ខេត្តកំពង់ឆ្នាំង ៖ លោកអ៊ុន សំអុល ប្រធានគណៈកម្មាធិកាសាខាកាកបាទក្រហមកម្ពុជាខេត្ត កាលពីរសៀលថៃ្ងទី០២ មិថុនា ២០១៤ បានដឹកនាំសមាជិកសមាជិកាសាខានាំយកនូវអំណោយមនុស្សធម៌របស់សាខាកាកបាទក្រហមកម្ពុជាខេត្ត ទៅចែកជូនដោយផ្ទាល់ដៃដល់គ្រួសារប្រជាពលរដ្ឋដែលរងគ្រោះដោយសារខ្យល់ព្យុះកន្រ្តាក់នៅឃុំអញ្ចាញរូង ស្រុកបរិបូណ៌ ខេត្តកំពង់ឆ្នាំង ។
លោកប្រាក់ សោភ័ណ្ឌ នាយកប្រតិបត្តិសាខាកាកបាទក្រហមខេត្តកំពង់ឆ្នាំងបានឱ្យដឹងថា អំណោយរបស់សាខាកាកបាទក្រហមខេត្ត ដែលត្រូវប្រគល់ជូនដល់ជនរងគ្រោះ មានស្បៀងអាហារ និងសម្ភារប្រើប្រាស់ ដែលក្នុងមួយគ្រួសារទទួលបានអង្ករ២៥Kg ឃីត១កញ្ចប់ (មុង១ ភួយ១ ក្រមា១ និងសារុង១) ។ ចំណែក២គ្រួសារផ្ទះរលំបាក់ដល់ដីទទួលបានកៅស៊ូតង់មួយបន្ថែមទៀត និងប៉ុស្តិ៍រដ្ឋបាលទទួលបានតង់១ផងដែរ ។
លោកស្រីឡុញ ពិសាល សមាជិកសាខាកាកបាទក្រហមខេត្តបានឧត្ថម្ភដល់កុមារីដែលផ្ទះរលំនូវថវិកាចំនួន៥ម៉ឺនរៀល, កាបូបសិស្ស១, សៀវភៅ១០ក្បាល, ប៊ិច ដៃ ខ្មៅដៃ១៣ដើម និងអាវសសិស្សចំនួន៣, ។ ចំណែកលោកលៀង ជុំសុបិន្ត នាយកទីចាត់ការរដ្ឋបាលសាលាខេត្តបានឧបត្ថម្ភសៀវភៅ១២ក្បាល ប៊ិច១០ដើមផងដែរ ។
ចែករំលែកព័តមាននេះ