ADផ្ទាំងផ្សព្វផ្សាយពាណិជ្ជកម្ម

មហាសេដ្ឋីក្រុមហ៊ុន Tesla ប្រាប់ពីវិធីបង្កើតផលិតផលជួយឲ្យក្លាយជាអ្នកមាន

4 ឆ្នាំ មុន

១៧ ខែ ធ្នូ ឆ្នាំ ២០១៩ ម៉ោង ០៩:២៦

លោកមហាសេដ្ឋី អ៊ីឡុន ម៉ាស់ (Elon Musk) ចំណាយពេលអស់តែ ១០ឆ្នាំប៉ុណ្ណោះក្នុងការធ្វើឲ្យក្រុមហ៊ុន Tesla ដ៏តូចថ្មីរបស់លោកក្លាយទៅជាក្រុមហ៊ុនដែលស្ថិតក្នុងចំណោមក្រុមហ៊ុនផលិតយានយន្តមានតម្លៃខ្ពស់ជាងគេលើពិភពលោក ។ ហើយកត្តាមួយដែលជួយឲ្យលោកជោគជ័យគឺមកពីលោក និងក្រុមការងាររបស់លោកមានជំនាញច្បាស់លាស់ក្នុងការបង្កើតផលិតផលដែលអតិថិជនស្រលាញ់ចូលចិត្ត ។

អតិថិជនរបស់ក្រុមហ៊ុន Tesla មិនត្រឹមតែចូលចិត្តរថយន្តរបស់ពួកគេទេ តែស្រលាញ់ងប់ងល់នឹងវាតែម្តង ហើយពួកគេពូកែខាងផ្នែកចែករំលែកក្តីស្រលាញ់នេះទៅកាន់មិត្តភក្តិនិងបងប្អូនទាំងអស់លើប្រព័ន្ធសង្គម ។ ដោយហេតុដូចនេះទើបធ្វើឲ្យលោក ម៉ាស់ ខ្លួនគាត់ផ្ទាល់អះអាងថា Tesla មិនមានផ្នែកផ្សាយពាណិជ្ជកម្មប្រចាំក្រុមហ៊ុនផង ។

ក្នុងពេលថ្មីៗនេះ លោក ម៉ាស់ បានប្រកាសបង្ហាញពីរថយន្តបែប Pick-Up មួយដែលមានឈ្មោះថា Cybertruck ។ វាជារថយន្តដែលមានរូបរាងដូចរថយន្តមកពីអនាគតកាល ហើយមនុស្សជាច្រើនគិតថាវានឹងបរាជ័យព្រោះវាមានរូបរាងអាក្រក់ខ្លាំង ។ លើសពីនេះទៅទៀត បន្ទាប់ពីលោក ម៉ាស់ អួតអាងលើឆាកថាកញ្ចក់របស់រថយន្តជាកញ្ចក់រឹងមាំមិនងាយប្រេះស្រាំ បុគ្គលិកម្នាក់របស់លោកបែរជាធ្វើឲ្យវាបែកលើឆាកទៅវិញ ។

អ្វីដែលគួរឲ្យភ្ញាក់ផ្អើលនោះគឺ មួយសប្តាហ៍ក្រោយមកមានមនុស្សប្រមាណ ២៥ម៉ឺននាក់ទៅហើយដែលបានកក់លុយរាប់រយដុល្លារដើម្បីទិញវា ។ បន្ទាប់មក លោក ម៉ាស់ បាននិយាយក្នុងបទសម្ភាសមួយក្នុងពេលថ្មីៗនេះថា ជាទូទៅមនុស្សតែងតែព្យាយាមបង្កើតផលិតផលដែលពួកគេគិតថាអ្នកដទៃនឹងស្រលាញ់ចូលចិត្តទាំងខ្លួនឯងស្អប់វាទាំងស្រុង ។ បើអ្នកមិនស្រលាញ់ចូលចិត្តផលិតផលដែលអ្នកបង្កើតទេ អ្នកមិនគួររំពឹងថាអ្នកដទៃនឹងស្រលាញ់ចូលចិត្តវាឡើយ ។

វាជាមេរៀនដ៏មានតម្លៃមួយសម្រាប់អាជីវករគ្រប់ៗរូប ។ ប្រសិនបើអ្នកជឿជាក់លើអ្វីមួយដោយពិតប្រាកដនោះ អ្នកនឹងមានចិត្តខិតខំប្រឹងប្រែងធ្វើវាឲ្យកាន់តែជោគជ័យដោយស្វ័យប្រវត្តិ ហើយអ្នកក៏នឹងជំរុញទឹកចិត្តរបស់អ្នកនៅជុំវិញខ្លួនដែលមានគំនិតដូចអ្នកដែរ ។ ផ្ទុយមកវិញ បើអ្នកមិនជឿជាក់លើវាទេ គ្មាននរណានឹងជឿជាក់លើវាឡើយ ។

កត្តាបន្ទាប់គឺទាក់ទិននឹងការមើលររំលងអ្វីដែលអតិថិជនអាចនឹងចង់បាន ហើយផ្តល់នូវអ្វីដែលពួកគេមិនដែលគិតថាខ្លួនត្រូវការ តែនៅពេលដែលពួកគេមើលឃើញវា ពួកគេស្រលាញ់ចង់បានវាភ្លាមៗ ។ វាប្រៀបបានដូចជាប្រសាសន៍របស់លោក ស្ទីវ ចបស៏ (Steve Jobs) របស់ Apple ដែរ ដែលបាននិយាយថា «មនុស្សមិនដឹងពីអ្វីដែលពួកគេចង់បានឡើយលុះត្រាតែអ្នកបង្ហាញវាទៅពួកគេ» ។ដូច្នេះបើអ្នកកំពុងចង់រក ឬបង្កើតផលិតផលថ្មីមួយ អ្នកមិនគួរភ្លេចពីអតិថិជនទេ ។ លើសពីនេះទៅទៀត អ្នកគួរផ្តោតស្មារតីលើអ្វីដែលអ្នកស្រលាញ់ និងជឿជាក់ពិតប្រាកដ ៕ កែសម្រួលដោយ ៖ សុឃាក់