ខេត្តកំពង់ឆ្នាំង ៖ លោក យូ ទិត្យវឌ្ឍនៈ ព្រះរាជអាជ្ញាសាលាដំបូងខេត្ត ដែលទើបចូលកាន់តំណែងថ្មីៗកន្លងទៅនេះ បានចេញដីកាឆែកឆេរ និងចុះមកដឹកនាំបញ្ជាដោយផ្ទាល់ ឆែកឆេរលំនៅឋានមួយកន្លែង ស្ថិតនៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ហើយបានឃាត់ខ្លួនជនសង្ស័យចំនួន៤នាក់ ជាអ្នកចែកចាយ និងអ្នកប្រើប្រាស់ថ្នាំញៀន ជាមួយនឹងវត្ថុតាងមានសំបកស្បោងចែកចាយនិងប្រើប្រាស់ថ្នាំញៀនរាប់រយកញ្ចប់ នៅវេលាម៉ោង៩និង៣០នាទីព្រឹកថ្ងៃទី០៤ មិថុនា ។
លោក សំ សិទ្ធី អធិការនគរបាលក្រុងកំពង់ឆ្នាំង ឱ្យដឹងថា ជនសង្ស័យទាំង៤នាក់ដែលឃាត់ខ្លួននោះ ១-ឈ្មោះ ទុយ គឹមអឿន អាយុ២៥ឆ្នាំ រស់នៅក្នុងភូមិសង្កាត់ខាងលើ និងជាអ្នកចែកចាយថ្នាំញៀន យ៉ាងសកម្ម ហើយទើបតែចេញពីពន្ធនាគារ ពីបទចែកចាយថ្នាំញៀន ។ ២-ឈ្មោះ វ៉ាត គឹមឈៀង អាយុ២០ឆ្នាំ ជាសិស្ស ស្នាក់នៅក្នុងភូមិទួលក្រឡាញ់ សង្កាត់កំពង់ឆ្នាំង ។ ៣-ឈ្មោះ ឆែម ថនពេជរតនា អាយុ១៩ឆ្នាំ ជាសិស្ស និងជាកូនលោកប្រធានមន្ទីរម្នាក់ រស់នៅភូមិឃ្លាំងប្រាក់ សង្កាត់ប្អេរ ។ ៤-ឈ្មោះ សេន ថា អាយុ១៧ឆ្នាំ ជាសិស្ស រស់នៅភូមិស្រែព្រីង សង្កាត់កំពង់ឆ្នាំង។ ទាំង៤នាក់ត្រូវបានសមត្ថកិច្ចចាប់ខ្លួន ពេលពួកគេរត់ទៅពួននៅលើផ្ទះ ។
ប្រភពដដែលបន្តថា មុនពេលកើតហេតុ ដោយមានការសង្ស័យ សមត្ថកិច្ចនគរបាល ក្រុងកំពង់ឆ្នាំង សហការជាមួយនគរបាលគ្រឿងញៀនខេត្ត និងអាវុធហត្ថខេត្ត បានសុំស្រ្តីជាម្ចាស់ផ្ទះត្រួតពិនិត្យអ្នកស្នាក់ក្នុងផ្ទះ ដែលមានជនសង្ស័យខាងលើ ស្នាក់នៅតែស្ត្រីជាម្ចាស់ផ្ទះមិនអនុញ្ញាត។ បន្ទាប់មកសមត្ថកិច្ចក៏បានរាយការណ៍ ជូនព្រះរាជអាជ្ញាអមសាលាដំបូងខេត្ត ហើយលោកក៏បានចេញដីកា និងដឹកនាំដោយផ្ទាល់ ធ្វើការឆែកឆេរ រកឃើញកញ្ចប់ស្បោងច្រកថ្នាំញៀនប្រើរួចរាប់រយកញ្ចប់ និងសម្ភារជក់ថ្នាំញៀនមួយចំនួនទៀត រួមជាមួយទូរសព្ទ័ដៃ៨គ្រឿង វិទ្យុទាក់ទងប្រើលេខនគរបាលក្រុង១គ្រឿង និងម៉ូតូ២គ្រឿង។
ជនសង្ស័យទាំង៤នាក់ត្រូវបានសមត្ថកិច្ចនាំខ្លួនមកកាន់អធិការដ្ឋាននគរបាល ក្រុងកំពង់ឆ្នាំង ដើម្បីកសាងសំណុំរឿងបញ្ជូនខ្លួននិងវត្ថុតាង ទៅកាន់ការិយាល័យជំនាញនៃស្នងការដ្ឋាននគរបាលខេត្ត ចាត់ការបន្តតាមនិតិវិធី និងបញ្ជូនជនទៅកាន់សាលាដំបូងខេត្ត ធ្វើការផ្តន្ទាទោសតាមនីតិវិធី។ ប៉ុន្តែនៅចំពោះមុខសមត្ថកិច្ច ពួកគេទាំង៤នាក់មិនបានសារភាព និងទទួលស្គាល់នូវវត្ថុតាងដែលសមត្ថកិច្ចបានរកឃើញនិងដកហូតនោះឡើយ៕
ចែករំលែកព័តមាននេះ