មិនមែនបញ្ហាលុយកាក់ទេ ។ ខ្ញុំសង្ឃឹមថាយើងអាចធ្វើបាន យើងជាគ្រូពេទ្យ យើងចង់សង្គ្រោះមនុស្ស ។ សម្ដេចតេជោបានលើកឡើងថា បើមិនជឿធ្វើសម្ភាសន៍សួរលោកគ្រូពេទ្យ១០០នាក់ ឆ្លើយដូចគ្នា ខ្ញុំចង់ជួយសង្គ្រោះទើបខ្ញុំចង់រៀនពេទ្យ ។ សាកសួរមើល ហើយសួរក្រុមនិស្សិត ហេតុអី្វបានចង់ចូលរៀនពេទ្យ ចង់រៀនពេទ្យមកពីអ្វី ចម្លើយសុទ្ធតែឆ្លើយថា ខ្ញុំចង់ជួយជីវិតមនុស្ស ។
ដល់ពេលយើងបានជាគ្រូពេទ្យហើយ ហេតុអ្វីបានជាមិនយកចិត្តទុកដាក់ទៅលើគោលដៅដើមរបស់យើង ដែលយើងចង់សង្គ្រោះជីវិតមនុស្ស បែរជាយើងមើលឃើញប្រាក់ថ្លៃជាងជីវិតមនុស្ស ឬយើងប្រើឥរិយា បថមិនសមរម្យ ។ ខ្ញុំនៅតែបន្តនិយាយរឿងគ្រូពេទ្យកោសខ្យល់ មិនមែនជាការប្រមាថចំពោះគ្រូពេទ្យទេ ក៏ប៉ុន្តែសម័យមុននោះ យើងមានមណ្ឌលសុខភាពច្រើនប៉ុន្តែអត់មានថ្នាំពេទ្យទេ ។
ដូច្នេះ ជាគុណធម៌របស់គ្រូពេទ្យដូចជាខ្វះថ្នាំព្យាបាល គ្រូពេទ្យក្លាយជាអ្នកកោសខ្យល់ឱ្យអ្នកជំងឺ ។ ខ្ញុំនិយាយថា គ្រូពេទ្យកោះខ្យល់ សំដៅទៅលើការយកចិត្តទុកដាក់ចំពោះអ្នកជំងឺ ដោយសារតែខ្លួនគ្មានមធ្យោបាយ ដូច្នេះវិធីដែលនៅសេសសល់ អ្នកគ្រូពេទ្យជនបទកោសខ្យល់ជូនអ្នកជំងឺ ។ ឥឡូវវិទ្យាសាស្ត្រ កាន់តែទំនើប កុំឃើញគេខោ មិន ខោ អាវមិនអាវ គឺខោមិនខោអាវមិនអាវនោះហើយដែលគ្រូពេទ្យយើងត្រូវយកចិត្តទុកដាក់ ។
យើងទាំងអស់គ្នានេះ ដែលឪពុកម្ដាយរបស់ក្មួយៗចៅៗ គ្មានអ្នកណាកើតមកជាអ្នកមានទេ ជំនាន់ ប៉ុល ពត ចេញមកគឺក្រទាំងអស់គ្នាទេ ។ ឥឡូវយើងចាប់ផ្ដើមមានលទ្ធភាពហើយ ក៏ប៉ុន្តែយើងក៏នៅសេសសល់អ្នកក្រីក្ររបស់យើងប្រមាណជា១០% នោះហើយជាគោលដៅដែលយើងត្រូវយកចិត្តទុកដាក់ ។ ក្រៅពីអត្រា១០ភាគរយអ្នកក្រីក្រ ក៏នៅមានអ្នកគម្លាតពីខ្សែបន្ទាត់ជិតអ្នកក្រីក្រមិនខ្ពស់ពេក អ្នកនោះហើយជាគោលដៅដែលយើងត្រូវយកចិត្តទុកដាក់ ។ ស្ត្រីដែលក្រីក្រត្រូវបានទទួលការពិនិត្យនិងផ្ដល់ថវិកា៤ដងមុនពេលសម្រាល។
ពេលសម្រាលត្រូវសម្រាលនៅមន្ទីរពេទ្យ ដោយគ្មានបង់ប្រាក់ និងត្រូវបានយើងឧបត្ថម្ភបន្ថែមទៀត ។ បន្ទាប់ទៅផ្ដល់៨ដងមុនពេលកូនអាយុ២ឆ្នាំ ។ នេះជាគោលនយោបាយលើវិស័យសង្គមដែលយើងបានអនុវត្ត ។សម្ដេចតេជោមានប្រសាសន៍ថា ខ្ញុំនៅតែនិយាយស្នើសុំឲ្យមានការយកចិត្តទុកដាក់ អ្វីក៏ដោយបើគ្មានសីលធម៌គ្រប់គ្រងទេ ច្បាស់ជាមិនអាចជោគជ័យបានទេ ។ យើងនៅតែទទួលការរិះគន់ ពីសំណាក់ប្រជាពលរដ្ឋរបស់យើង ៕
ចែករំលែកព័តមាននេះ