រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ក្មេងប្រុសជំទង់អាយុ១៧ឆ្នាំម្នាក់ ក្លាយទៅជាអ្នកបើកបររថយន្តកុងតឺន័រទាំងមិនទាន់គ្រប់អាយុនៅឡើយ ថែមទាំងធ្វើសកម្មភាពលួចដោះផ្តាច់ប្រព័ន្ធតាមដាន GPS ចេញពីរថយន្តដែលខ្លួនបើក ក្នុងបំណងលួចយកក្បាលរថយន្តកុងតឺន័រទៅលក់ ហើយត្រូវមេការផ្នែកបញ្ជារថយន្ត…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ក្មេងប្រុសជំទង់អាយុ១៧ឆ្នាំម្នាក់ ក្លាយទៅជាអ្នកបើកបររថយន្តកុងតឺន័រទាំងមិនទាន់គ្រប់អាយុនៅឡើយ ថែមទាំងធ្វើសកម្មភាពលួចដោះផ្តាច់ប្រព័ន្ធតាមដាន GPS ចេញពីរថយន្តដែលខ្លួនបើក ក្នុងបំណងលួចយកក្បាលរថយន្តកុងតឺន័រទៅលក់ ហើយត្រូវមេការផ្នែកបញ្ជារថយន្ត និងត្រួតពិនិត្យប្រព័ន្ធ GPS បានធ្វើការឃាត់ខ្លួនប្រគល់ជូននគរបាលប៉ុស្តិ៍ត្រពាំងក្រសាំង ដើម្បីធ្វើការសាកសួរ និងចាត់ការតាមនីតិវិធីច្បាប់។
ការចាប់ខ្លួនអ្នកបើកបររថយន្តវ័យក្មេងអាយុក្រោម១៨ឆ្នាំរូបនោះបានធ្វើឡើងកាលពីម៉ោង៧ព្រឹក ថ្ងៃទី១២ ខែធ្នូ ឆ្នាំ២០១៩ នៅក្នុងក្រុមហ៊ុន «ផែស្ងួតមីង ឡាំង» ដែលមានទីតាំងស្ថិតនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ។
តាមរបាយការណ៍របស់នគរបាលបញ្ជាក់ថា ក្មេងប្រុសជំទង់រូបនេះឈ្មោះកាន់ សុខធា អាយុ១៧ឆ្នាំ មុខរបរបើកបររថយន្តកុងតឺន័រ ស្នាក់នៅក្នុងផែស្ងួតខាងលើ ចំណែកតំណាងក្រុមហ៊ុនដែលជាអ្នកចេញមុខដាក់ពាក្យបណ្ដឹងឲ្យនគរបាលជួយចាត់ការលើក្មេងប្រុសរូបនេះឈ្មោះ ថ្លាង ចិន្ដា ភេទស្រី អាយុ២៧ឆ្នាំ មុខរបរប្រធានរដ្ឋបាលក្រុមហ៊ុនផែស្ងួតមីងឡាំង នោះ។
តាមប្រភពព័ត៌មានបានឲ្យដឹងថា កាលពីម៉ោង៦ល្ងាច ថ្ងៃទី១១ ខែធ្នូ យុវជនរូបនេះបានបើករថយន្តសណ្ដោងកន្ទុយរ៉ឺម៉កដឹកទូកុងតឺន័រ១គ្រឿង ពាក់ស្លាកលេខភ្នំពេញ 3C-0888 ធ្វើដំណើរចេញពីក្រុមហ៊ុនផែស្ងួត ទៅកាន់ផ្លូវជាតិលេខ៣ លុះពេលទៅដល់ត្រង់ចំណុចគីឡូម៉ែត្រលេខ៣៤ បានឈប់រថយន្ត បន្ទាប់មកបានដោះកន្ទុយរ៉ឺម៉កកុងតឺន័រចោល រួចហើយបានធ្វើសកម្មភាពដោះប្រព័ន្ធ GPS ចេញពីរថយន្ត ក្នុងបំណងលួចយកក្បាលរថយន្តនោះលក់។
ប្រភពដដែលបន្តថា ប៉ុន្តែសកម្មភាពខាងលើ មិនបានសម្រេចឡើយ ដោយសារតែមេការផ្នែកបញ្ជារថយន្ត និងត្រួតពិនិត្យប្រព័ន្ធ GPS មានការសង្ស័យ ព្រោះតែរថយន្តនេះ បានបាត់ចេញពីប្រព័ន្ធតាមដានរបស់ក្រុមហ៊ុន។ ពេលនោះមេការខាងលើ ក៏ទូរស័ព្ទហៅឲ្យអ្នកបើកបររូបនេះ បើករថយន្តខាងលើត្រឡប់មកកាន់ក្រុមហ៊ុនវិញជាបន្ទាន់ ដើម្បីធ្វើការត្រួតពិនិត្យឡើងវិញ។
ប្រភពដដែលបន្តទៀតថា លុះរហូតដល់ម៉ោង៩យប់ថ្ងៃដដែល ទើបក្មេងប្រុសជំទង់រូបនេះបើកយកតែក្បាលរថយន្តនេះចូលដល់ក្នុងក្រុមហ៊ុន ដោយមិនបានសណ្ដោងយកកន្ទុយរ៉ឺម៉ក និងទូកុងតឺន័រមកជាមួយឡើយ។ ប៉ុន្តែខណៈមកដល់ក្នុងផែស្ងួតភ្លាម ខាងមេការមិនបានពិនិត្យទាំងយប់នោះឡើយ បន្ទាប់មកក្មេងប្រុសនេះ បានដេកនៅក្នុងរថយន្តនោះរហូតដល់ម៉ោង៧ព្រឹក ថ្ងៃទី១២ ខែធ្នូ ទើបមេការរូបនោះ និងបុគ្គលិកផ្នែកប្រព័ន្ធ GPS ធ្វើការត្រួតពិនិត្យឃើញមានការដោះ GPS ចេញពីរថយន្ត ក៏បានសាកសួរដេញដោល ទើបដឹងថា ជននេះជាអ្នកដោះ ដើម្បីលួចរថយន្តទៅលក់ក៏ចាប់ខ្លួនប្រគល់ជូននគរបាលចាត់ការតាមច្បាប់តែម្ដង៕ (កែសម្រួលដោយ ៖ បុប្ផា)
ចែករំលែកព័តមាននេះ