ADផ្ទាំងផ្សព្វផ្សាយពាណិជ្ជកម្ម

៥ ចំណុចដែលអ្នកត្រូវធ្វើដើម្បីបានឡើងឋានៈ

4 ឆ្នាំ មុន

១៨ ខែ ធ្នូ ឆ្នាំ ២០១៩ ម៉ោង ១៦:០៧

បើអ្នកជាអ្នកធ្វើការក្នុងស្ថាប័នណាមួយ អ្នកតែងតែមានគោលដៅចង់ឡើងឋានៈឲ្យកាន់តែខ្ពស់តាមសមត្ថភាពដែលខ្លួនអាចធ្វើបាន ប៉ុន្តែវាមិនអាចកើតមានឡើងក្នុងរយៈពេលខ្លីឡើយ ជាពិសេសពេលដែលអ្នកត្រូវប្រកួតប្រជែងជាមួយបុគ្គលិកដទៃក្នុងស្ថាប័នរបស់អ្នក ។ ដូច្នេះតើអ្នកត្រូវធ្វើដូចម្តេចខ្លះ ដើម្បីធ្វើឲ្យខ្លួនកាន់តែលេចធ្លោពេលដែលមានឱកាសឡើងតំណែង? ១. ផ្តោតកម្លាំងលើការដោះស្រាយបញ្ហាមិនមែនរអ៊ូពីវាទេ ៖…

១. ផ្តោតកម្លាំងលើការដោះស្រាយបញ្ហាមិនមែនរអ៊ូពីវាទេ ៖
មនុស្សជាច្រើនក្នុងស្ថាប័នការងារមានទម្លាប់ចូលចិត្តរអ៊ូរទាំពីបញ្ហាដែលខ្លួនអាចមើលឃើញ ។ តែអ្នកត្រូវចងចាំថា អ្នករអ៊ូកាន់តែច្រើន គឺវាមិនជួយដោះស្រាយបញ្ហាដែលមាននោះឡើយ ។ ផ្ទុយមកវិញ បើអ្នកធ្វើជាអ្នកចង្អុលបង្ហាញថា មានបញ្ហាហើយធ្វើជាអ្នកចេញមុខដោះស្រាយទៀតនោះ អ្នកនឹងក្លាយជាមនុស្សដ៏មានតម្លៃសម្រាប់ស្ថាប័នការងារ ។

២. ចូលរួមជួយអ្នកដទៃ៖
ក្រៅពីដោះស្រាយបញ្ហាធំៗដែលក្រុមហ៊ុន ឬស្ថាប័នមានហើយអ្នកគ៏គួរតែសកម្មក្នុងការជួយដល់មនុស្សដទៃដែលកំពុងមានបញ្ហាដែរ ។ គោលដៅសំខាន់ គឺការធ្វើជាមនុស្សដែលអ្នកដទៃអាចពឹងពាក់បានដែលជួយបង្ហាញថា អ្នកស័ក្កិសមនឹងតំណែងដែលត្រូវការភាពជាអ្នកដឹកនាំខ្ពស់ ។

៣. តាមដានមើលតម្រូវការរបស់ប្រធានក្រុមអ្នក ៖
មិនមែនមានន័យថា អ្នកត្រូវអែបអបប្រធានក្រុម ឬចៅហ្វាយដើម្បីឡើងឋានៈទេ តែអ្នកគួរតែដឹងថា ពួកគេចង់បាន និងត្រូវការអ្វីជាងគេ ។ ការយល់ដឹងនេះនឹងអនុញ្ញាតឲ្យអ្នកក្លាយជាមនុស្សដែលសម្រេចកិច្ចការសំខាន់ៗដោយមិនចាំបាច់ចាំរហូតដល់មានអ្នកប្រាប់ឲ្យធ្វើ ។

៤. សុំយោបល់ ដើម្បីកែសម្រួល៖
ការសុំយោបល់សម្រាប់កែសម្រួលបង្ហាញថា អ្នកមានចំណាប់អារម្មណ៍ និងការប្តេជ្ញាក្នុងការធ្វើឲ្យខ្លួនកាន់តែប្រសើរឡើងនៅថ្ងៃមុខ ហើយថា អ្នកខ្វល់ខ្វាយពីកិច្ចការរបស់អ្នកដែរ ។ ដោយហេតុដូចនេះអ្នកនឹងទទួលបានចំណាប់អារម្មណ៍ពីថ្នាក់លើ ។

៥. រក្សាអារម្មណ៍ឲ្យស្ងប់ពេលមានបញ្ហា ៖
ស្ថាប័នការងារណាក៏ចូលចិត្តមនុស្សដែលចេះ និងមានសមត្ថភាពក្នុងការរក្សាអារម្មណ៍របស់ខ្លួនឲ្យស្ងប់ពេលមានបញ្ហាធំៗកើតឡើងដែរ ។ ដូច្នេះអ្នកត្រូវធ្វើជាមនុស្សដែលផ្តោតស្មារតីលើការរកដំណោះស្រាយខណៈដែលមនុស្សជុំវិញខ្លួនកំពុងជ្រួលច្របល់ ៕ កែសម្រួលដោយ ៖ សុឃាក់