រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ការធ្វើវិមជ្ឈការដល់ថ្នាក់ក្រោមជាតិមិនអាចឲ្យតែអំណាចខ្យល់នោះទេ គឺត្រូវមានទាំងអស់ព្រោះ ពួកគាត់នៅផ្ទាល់ជាមួយប្រជាពលរដ្ឋដឹងពីតម្រូវការរបស់ប្រជាពលរដ្ឋ ។…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ការធ្វើវិមជ្ឈការដល់ថ្នាក់ក្រោមជាតិមិនអាចឲ្យតែអំណាចខ្យល់នោះទេ គឺត្រូវមានទាំងអស់ព្រោះ ពួកគាត់នៅផ្ទាល់ជាមួយប្រជាពលរដ្ឋដឹងពីតម្រូវការរបស់ប្រជាពលរដ្ឋ ។
សម្តេចតេជោបានបញ្ជាក់ក្នុងពិធីប្រគល់សញ្ញាបត្រដល់ដល់និស្សិតបញ្ចប់ការសិក្សានៅសាលវិទ្យាល័យវេស្ទើន ចំនួនជាង២ពាន់នាក់ នាព្រឹកថ្ងៃទី១៨ ខែធ្នូនេះ នៅមជ្ឈមណ្ឌលកោះពេជ្រ យ៉ាងដូច្នេះថា៖ «បើយើងធ្វើការពីថ្នាក់លើទៅវាឆ្ងាយណាស់ ប៉ុន្តែបើយើងឲ្យអំណាចនេះទៅថ្នាក់មូលដ្ឋាន គឺថ្នាក់មូលដ្ឋានទទួលបន្ទុកធ្វើ តែយើងត្រូវឲ្យនូវមុខងារគេគ្រប់គ្រង ទាំងភារៈកិច្ច ឲ្យគេគ្រប់គ្រងធនធានមនុស្ស ថវិកា ក៏ឲ្យគេអាហ្នឹងទើបគេធ្វើការបាន ។ បើឲ្យតែអំណាចខ្យល់ គឺគេធ្វើមិនបានទេ» ។
សម្តេចបន្ថែមថា មួយរយៈពេលមកនេះសម្តេចបានចុះហត្ថលេខាលើឯករសារមួយចំនួនដោយមិនចាំបាច់មានការយល់ព្រមនោះទេ ។ ឬចាំដល់សេះដុសស្នែងទៀត ព្រោះអស់លោក បានគិតថា កិច្ចការនឹងត្រូវរដ្ឋមន្ត្រីគ្រប់គ្រង អស់លោកមិនប្រគល់ឲ្យគេ ។ សម្តេចបន្ថែមទៀតថា ករណីនេះត្រូវសម្តេចបានចារលិខិតទៅកាន់សម្តេចក្រឡាហោម ស ខេង ឧបកនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃឲ្យរៀបចំធ្វើលិខិតមកសម្តេច ដើម្បីចុះហត្ថលេខាសម្រេចក្នុងនោះវិស័យអប់រំត្រូវផ្ទេរអ្វីខ្លះ វិស័យសុខាភិបាលផ្ទេរអ្វីខ្លះ វិស័យកសិកម្ម វិស័យធនធានទឹក វិស័យដីធ្លី ផ្ទេរអ្វីខ្លះ ។
