តើអ្នកនឹងមានគម្រោងយកកូនបន្ថែមទេបើរដ្ឋាភិបាលជួយឧបត្ថម្ភដល់អ្នក? ការផ្តួចផ្តើមពីរដ្ឋាភិបាលក្នុងការជួយផ្នែកហិរញ្ញវត្ថុដល់អាណាព្យាបាលដើម្បីយកកូនបន្ថែមកំពុងតែកើតមានឡើងក្នុងប្រទេសកាន់តែច្រើនហើយដើម្បីដោះស្រាយនឹងបញ្ហាការធ្លាក់ចុះនៃអត្រាកំណើត ។
ការស្រាវជ្រាវក្នុងប្រទេសជាច្រើនបានបង្ហាញមកថា មនុស្សនឹងយកកូនពេលដែលពួកគេមានអារម្មណ៍ថាពួកគេមានការងារនឹងន សេដ្ឋកិច្ចមានលំនឹងល្អ និងមានការគាំទ្រឲ្យបង្កើតគ្រួសារ ។
នៅក្រុង Lestijärvi របស់ប្រទេសហ្វាំងឡង់ កំពុងតែជួបប្រទះនឹងបញ្ហាធ្លាក់ចុះនៃអត្រាកំណើត ។ មុនឆ្នាំ ២០១៣ ក្រុងនេះមើលឃើញមានការចាប់កំណើតទារកតែម្នាក់ប៉ុណ្ណោះក្នុងមួយឆ្នាំ ។ តាំងពីពេលនោះមកអាជ្ញាធរក្នុងតំបន់បានចាប់ផ្តើមកម្មវិធីមួយដែលផ្តល់ថវិកាប្រមាណ ១ ម៉ឺនអឺរ៉ូ ឬ ១១ ម៉ឺនដុល្លារដល់គ្រួសារដែលមានកូនក្នុងរយៈពេល ១០ ឆ្នាំ ។
ហើយកម្មវិធីទាំងនេះកំពុងតែត្រូវបានអនុម័តក្នុងប្រទេសដទៃទៀតដែលជួបប្រទះដូចគ្នាដូចជាប្រទេសអូស្ត្រាលី និងជប៉ុនផងដែរ ។ កម្មវិធីផ្សេងៗទៀតដែលបង្កើតឡើងដើម្បីជំរុញទឹកចិត្តប្រជាជនឲ្យយកកូនបន្ថែមរួមមានសេវាមើលថែកុមារ ការអនុញ្ញាតឲ្យសុំច្បាប់សម្រាលកូនរយៈពេលវែង និងការជំរុញទឹកចិត្តម្តាយឲ្យធ្វើការបន្ទាប់ពីមានកូនជាដើម ។ ប្រទេសហ្វាំងឡង់ក៏មានកម្មវិធីផ្តល់ជាប្រអប់សម្ភារៈទារក និងប្រាក់ចាយវាយប្រមាណ ១១១ ដុល្លារជារៀងរាល់ខែដែរ ។
ប្រទេសដទៃដូចជាប្រទេសចិនកំពុងតែព្យាយាមដោះស្រាយបញ្ហាខាងលើដូចគ្នាដែរ ព្រោះតែច្បាប់កូនមួយដែលត្រូវបានលុបបំបាត់កាលពីឆ្នាំ ២០១៦ ។ ក្នុងរយៈពេល ៣៧ ឆ្នាំមុនឆ្នាំ ២០១៦ ប្រជាជននៅប្រទេសចិនមានសិទ្ធិយកកូនតែមួយប៉ុណ្ណោះ តែបច្ចុប្បន្ននេះចំនួនត្រូវបានបង្កើនមកពីរវិញ ។
ក្នុងពេលថ្មីៗ រដ្ឋាភិបាលចិនបានពិចារណាផ្តល់ជាជំនួយផ្សេងៗដល់អាណាព្យាបាលដូចប្រទេសហ្វាំងឡង់ដែរ ។ ក្នុងក្រុង Ama លើកោះ Nakanoshima របស់ប្រទេសជប៉ុន វិញអាណាព្យាបាលនឹងទទួលបាន៩៤០ ដុល្លារសម្រាប់កូនដំបូង ប៉ុន្តែកូនទី ៤ នឹងទទួលបានដល់ទៅ ៩៤០០ ដុល្លារឯណោះ ៕ កែសម្រួលដោយ ៖ សុឃាក់
ចែករំលែកព័តមាននេះ