រាជធានីភ្នំពេញ ៖ បុរសម្នាក់ស្រវឹងធ្លាក់ភ្នែកបើករថយន្តតាកូម៉ាមួយគ្រឿងបោះពួយយ៉ាងលឿន ជ្រុលទៅបុករថយន្តស៊េរីទំនើបមួយគ្រឿងទៀត ដែលកំពុងឈប់រង់ចាំភ្លើងស្តុបទាំងកំរោល កាលពីវេលាម៉ោង៩និង២០នាទីយប់ ថ្ងៃទី១៧ ធ្នូ ស្ថិតនៅចំណុចស្តុបខាងមុខមន្ទីរពេទ្យកាល់ម៉ែត តាមបណ្តោយមហាវិថីព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញ។ ហើយភាគីខាងរថយន្តរងគ្រោះក៏បានទាមទារសំណងចំនួន១ម៉ឺនដុល្លារពីភាគីខាងរថយន្តបង្ក ។
តាមប្រភពព័ត៌មានពីកន្លែងកើតហេតុថា នៅមុនពេលកើតគេឃើញបុរសម្នាក់បើកបររថយន្ត ពណ៌ទឹកប្រាក់ ពាក់ស្លាកលេខ ភ្នំពេញ2A-2978 បើកក្នុងស្ថានភាពស្រវឹងតាមបណ្ដោយមហាវិថីព្រះមុនីវង្ស ក្នុងទិសដៅពីត្បូងទៅជើង និងក្នុងល្បឿយ៉ាងលឿន ។
លុះមកដល់ចំណុចកើតហេតុ រថយន្តបង្កក៏បានជ្រុលចង្កូតទៅបុកពីក្រោយរថយន្តមួយគ្រឿងទៀតម៉ាក MITSUBISHI TRITON ពណ៌.ស ពាក់ស្លាកលេខ ភ្នំពេញ2BO-5689បើកបរជាលក្ខណៈគ្រួសារបួនទៅប្រាំនាក់ ដែលកំពុងឈប់រង់ចាំភ្លើងស្តុបពណ៌ក្រហម បានបុកចំពីក្រោយពេញទំហឹងទាំងកំរោលរងការខូចខាតយ៉ាងដំណំ និងបណ្តាលឲ្យស្ត្រីម្នាក់ដែលរួមដំណើរលើរថយន្តTRITONរងរបួសបាក់ធ្មេញមួយគ្រាប់ ឯរថយន្តបង្កបានរងការខូចខាតក្រពឹតផ្នែកខាងមុខស្ទើរទាំង។
ក្រោយពេលកើតហេតុ ក៏មានសមត្ថកិច្ចមូលដ្ឋានបានចុះមកដល់កន្លែងកើតហេតុ និងបានអោយភាគីទាំងពីរធ្វើការសម្របសម្រួលដោះស្រាយគ្នា ហើយភាគីខាងរថយន្តរងគ្រោះក៏បានទាមទារសំណងចំនួន១ម៉ឺនដុល្លារពីភាគីខាងរថយន្តបង្ក ប៉ុន្តែដោយខាងរថយន្តបង្កមិនមានលទ្ធភាពសងទេ ក៏សម្រេចប្រគល់រថយន្តទាំងពីរគ្រឿង ឲ្យទៅសមត្ថកិច្ចជំនាញធ្វើការវាស់វែងនិងស្ទូចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាជាបន្តទៀត ។
ចែករំលែកព័តមាននេះ