ខេត្តកំពត ៖ សាលាខេត្តកំពតគណៈកម្មការអន្តរក្រសួងបានរៀបចំកិច្ចប្រជុំបញ្ចប់ក្នុងការត្រៀមរៀបចំពិធីបុណ្យសមុទ្រ នៅថ្ងៃទី១៨ ខែធ្នូនេះ ក្រោមអធិបតីភាពលោករដ្ឋមន្ត្រី ថោង ខុន លោកជាវ តាយអភិបាលនៃគណៈអភិបាលខេត្តកំពត…
ខេត្តកំពត ៖ សាលាខេត្តកំពតគណៈកម្មការអន្តរក្រសួងបានរៀបចំកិច្ចប្រជុំបញ្ចប់ក្នុងការត្រៀមរៀបចំពិធីបុណ្យសមុទ្រ នៅថ្ងៃទី១៨ ខែធ្នូនេះ ក្រោមអធិបតីភាពលោករដ្ឋមន្ត្រី ថោង ខុន លោកជាវ តាយអភិបាលនៃគណៈអភិបាលខេត្តកំពត ព្រមទាំងមានការចូលរួមពីអនុប្រធានសមាជិកគណៈកម្មការ និងមន្ត្រីរាជការពាក់ព័ន្ធ ។
ពិធីបុណ្យសមុទ្រលើកទី៨ ជុំទី២ នៅខេត្តកំពតនឹងប្រារព្ធធ្វើឡើងរយៈពេល៣ថ្ងៃចាប់ពីថ្ងៃទី២០-២២ ខែធ្នូ ឆ្នាំ២០១៩ខាងមុខនេះ ក្រោមវត្តមានដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកត្តិព្រឹទ្ធបណ្ឌិត ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងថា រហូតមកដល់ពេលនេះ ដំណើរការរៀបសម្រេចបានប្រមាណជាង១០០% ហើយក្នុងនោះមានដូចជា កិច្ចការតុបតែងលម្អតាមទីសាធារណៈ សួនច្បារ ការជួសជុលហេដ្ឋារចនាសម្ពន្ធ ផ្លូវថ្នល់បានល្អ ការបំពាក់និងបន្ថែមភ្លើងបំភ្លឺក្នុងទីក្រុង ការរៀបចំវិថីម្ហូបអាហារ (Food Street) ការរៀបចំគោលដៅទេសចរណ៍នានាជុំវិញខេត្ត ពិសេសតាមព្រែកទឹកឈូ ឬព្រែកកំពង់បាយ ភ្នំបូកគោ ស្រែអំបិល តំបន់កសិទេសចរណ៍ចម្ការម្រេច តំបន់ទេសចរណ៍ប្រវត្តិសាស្ត្រ សហគមន៍ទេសចរណ៍មួយចំនួន ព្រមទាំងគោលដៅទេសចរណ៍នៅខេត្តបានរួចរាល់អស់ហើយ ។
លោករដ្ឋមន្ត្រីក៏បានលើកឡើងផងដែរ ពីបញ្ហាផ្លូវធ្វើដំណើរពីរាជធានីភ្នំពេញមកកាន់ខេត្ត កំពត និងពីខេត្តកំពតទៅកាន់គោលដៅនានាមួយចំនួនទៀតអាជ្ញាធរ ខេត្តមន្ទីរ និងក្រសួងសាធារណការបានធ្វើការជួសជុលផ្លូវជាតិលេខ៣ លេខ៣៣ និងផ្លូវនានាជាច្រើនទៀតឱ្យប្រជាពលរដ្ឋ និងភ្ញៀវទេសចរធ្វើដំណើរបានសមរម្យនៅមុនពេលបុណ្យសមុទ្រមកដល់នាពេលខាងមុខនេះ ។
លោករដ្ឋមន្ត្រីក៏បានបង្ហាញនូវក្តីរំពឹងទុកថា ភ្ញៀវទេសចរដែលនឹងមកចូលរួមលេងកម្សាន្តក្នុង ពិធីបុណ្យសមុទ្រនៅខេត្តកំពតខាងមុខនេះនឹងមានចំនួនច្រើនកុះករជាងឆ្នាំកន្លងទៅ ខណៈប្រទេសជាតិកំពុងមានសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យ ខណៈដែលប្រជាពលរដ្ឋក៏កាន់តែមានភាពជីវភាពធូរធារ និងចង់ចេញដើរកម្សាន្តកាន់តែច្រើនឡើងៗ ។
