អ្នកជំនាញគ្រប់គ្រងទ្រព្យសម្បត្តិម្នាក់ឈ្មោះ រីឆាត វាត់ (Richard Watts) បាននិយាយថា អាណាព្យាបាលដែលចិញ្ចឹមបីបាច់កូនៗដែលមិនដែលជួបប្រទះនឹងទុក្ខលំបាក និងធ្វើឲ្យពួកគេជួបបញ្ហានៅថ្ងៃអនាគត ។
ប្រាកដណាស់ ព្រោះតែប្រទេសកម្ពុជាលែងមានសង្គ្រាម ហើយសេដ្ឋកិច្ចប្រទេសក៏បន្តលូតលាស់ទៅមុខនោះបានធ្វើឲ្យកូនៗជំនាន់ក្រោយភាគច្រើនធំដឹងក្តីដោយមិនដឹងថាអ្វីជាទុក្ខលំបាកទេ ជាពិសេសនៅពេលដែលឪពុកម្តាយខិតខំធ្វើគ្រប់យ៉ាងដើម្បីជួយរងអ្វីគ្រប់យ៉ាងឲ្យកូន ។
ជាលទ្ធផលលោក វាត់ បានឲ្យដឹងថាកូនៗមិនដែលរៀនចេះខិតខំឆ្លងឧបសគ្គ ឬដោះស្រាយបញ្ហាដោយខ្លួនឯងឡើយ ។ ឪពុកម្តាយទាំងនេះជាឪពុកម្តាយដែលផ្តោតស្មារតីលើការរកវិធីដើម្បីជួយកូនៗចេញពីគ្រប់កាលៈទេសៈដែលមិនល្អ ។ ពួកគេតែងតែរត់ទៅមុនដើម្បីធានាថាផ្លូវដែលកូនៗដើរមិនមានភាពរលាក់បន្តិចសោះឡើយ ។ ហើយអ្វីដែលសំខាន់ គឺពួកគេប្រហែលជាមិនដឹងខ្លួនទេថាពួកគេកំពុងតែធ្វើបាបកូនខ្លួនឯង ។ ប្រាកដណាស់ទឹកចិត្តឪពុកម្តាយមិនអាចមានការវាស់វែងបានឡើយ ប៉ុន្តែមានករណីខ្លះឪពុកម្តាយត្រូវលែងដៃចេញពីកូន ដើម្បីឲ្យពួកគេធំធាត់ដោយខ្លួនឯង ។
លោក វាត់ ដែលជាអ្នកគ្រប់គ្រងទ្រព្យសម្បត្តិរបស់គ្រួសារស្តុកស្តម្ភជាច្រើនបានសង្កេតឃើញថា គ្រួសារដែលមានទ្រព្យសម្បត្តិស្តុកស្តម្ភជួបប្រទះនឹងបញ្ហាមួយដែលមានឈ្មោះថា Entitlemania ដែលមានន័យថាកូនៗគិតថាពួកគេគួរតែទទួលបានអ្វីមួយទោះជាខ្លួនមិនចាំបាច់ខិតខំក៏ដោយ ។ ឧទាហរណ៍ដូចជាឪពុកដែលឲ្យតំណែង និងឋានៈខ្ពស់មួយក្នុងក្រុមហ៊ុនឲ្យទៅកូនទាំងដែលកូនគ្មានសមត្ថភាពទាល់តែសោះ ។ ពេលដែលពួកគេធំឡើង ពួកគេនឹងចាប់ផ្តើមដឹងថាមនុស្សដែលនៅជុំវិញខ្លួនពួកគេមិនគោរពពួកគេឡើយ ។
ដូច្នេះតើឪពុកម្តាយគួរធ្វើដូចម្តេចដើម្បីជៀសវាងបង្កើតអនាគតបែបនេះសម្រាប់កូនៗខ្លួន? ក្រៅពីលែងដៃឲ្យពួកគេស្គាល់ទុក្ខលំបាកដោយខ្លួនឯង និងដោះស្រាយបញ្ហាដោយខ្លួនឯងឲ្យបានច្រើនហើយ ឪពុកម្តាយគួរពិចារណាថាកូនៗមានសមត្ថភាពគ្រប់គ្រាន់ឬទេក្នុងការទទួលទ្រព្យសម្បត្តិពីអ្នក ៕ កែសម្រួលដោយ ៖ សុឃាក់
ចែករំលែកព័តមាននេះ