រាជធានីភ្នំពេញ ៖ បន្ទាប់ពីមានការថ្កោលទោសយ៉ាងខ្លាំងពីសំណាក់ប្រធានសមាគមទីភ្នាក់ងារទេសចរណ៍កម្ពុជា ចំពោះជនបរទេសម្នាក់ដែលមកដល់កម្ពុជាហើយបង្ហោះវីដេអូរិះគន់កម្ពុជា ដោយបំភ័យភ្ញៀវទេសចរកុំឲ្យមកលេងកម្ពុជានោះ នៅពេលនេះលោក Uriah Lyford ជាគ្រូបង្រៀនស្ម័គ្រចិត្តជនជាតិអាមេរិកមួយរូប ដែលស្រឡាញ់កម្ពុជា…
រាជធានីភ្នំពេញ ៖ បន្ទាប់ពីមានការថ្កោលទោសយ៉ាងខ្លាំងពីសំណាក់ប្រធានសមាគមទីភ្នាក់ងារទេសចរណ៍កម្ពុជា ចំពោះជនបរទេសម្នាក់ដែលមកដល់កម្ពុជាហើយបង្ហោះវីដេអូរិះគន់កម្ពុជា ដោយបំភ័យភ្ញៀវទេសចរកុំឲ្យមកលេងកម្ពុជានោះ នៅពេលនេះលោក Uriah Lyford ជាគ្រូបង្រៀនស្ម័គ្រចិត្តជនជាតិអាមេរិកមួយរូប ដែលស្រឡាញ់កម្ពុជា បានចេញវីដេអូប្រតិកម្មខ្លាំងៗទៅលើបុរសជាជនបរទេសរូបនោះ និងស្នើឲ្យសមត្ថកិច្ចប្រមូលភ័ស្តុតាង ដើម្បីប្តឹងបុរសជនបរទេសល្មោភតណ្ហារូបនោះ ។
តាមវីដេអូរបស់លោក Uriah Lyford នោះ ជនបរទេសដែលមកដល់រាជធានីភ្នំពេញហើយរិះគន់កម្ពុជា ព្រោះរកនារីបម្រើកាមតណ្ហាមិនបានជាជនជាតិអុីរ៉ង់ និងកំពុងរស់នៅប្រទេសហូឡង់ ។មូលហេតុដែលជនបរទេសរូបនេះ បង្ហោះវីដេអូថា«កុំមកកម្ពុជា» គឺដោយសារតែរូបគេរកស្ត្រីខ្មែរសម្រាប់បោកប្រាស់មិនបាន ខណៈដែលរូបគេធ្លាប់បានបោកនារីជនជាតិហ្វ៊ីលីពីន និងថៃជាច្រើននាក់ឲ្យដេកជាមួយគេរួចហើយនោះ ។
តាមរយៈវីដេអូនេះលោក យូរ៉ាយ បានកោតសរសើរនារីខ្មែរ ដែលអត់បានចាញ់ល្បិចរបស់ជនបរទេសរូបនោះ ព្រោះនៅកម្ពុជាមិនអនុញ្ញាតឲ្យមាន សេវាទេសចរណ៍ផ្លូវភេទ ដូចប្រទេសដទៃនោះទេ ។ ជាមួយគ្នានេះ លោក Uriah Lyford ក៏បានស្នើឲ្យអាជ្ញាធរមានសមត្ថកិច្ច ចាត់វិធានការចំពោះបុគ្គលម្នាក់នោះ និងស្វែងរកភ័ស្តុតាងបន្ថែមទៀត ដើម្បីចាត់វិធានការតាមផ្លូវច្បាប់ កុំឲ្យបុគ្គលនោះដើរប្រព្រឹត្តអំពើខុសឆ្គងបែបនេះទៀត។លោក Uriah Lyford និយាយថា «ប្រសិនបើបរទេសមកកម្ពុជា ដើម្បីមកលេង មកទស្សនាអង្គរ មកភ្លក្សម្ហូបខ្មែរឆ្ងាញ់ប៉ុនណា OK ! សូមស្វាគមន៍ ។ ប៉ុន្តែប្រសិនបើបរទេសណាម្នាក់មកដើម្បីរំលោភបំពាននារីៗខ្មែរ ឬរកទេសចរណ៍ផ្លូវភេទ យើងមិនចង់បានទេ» ។
សូមជម្រាបថា កាលពីថ្ងៃទី១៥ ខែធ្នូ ឆ្នាំ២០១៩ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានចេញមកធ្វើការថ្កោលទោសយ៉ាងខ្លាំងចំពោះជនបរទេសរូបនោះ និងចាត់ទុកថាទង្វើរបស់ជនបរទេសរូបនោះ ព្រោះតែស្វែងរកសេវាបម្រើតណ្ហាផ្លូវភេទ មិនបានទើបធ្វើបែបនេះ ។
ជាមួយគ្នានេះ លោកស្រី ស៊ីវលីន បានស្នើឲ្យស្ថាប័នមានសមត្ថកិច្ចតាមរកជនបរទេសរូបនោះ មកឲ្យសូមទោសប្រជាជនខ្មែរទូទាំងប្រទេស និងព្រមានផ្ញើរូបថតបុគ្គលនោះ ទៅបណ្តាប្រទេសអាស៊ាន កុំអនុញ្ញាតឲ្យជនបរទេសរូបនោះចូលប្រទេសគេឲ្យសោះ ។
