ខេត្តព្រះសីហនុ ៖ មន្ត្រីសាលាក្រុងដឹកនាំដោយលោក ជួប សីហា ម្តងនេះ បានឈានដល់ការប្រើវិធានការណ៍ក្ដៅហើយ នាល្ងាចថ្ងៃទី១៦ ខែធ្នូ ឆ្នាំ២០១៩នេះ…
ខេត្តព្រះសីហនុ ៖ មន្ត្រីសាលាក្រុងដឹកនាំដោយលោក ជួប សីហា ម្តងនេះ បានឈានដល់ការប្រើវិធានការណ៍ក្ដៅហើយ នាល្ងាចថ្ងៃទី១៦ ខែធ្នូ ឆ្នាំ២០១៩នេះ បន្ទាប់ពីបងប្អូនប្រជាពលរដ្ឋ និងអាជីវករមួយចំនួនតូច នៅតំបន់ទំនប់រលកភូមិ១ សង្កាត់លេខ១ក្រុង/ខេត្តព្រះសីហនុ (ទំនប់រលក) នៅតែមិនគោរពច្បាប់ ដដែលជាដដែល បើទោះមានការព្រមានជាច្រើនលើកច្រើនសា និងធ្វើកំណត់ហេតុយ៉ាងណាក្តី។
លោក ជួប សីហា ជាមន្ត្រីសាលាក្រុង ក្នុងការចុះអនុវត្ត បានគូសបញ្ជាក់ថា ចាប់ពីថ្ងៃនេះតទៅ កម្លាំងជំនាញរបស់គណៈបញ្ជាការឯកភាពក្រុង នឹងចុះល្បាតគ្រប់ពេលវេលា មិនបណ្តោយឱ្យបងប្អូនអាជីវករធ្វើអ្វីប្រាស់ចាកអំពីច្បាប់តទៅទៀតបាននោះទេ បើទោះបីជាមានការតវ៉ា និងអន្តរាគមន៍យ៉ាងណាក៏ដោយ។
លោក ជួប សីហា បានបញ្ជាក់បន្តថា កន្លងមក មានប្រជាពលរដ្ឋមួយចំនួនដែលមានលំនៅដ្ឋាននៅតំបន់ទំនប់រលកភូមិ១ សង្កាត់លេខ១ ក្រុង/ខេត្តព្រះសីហនុ បានយកចំណីផ្លូវសាធារណៈធ្វើជាសម្បត្តិផ្ទាល់ខ្លួនដើម្បីដាក់សម្ភារៈសំណង់ និងគំនរអេតចាយដែលប្រកបអាជីវកម្មប្រចាំថ្ងៃ ហើយក្នុងការដាក់សម្ភារៈខាងលើនេះ បណ្ដាលឱ្យប៉ះពាល់ដល់ផ្លូវសាធារណៈ និងប៉ះពាល់ដល់អ្នកធ្វើដំណើរតាមដងផ្លូវ។
លោក ជួប សីហា បានបញ្ជាក់បន្តទៀតថា ដោយហេតុដូចនេះ មន្ត្រីសាលាក្រុងព្រះសីហនុ និងគណៈបញ្ជាការឯកភាពក្រុង រួមជាមួយមន្ត្រីបរិស្ថាន និងមន្ត្រីគមនាគមន៍សាធារណការ និងដឹកជញ្ជូន បានប្រើវិធានការណ៍ក្ដៅក្នុងការចុះរុះរើឈូសឆាយសម្ភារៈដាក់លើផ្លូវសាធារណៈ ។
លោក ជួប សីហា បន្តទៀតថា មុនការប្រើវិធានការណ៍នេះ អាជ្ញាធរក្រុងបានចុះណែនាំ និងធ្វើកិច្ចសន្យាជាច្រើនលើកច្រើនសាមកហើយ ឲ្យបងប្អូនប្រជាពលរដ្ឋដែលយកសម្ភារៈដាក់លើផ្លូវសាធារណៈរើចេញ ។
តែមកដល់រសៀលថ្ងៃទី១៦ ខែធ្នូ ឆ្នាំ២០១៩នេះ ប្រជាពលរដ្ឋដែលរស់នៅតំបន់ខាងលើនេះ មិនគោរពតាមការណែនាំ និងធ្វើតាមកិច្ចសន្យាដែលខ្លួនយល់ព្រម ដូច្នេះក៏មន្ត្រីសាលាក្រុងព្រះសីហនុ បានប្រើវិធានការណ៍ធ្វើការរុះរើឈូសឆាយសម្ភារៈចេញពីផ្លូវសាធារណៈតែម្ដង ដោយការចុះអនុវត្តវិធានការខាងលើនេះ គឺដើម្បីរៀបចំសណ្ដាប់ធ្នាប់ផ្លូវសាធារណៈឲ្យមានសោភ័ណភាព ដែលក្រុងព្រះសីហនុកន្លងមក មានឈ្មោះរំដួលបីទង។ (កែសម្រួលដោយ ៖ បុប្ផា)
ចែករំលែកព័តមាននេះ