ខ្ញុំរុញទៅតែម្តង ដើម្បីយកទៅធ្វើបើមិនដូច្នេះទេរដ្ឋមន្ត្រីមិនធ្វើទេ គឺនៅអោបក្រសោបនឹងកន្លែងហ្នឹងដែលធ្វើឲ្យថ្នាក់ក្រោមជាតិដែលជាអ្នកនៅផ្ទាល់ជាមួយប្រជាពលរដ្ឋដោះស្រាយជាមួយប្រជាពលរដ្ឋជួបបញ្ហា ។ ជាមួយគ្នានោះដែរ សម្តេចក៏បានលើកឡើងថា សម្តេចបានស្នើឲ្យសម្តេចក្រឡាហោម ធ្វើស្ថិតិអំពីថ្នាក់ខេត្តថ្នាក់ស្រុក ប៉ុន្មានភាគរយ ហើយមានសញ្ញាបត្រឧត្តមសិក្សា តាមពិតយើងមានលើសពី៩០ភាគរយ ហើយមានសញ្ញាបត្រឧត្តមសិក្សា បើថ្នាក់ខេត្តមានសញ្ញាបត្រឧត្តមសិក្សាមាន១០០ភាគរយ និងថ្នាក់ស្រុកមានស្ទើ១០០ភាគរយ ហើយនៅពេលខាងមុខថ្នាក់ឃុំសង្កាត់នឹងមានបេក្ខជនមានសញ្ញាបត្រឈរឈ្មោះជាមេឃុំ ឬចៅសង្កាត់ថែមទៀតផង ។
សម្តេចតេជោក៏បានថ្លែងទៀតថា នៅពេលថ្នាក់ក្រោមជាតិសំបូរទៅដោយមន្ត្រី បំរើប្រជាពលរដ្ឋមានកម្រិតចេះដឹងខ្ពស់ថ្នាក់បរិញ្ញាបត្រឡើយ ទៅនឹងធ្វើឲ្យការដឹកនាំកាន់តែប្រសើរឡើង ។ ចំណែកថ្នាក់ដឹកនាំថ្នាក់ជាតិវិញ សម្តេចនាយករដ្ឋមន្ត្រីក៏បានសុំការយោគយល់ ព្រោះឥឡូវនេះគេត្រូវជ្រើសរើសយកមន្ត្រីទាក់ទង និងសមត្ថកិច្ច ហើយសញ្ញាបត្រផងដែរក្នុងនោះមិនមែនតែស្ថាប័នរដ្ឋនោះទេ ទោះបីជាវិស័យឯកជនក៏គេជ្រើសរើសបុគ្គលិកបំរើការងារទាក់ទង និងសមត្ថភាព និងសញ្ញាបត្រដែរ ។ គេជ្រើសរើសគេដាក់ចេញផ្សព្វផ្សាយត្រូវការថ្នាក់បរិញ្ញាបត្រជំនាញខាងអ្វី ? អាយុចាប់ពីប៉ុន្មាន? ។
សម្តេចក៏បានលើកឡើងថា រាជរដ្ឋាភិបាលបានសម្រេចធ្វើកំណែទ្រង់អាយុក្នុងការចូលរួមប្រឡងបំរើការងារក្នុងស្ថាប័នផងដែរ ។ បើមន្ត្រីវិញមិនចាំគិតពីអាយុនោះទេ គឺមន្ត្រីអាចប្រឡងប្តូរប្រកខណ្ឌបាន ។
សូមជម្រាបថា ការលើកឡើងរបស់ប្រមុខរាជរដ្ឋាភិបាលនេះ បន្ទាប់ពីក្រសួងសេដ្ឋកិច្ចបានសម្រេចទំលាក់ថវិកាដល់ថ្នាក់ក្រោមជាតិដោយផ្ទាល់ចាប់ពីឆ្នាំ២០២០តទៅ ដើម្បីឲ្យថ្នាក់ ដឹកនាំមានសិទ្ធិក្នុងការចាត់ចែង និងរៀបចំកសាងមូលដ្ឋានខ្លួនស្របទៅតាមអ្វីដែលប្រជាពលរដ្ឋចង់បានផងដែរ ។ សម្តេចក្រឡាហោម ស ខេង ឧបនាយករដ្ឋមន្ត្រីធ្លាប់លើកឡើងថាចាប់ពីឆ្នាំ២០២០ តទៅនៅតាមមូលដ្ឋានឃុំ សង្កាត់នឹងមានថវិកាធ្លាក់ទៅដល់ផ្ទាល់តែម្តង ដោយមួយឃុំសង្កាត់អាចទទួលបានថវិកាចាប់៧ម៉ឺនដុល្លារឡើងទៅ ៕ កែសម្រួលដោយ ៖ សុឃាក់
ចែករំលែកព័តមាននេះ