សូមបញ្ចាក់ថា ពិធីបុណ្យសមុទ្រខាងមុខនេះក្រសួងទេសចរណ៍ សូមបង្ហាញជូនភ្ញៀវទេសចរ និងប្រជាពលរដ្ឋឱ្យបានស្គាល់បន្ថែមអំពីរមណីយដ្ឋានទេសចរណ៍មួយចំនួននៅក្នុងខេត្តក្នុងនោះរួមមាន៖ ឧទ្យានដងព្រែក ៖ មានទីតាំងស្ថិតនៅភូមិបត់ក្បាលដំរី ឃុំស្នំប្រាំពីរ មានចម្ងាយប្រមាណ៨គីឡូម៉ែត្រពីក្រុងកំពត ។ រមណីយដ្ឋាននេះ ស្ថិតនៅជាប់ដងព្រែកកំពង់បាយ ដែលពោរពេញដោយធម្មជាតិ និងអាកាសធាតុស្រស់ស្រាយ ។ លោកអ្នកអាចជិះខ្សែរ៉កឆ្លងព្រែក ជិះទូកកាយ៉ាក់ ជិះទូទាទឹក និងពិសាអាហារឆ្ងាញ់ៗនៅទីនោះ ។
រមណីយដ្ឋានដូងទេរ ៖ មានទីតាំងស្ថិតនៅភូមិស្នំប្រាំពី ឃុំម៉ាក់ប្រាង្គ ស្រុកទឹកឈូ មានចម្ងាយប្រមាណ៧គីឡូម៉ែត្រ ពីស្ពានថ្មីក្រុងកំពត ។ រមណីយដ្ឋាននេះ ស្ថិតនៅជាប់ដងព្រែកកំពង់បាយ ដែលពោរពេញដោយធម្មជាតិ និងអាកាសធាតុស្រស់ស្រាយ ។ លោកអ្នកអាចងូតទឹកលេងកម្សាន្តជិះទូកកាយ៉ាក់ ជិះទូកទាទឹក ក្ដាររអិល និងមានអាហារឆ្ងាញ់ៗជាច្រើនមុខទៀត ។
សហគមន៍ទេសចរណ៍ត្រពាំងសង្កែ ៖ មានទីតាំងស្ថិតនៅភូមិកំពង់កែស ឃុំត្រពាំងសង្កែ ស្រុកទឹកឈូ មានចម្ងាយ៧គីឡូម៉ែត្រពីក្រុងកំពតដោយធ្វើដំណើរតាមផ្លូវជាតិលេខ៣៣ ពីខេត្តកំពតទៅខេត្តកែប ។ សហគមន៍នេះជាសហគមន៍បែបធម្មជាតិដែលជាកន្លែងអភិរក្សដើមកោងកាងដ៏ធំមួយក្នុងខេត្តកំពត ។ នៅក្នុងសហគមន៍មានបម្រើសេវាកម្មដូចជា សេវាកម្មស្នាក់នៅម្ហូបអាហារបែបសហគមន៍ជិះកាណូតមើលព្រៃកោងកាង និងមានលក់ដើមកោងកាងសម្រាប់ឱ្យភ្ញៀវដាំទុកជាអនុស្សាវរីយ៍ផងដែរ ។
កន្លែងជិះទូកកម្សាន្តនៅតាមព្រែកកំពង់បាយ មានទីតាំងស្ថិតនៅភូមិទ្វីបខាងត្បូង សង្កាត់អណ្ដូងខ្មែរ ក្រុងកំពត ។ លោកអ្នកអាចរីករាយជាមួយខ្យល់អាកាសបរិសុទ្ធកម្សាន្តជាមួយទេសភាពមើលថ្ងៃលិចមើលអំពិលអំពែក និងពិសាអាហារឆ្ងាញ់ៗនៅទីនោះ ។ ផ្សារសាមគ្គីទីរួមខេត្តកំពតមានទីតាំងស្ថិតនៅសង្កាត់កំពង់បាយ ដែលមានលក់គ្រឿងសមុទ្រស្រស់ៗ រួមមាន ៖ បង្គា មឹក ក្ដាមថ្ម ក្ដាមសេះ និងត្រីសមុទ្រជាច្រើនប្រភេទទៀត ។
ក្រៅពីនោះលោកអ្នកអាចចូលម៉ាស្សាបានផងដែរ ដែលមានបម្រើសេវាកម្មម៉ាស្សាបែបខ្មែរបុរាណ ម៉ាស្សាប្រេង ម៉ាស្សាខ្លួន ម៉ាស្សាជើង ម៉ាស្សាក្បាល និងមានអាងទឹកក្ដៅ-ត្រជាក់ ស្ទីម សូណាជាដើម ។ សូមរីករាយជាមួយដំណើរកម្សាន្តនៅខេត្តកំពតផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