រាជធានីភ្នំពេញ ៖ មេធាវីការពារក្តីលោក កឹម សុខា អតីតប្រធានគណបក្សសង្គ្រោះជាតិបានអះអាងថា សហមេធាវីបានត្រៀមខ្លួនរួចជាស្រេចហើយ ក្នុងការតតាំងរឿងក្តីការពារសំណុំរឿងលោកកូនក្តីខ្លួន ដែលតុលាការបានសម្រេច បើកសវនាការ នៅថ្ងៃទី១៥ ខែមករា ឆ្នាំ២០២០ខាងមុខ នេះ ។
លោក ចាន់ ចេន សហមេធាវីការពារក្តីលោក កឹម សុខា បានបញ្ជាក់ឲ្យដឹងនៅថ្ងៃទី១៧ ខែធ្នូ ឆ្នាំ២០១៩យ៉ាងដូច្នេះថា៖« ខ្លួនសុំជាមេធាវី គឺភារៈកិច្ចរបស់យើង គឺត្រៀមខ្លួនរួចជាស្រេចហើយ ក្នុងការពារក្តីចំពោះមុខតុលាការ ។ ទោះបីជាសាធារណជនជាតិ និងអន្តរ ជាតិដឹងយ៉ាងណាក្តី ក៏ខ្លួនជាមេធាវីអត់មានជម្រើសទេ បើដើមចោទនៅតែរុញនៅតាមផ្លូវតុលាការដដែលនោះ» ។
លោកមេធាវីបានបន្ថែមថា ក្នុងនាមជាមេធាវីនៅតែត្រៀមខ្លួនរួចជាស្រេចក្នុងការងារតស៊ូមតិតាមផ្លូវតុលាការចំពោះសំណុំរឿងរបស់លោក កឹម សុខា ព្រោះគ្មានអ្វីផ្សេងពីនេះទេ ។ យ៉ាងណាក្តីចំពោះសំណុំរឿងរបស់លោក កឹម សុខា ត្រូវបានលោកមេធាវីបានសម្តែងក្តីសង្ឃឹមថា នឹងទទួលបាលលទ្ធផលល្អ ។ ដោយបានបញ្ជាក់យ៉ាងដូច្នេះថា៖ «យើងដាំបាយ យើងសង្ឃឹមថាបាយឆ្អិន ហើយយើងឆុងកាហ្វេ យើងសង្ឃឹមថា កាហ្វេនេះឈ្ងុយ នេះយើងជាក្តីសង្ឃឹមថារបស់យើង» ។
ជាមួយគ្នានោះដែរ លោកមេធាវីក៏មិនបានបង្ហាញក្នុងការដោះស្រាយ ឬបង្ហាញសាក្សីក្នុងកា រដោះស្រាយបទល្មើសលោក កឹម សុខា នោះទេ ។ លោកថា ៖«ដោយសារតែរឿងនេះជាយុទ្ធសាស្ត្រ ឬយុត្តិវិធីរបស់តុលាការខ្ញុំសុំមិនបញ្ចេញសាក្សីនោះទេ» ។ ក្នុងកិច្ចសម្ភាសន៍ជាមួយអ្នកសារព័ត៌មានលោក មេធាវីចាន់ ចេន បានអះអាថា លោកសង្ឃឹមថា នឹងមានការទម្លាក់ការចោទប្រកាន់ ឬបទចោទចំពោះកូនក្តីរបស់ខ្លួន ជាមិនខាននៅពេលខាងមុខនេះ ។
លោកមេធាវី ក៏ដូចជា សហមេធាវីផ្សេងទៀតនៅតែទទូចឲ្យមានការទម្លាក់បទចោទប្រកាន់ចំពោះលោក កឹម សុខា ដដែល ។ ជាមួយគ្នានោះដែរ លោកមេធាវីបានអះអាងថា ចំពោះសំណុំរឿងលោក កឹម សុខា ជារឿងរបស់អ្នកនយោបាយតែប៉ុណ្ណោះ ៕
ចែករំលែកព័តមាននេះ