រាជធានីភ្នំពេញ ៖ បន្ទាប់ពីមន្ត្រីជាន់ខ្ពស់របស់សហភាពអឺរ៉ុប (EU) បានទទូចឲ្យរដ្ឋាភិបាលកម្ពុជាស្ដាសិទ្ធិមនុស្ស និងលទ្ធិប្រជាធិបតេយ្យឡើងវិញ ដើម្បីរក្សាការអនុគ្រោះពន្ធ EBA សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃបានបញ្ជាក់ថា កម្ពុជាមិនទាន់បរិយាយអ្វីតបទៅ EU ឡើយ ខណៈបានបញ្ជូនរបាយការណ៍ទៅរួចរាល់ហើយ ។
ការមិនហានបញ្ជាក់របស់មន្ត្រីជាន់ខ្ពស់រដ្ឋាភិបាលនេះ បន្ទាប់ពីនាពេលថ្មីៗនេះ EU ទុកពេលឲ្យកម្ពុជា១ខែ ដើម្បីបញ្ចេញប្រតិកម្មតបក្រោយបញ្ចប់របាយការណ៍បឋមស្តីពីការផ្អាក EBA បណ្តោះអាសន្ន នៅថ្ងៃទី១២ ខែវិច្ឆិកា ឆ្នាំ២០១៩ ពោលពីថ្ងៃ១២ វិច្ឆិកា ដល់១២ធ្នូ ។
ក្រោយមករាជរដ្ឋាភិបាលកម្ពុជាបានចេញសេចក្ដីឆ្លើយតបចុងក្រោយដើម្បីឆ្លើយតបចំពោះរបាយការណ៍របស់គណៈកម្មការអឺរ៉ុបពាក់ព័ន្ធ EBA ដោយសង្ឃឹមថា អឺរ៉ុបនឹងពិចារណាផ្ដល់ប្រព័ន្ធអនុគ្រោះពន្ធ EBA ដល់កម្ពុជាបន្តទៀត ។ ក្រោយបញ្ចប់ពិធីផ្សព្វផ្សាយអនុក្រឹត្យស្តីពី មុខងារ និងរចនាសម្ព័ន្ធរបស់រដ្ឋបាលក្រុង-ស្រុក-ខណ្ឌ នៅថ្ងៃទី១៧ ខែធ្នូ ឆ្នាំ២០១៩ នៅទីស្តីការក្រសួងសម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានប្រាប់អ្នកសារព័ត៌មានយ៉ាងខ្លីថា «ឥឡូវនេះខ្ញុំអត់មានអីឆ្លើយតបអីទេ ? ពីព្រោះរបាយការណ៍ យើងបានបញ្ជូនទៅអស់ហើយ» ។
សូមជម្រាបថា បើយោងតាមការចេញផ្សាយរបស់អាស៊ីសេរីកាលពីថ្ងៃទី១៦ ធ្នូ បានឲ្យដឹងថា តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ និងជាអនុប្រធានគណៈកម្មការអឺរ៉ុប លោក ចូសេប បូរែល ហ្វុងតែល (Josep Borrell Fontelles) បានថ្លែងថា រដ្ឋាភិបាលកម្ពុជាត្រូវប្រឹងប្រែងបន្ថែមទៀត ដើម្បីធ្វើឲ្យប្រសើរឡើងនូវស្ថានភាពសិទ្ធិមនុស្ស និងប្រជាធិបតេយ្យ ព្រោះនេះជារឿងចាំបាច់ដែលអាចឲ្យកម្ពុជាទទួលបានការអនុគ្រោះពន្ធ EBA បន្តទៅទៀត ។
សូមបញ្ជាក់ថា ប្រព័ន្ធអនុគ្រោះពន្ធ EBA បានធ្វើឲ្យកម្ពុជាចំណេញពន្ធនាំទំនិញចូលសហភាពអឺរ៉ុបប្រមាណជា៧០០លានដុល្លារក្នុង១ឆ្នាំៗ ៕
ចែករំលែកព័តមាននេះ