លោកស្រីប្រធានសមាគមរូបនេះ បានលើកឡើងថា «ខ្ញុំសូមឲ្យស្ថាប័នមានសមត្ថកិច្ចតាមរកអត្តសញ្ញាណបុគ្គលម្នាក់នេះ ឲ្យធ្វើការសុំទោសពលរដ្ឋកម្ពុជាទូទាំងប្រទេស ។ ខ្ញុំនឹងបញ្ជូនរូបភាពបគ្គលនេះទៅដល់ប្រទេសនៅក្នុងអាស៊ាន ដើម្បីឲ្យគេមានការប្រុងប្រយ័ត្ន ក្នុងការអនុញ្ញាតឲ្យចូលក្នុងប្រទេសដ៏មានកិត្តិយសរបស់គេ» ។
រាជរដ្ឋាភិបាលកម្ពុជានឹងចាត់វិធានការតាមផ្លូវច្បាប់ចំពោះជនបរទេសរូបនេះ
លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងនៅថ្ងៃទី១៦ ខែធ្នូថា បន្ទាប់ពីមានបុរសជនជាតិបរទេសបានបង្ហោះវីដេអូកុំឲ្យភ្ញៀវបរទេសមកលេងកម្ពុជា ដែលប៉ះពាល់ដល់កិត្តិយស និងគោលដៅទេសចរណ៍កម្ពុជា ក្រសួងទេសចរណ៍ដែលជាសេនាធិការរបស់រាជរដ្ឋាភិបាល បានបើកកិច្ចប្រជុំបន្ទាន់មួយជាមួយអគ្គនាយកដ្ឋានអន្តោប្រវេសន៍ ក្រសួងមហាផ្ទៃ និងក្រុមមេធាវីផងដែរ ដើម្បីរកវិធីចាត់ការចំពោះជនបរទេសដ៏គម្រក់ម្នាក់នោះ ។
ក្រៅពីចាត់វិធានការលើជនបរទេសរូបនោះ ក្រសួងទេសចរណ៍ គ្រោងនឹងដាក់ពាក្យបណ្តឹងទៅកាន់ក្រុមហ៊ុន Google និងក្រុមហ៊ុន ហ្វេសបុ៊ក ដើម្បីស្នើសុំឲ្យលុបវីដេអូនោះចោល ព្រោះតែការបរិហារក្នុងវីដេអូនោះមិនមែនជាការពិត ។ លោករដ្ឋមន្ត្រី បានថ្លែងយ៉ាងដូច្នេះថា «ក្រសួងទេសចរណ៍ បានសម្រេចស្នើទៅក្រសួងមហាផ្ទៃ ដើម្បីបិទទិដ្ឋាការជនបរទេសរូបនោះ មិនឲ្យចូលមកកម្ពុជាជាអចិន្ត្រៃយ៍តែម្តង ដែលអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានឯកភាពតាមសំណើរបស់ក្រសួងហើយ។
មួយវិញទៀត ក្រសួងទេសចរណ៍នឹងដាក់ពាក្យបណ្តឹងទៅក្រុមហ៊ុន Google និងហ្វេសបុ៊ក ដើម្បីស្នើសុំឲ្យលុបវីដេអូដែលជនបរទេសរូបនោះបានបង្ហោះ» ។ លោករដ្ឋមន្ត្រី ថោង ខុន បានបញ្ជាក់ថា«ចំពោះវីដេអូរបស់ជនបរទេសរូបនោះ ក្រសួងទេសចរណ៍នឹងរៀបចំសំណើទៅកាន់ក្រសួងការបរទេសនិងហសប្រតិបត្តិការអន្តរជាតិ ដើម្បីចាត់ការលើជនបរទេសដ៏គម្រក់រូបនោះបន្ថែមទៀត» ។
លោករដ្ឋមន្ត្រីបានបញ្ជាក់បន្ថែមថា ការចាត់វិធានការលើជនបរទេសរូបនោះ ធ្វើឡើងស្របតាមច្បាប់ស្តីពីទេសចរណ៍ មាត្រា៥០ និងមាត្រា៦៨ ពាក់ព័ន្ធនឹងវិស័យទេសចរណ៍នៅកម្ពុជា ក្នុងនោះអគ្គនាយករងនៃអគ្គនាយកដ្ឋាន អន្តោប្រវេសន៍ ដែលបានចូលរួមក្នុងកិច្ចប្រជុំក៏បានអះអាងថា ទង្វើរបស់ជនបរទេសរូបនោះក៏ល្មើសនឹងច្បាប់របស់កម្ពុជាស្តីពីការគ្រប់គ្រងជនបរទេសមិនមែនអន្តោប្រវេសន៍ដែរ ។ ដូច្នេះរាជរដ្ឋាភិបាលអាចនឹងចាត់វិធានការតាមផ្លូវច្បាប់ និងបិទទិដ្ឋាការជនបរទេសរូបនោះ មិនឲ្យចូលមកកម្ពុជាជាអចិន្ត្រៃយ៍តែម្តង ៕
ចែករំលែកព័តមាននេះ