រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា តាមរយៈគោលនយោបាយគាំពារសង្គម ធ្វើឲ្យចំនួនស្ត្រីឆ្លងទន្លេនៅមន្ទីរពេទ្យមានការកើនឡើងជាងឆ្នាំ២០១៨កន្លងមក ។ សម្តេចតេជោ ហ៊ុន សែន បានថ្លែងនៅក្នុងពិធីប្រគល់សញ្ញាបត្រដល់និស្សិតបញ្ចប់ការ សិក្សានៅសាកលវិទ្យាល័យវិទ្យាសាស្ត្រសុខាភិបាលនាព្រឹកថ្ងៃទី១៦ ខែធ្នូ នៅមជ្ឈមណ្ឌលពិព័រណ៍និងសន្និបាតកោះពេជ្រថា រហូតមកដល់ពេលនេះមានស្ត្រីនិងកុមារចំនួន១៦៥.១១៥ករណី បានទទួលសេវានិងសាច់ប្រាក់ឧបត្ថម្ភចំណាយជាង១០ពាន់លានរៀល ។ មានន័យថា ចាប់ពីផ្តើមពីស្ត្រីមានផ្ទៃពោះភ្លាម យើងបានផ្តើមឧបត្ថម្ភមុនឆ្លងទន្លេ៤ដង ដោយទៅពិនិត្យម្តងៗរាជរដ្ឋាភិបាលឧបត្ថម្ភរហូតដល់ពេលឆ្លងទន្លេ និងកូនអាយុ២ឆ្នាំ រដ្ឋបានចំណាយថវិកាសម្រាប់កុមារម្នាក់ជិត២០០ដុល្លារអាមេរិក ។
សម្តេចតេជោបន្តថា ការធ្វើបែបនេះក៏ចូលរួមចំណែកក្នុងការកាត់បន្ថយភាពក្រីក្រដល់ប្រជាជនកម្ពុជាផងដែរ ។ សម្តេចក៏បានឲ្យដឹងថា កាលពីថ្ងៃទី១៥ ខែធ្នូ មានកម្មការិនី២៥០នាក់ឆ្លងទន្លេ ហើយចំនួនកូនមាន២៥០នាក់ ដែលគ្មានកូនភ្លោះនោះទេ ។ បើគិតចាប់ពីថ្ងៃទី១ ខែមករា ដល់ថ្ងៃទី១៥ ខែធ្នូឆ្នាំនេះ មានកម្មការិនីឆ្លងទន្លេចំនួន៧៣.០៣៧នាក់ ចំនួនកូន៧៣.៥២១នាក់ ។សម្តេចបន្តថា តាមតួលេខឆ្នាំ២០១៨កន្លងមក មានកម្មការិនីជាង៦ម៉ឺននាក់បានឆ្លងទន្លេ ចំណែកឆ្នាំ២០១៩នេះ មានជាង៧ម៉ឺននាក់បានឆ្លងទន្លេ ដែលនេះបង្ហាញថាចំនួនកម្មករឆ្នាំ២០១៩ កើនឡើងជាងឆ្នាំកន្លងមក ។
ជាមួយគ្នានេះ សម្តេចតេជោក៏បានឲ្យដឹងថា ចំនួនស្ត្រីឆ្លងទន្លេដែលកើនឡើងច្រើនក៏មកពីគោលនយោបាយគាំពារសង្គមរបស់រាជរដ្ឋាភិបាលចំពោះស្ត្រី ពិសេសនោះចំពោះកម្មការិនីដែលសម្រាលកូនអនុញ្ញាតឲ្យឈប់សម្រាក៣ខែ ហើយទទួលបានប្រាក់បៀវត្សរ៍ចំនួន១៣០% បូកនឹងប្រាក់ជួយឧបត្ថម្ភ១០០ដុល្លារបន្ថែមទៀត ។ សម្តេចតេជោបន្ថែមថា ចំនួនស្ត្រីដែលឆ្លងទន្លេនេះបានទទួលសេវានៅពេលពួកគេទៅសម្រាកឆ្លងទន្លេនៅមន្ទីពេទ្យរបស់រដ្ឋ ហើយកម្មករមានប័ណ្ណបេឡាជាតិរបបសន្តិសុខសង្គម (បសស) ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