រាជធានីភ្នំពេញ ៖ នគរបាលប៉ុស្តិ៍រដ្ឋបាលផ្សារថ្មីទី៣ បានឃាត់ខ្លួនយុវសិស្សទំនើងម្នាក់ដែលជិះម៉ូតូបង្ហោះបង្អួតស្រីស្នេហ៍លើកំណាត់ផ្លូវលេខ១៧៨ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ កាលពីវេលាម៉ោង១០ព្រឹក ថ្ងៃទី១០ មីនា ២០១១ បន្ទាប់ពីបង្កឱ្យមានការភ្ញាក់ផ្អើលដល់ប្រជាពលរដ្ឋធ្វើដំណើរម្នាក់ៗហួសចិត្តគ្រប់ៗគ្នា។
លោកអនុសេនីយ៍ទោកុល ខាន់ណារ៉ា នាយនគរបាលប៉ុស្តិ៍រដ្ឋបាលផ្សារថ្មីទី៣ បានឱ្យដឹងថា កាលពីវេលាម៉ោង១០ព្រឹកថ្ងៃទី១០ មីនា ២០១១ កម្លាំងនគរបាលប៉ុស្តិ៍រដ្ឋបាលផ្សារថ្មីទី៣ បានជិះម៉ូតូល្បាតក្នុងភូមិសាស្ត្រ លុះមកដល់ផ្លូវលេខ១៧៨ សង្កាត់ផ្សារថ្មីទី៣ ក៏ប្រទះឃើញក្រុមយុវសិស្សទំនើងជិះម៉ូតូ៣គ្រឿង បើកប្រណាំងគ្នាយ៉ាងអនាធិបតេយ្យ និងជ្រែកាច់ចង្កេះបង្អួតសិស្សសាលាដូចគ្នា ព្រមទាំងស្រែកហ៊ោកញ្ជ្រៀវឆ្ពោះទៅទិសខាងលិចដោយគ្មានគិតពីគ្រោះថ្នាក់ដល់ជីវិតខ្លួនឯង និងអ្នកធ្វើដំណើរតាមដងផ្លូវនោះទេ ។ យោងតាមបទបញ្ជារបស់លោកអធិការនគរបាលខណ្ឌដូនពេញ កម្លាំងនគរបាលប៉ុស្តិ៍រដ្ឋបាលផ្សារថ្មីទី៣ បានដេញបង្ក្រាបក្រុមសិស្សទំនើង ជាលទ្ធផលសិស្សទំនើងម្នាក់ក្នុងចំណោមម៉ូតូ៣គ្រឿង ត្រូវបានឃាត់ខ្លួនរួមទាំងម៉ូតូមួួយគ្រឿងដែលជិះប្រណាំងគ្នា ។ សិស្សទំនើងដែលសមត្ថកិច្ចឃាត់ខ្លួនមានឈ្មោះកែវ រស្មី អាយុ១៦ឆ្នាំ ជាសិស្សថ្នាក់ទី១០J២ វិទ្យាល័យព្រះស៊ីសុវត្ថិ ស្នាក់នៅផ្ទះលេខ២៣ ផ្លូវលេខ៣៣៧ សង្កាត់បឹងកក់ទី១ ខណ្ឌដូនពេញ និងដកហូតមួយគ្រឿងម៉ាកវីវ៉ា ស៊េរី២០០៧ ពណ៌ខ្មៅ ពាក់ស្លាកលេខ ភ្នំពេញ 2P-2185 ។
លោកហែម ឫទ្ធី នាយករងរដ្ឋបាលសាលាខណ្ឌដូនពេញបាននិយាយថា យោងតាមបទបញ្ជាអភិបាលខណ្ឌដូនពេញ បានដាក់ចេញនូវវិធានការបន្តបង្ក្រាបក្រុមក្មេងទំនើងបើករថយន្តនិងម៉ូតូប្រណាំងគ្នាក្នុងភូមិសាស្ត្រខណ្ឌដូនពេញ ឱ្យធ្លាក់ទៅកម្រិតទាបបំផុត គឺសមត្ថកិច្ចតែងតែល្បាតបង្ក្រាបក្រុមនេះជាប់ជានិច្ច ៕
ចែករំលែកព័តមាននេះ