ខេត្តកែប ៖ ប្រជាពលរដ្ឋនៅក្នុងភូមិអង្កោលជាភូមិសាស្ត្រជាប់នឹងឆ្នេរសមុទ្រខេត្តកែប បានសម្តែងក្តីសប្បាយរីករាយអបអរសាទរដល់អាជ្ញាធរខេត្ត និងស្រុកដែលស្ថាបនាផ្លូវក្រាលក្រួសក្រហមប្រវែង២គីឡូម៉ែត្រកន្លះ ដោយ.តភ្ជាប់ពីផ្លូវក្រវាត់ឆ្នេរសមុទ្រទៅភ្ជាប់នឹងផ្លូវទៅដល់ច្រកទ្វារអន្តរជាតិព្រែកចាក ក្នុងស្រុកកំពង់ត្រាច ខេត្តកំពត។
ការស្ថាបនាផ្លូវតាមឆ្នេរសមុទ្រដែលធ្លាប់មានជម្លោះជាមួយម្ចាស់ដីធ្វើទៅមុខមិនដល់គោលដៅនោះត្រូវបានផ្អាកទុកចោលជាយូរឆ្នាំមកហើយ ប៉ុន្តែនៅដើមខែធ្នូ ឆ្នាំ២០១៩នេះ អាជ្ញាធរខំប្រឹងប្រែងដោះស្រាយរឿងវិវាទផ្សេងៗដែលជាប់គាំងអាចនឹងបន្តធ្វើផ្លូវទៅតភ្ជាប់ដល់ច្រកទ្វារព្រំដែនអន្តរជាតិព្រែកចាកបានដោយជោគជ័យ។
ប្រជាពលរដ្ឋម្នាក់ឈ្មោះយឹម សារ៉ែន ភេទប្រុស អាយុ៦៥ឆ្នាំ រស់នៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប បាននិយាយថា ប្រជាពលរដ្ឋដែលរស់នៅក្នុងភូមិជាប់សមុទ្រនេះមានការសប្បាយរីករាយណាស់ ដោយបានផ្លូវថ្មីធ្វើដំណើរឆ្លងកាត់ទៅមកបានស្រួល។
លោក យឹម សារែន បានបន្តថា ពីមុនមានតែភ្លឺស្រែទេ បើពេលភ្លៀងវិញធ្វើដំណើរមិនរួចទាល់តែសោះ តែងាកម្ខាងគឺចុះសមុទ្រហើយ ។ លោកបានអគុណដល់អាជ្ញាធរខេត្តនិងស្រុកដែលគិតគូរធ្វើផ្លូ វជូនដល់ប្រជាពលរដ្ឋងាយស្រួលធ្វើដំណើរចេញចូលតាមឆ្នេរសមុទ្រទៅក្រុងកែបក៏បាន ទៅច្រកទ្វារព្រំដែនប្រទេសវៀតណាមក៏បាន។
លោកស្រីគឹម ចន្នី អភិបាលស្រុកដំណាក់ចង្អើរ បានប្រាប់ឱ្យដឹងកាលពីព្រឹកថ្ងៃទី១២ ខែធ្នូ ថា ទោះបីមានការរាំងស្ទះខ្លះៗក៏ដោយ ក៏អាជ្ញាធរថ្នាក់ខេត្តនិងស្រុកខិតខំរកដំណោះស្រាយធ្វើផ្លូវជូនដល់ប្រជាពលរដ្ឋអោយខាងតែបាន ។
លោកស្រីអភិបាលស្រុកដំណាក់ចង្អើរបានមានប្រសាសន៍ថា ការធ្វើផ្លូវតាមឆ្នេរសមុទ្រតភ្ជាប់ផ្លូវទៅកាន់ច្រកទ្វារព្រំដែនអន្តរជាតិនេះមានសារៈសំខាន់ណាស់គឺទី១-ប្រជាពលរដ្ឋជាច្រើនគ្រួសារបានផ្លូវល្អងាយស្រួលធ្វើដំណើរ និងម្យ៉ាងមួយទៀត ទាក់ទាញភ្ញៀវទេសចរជាតិនិងអន្តរជាតិអាចនឹងមកលំហែកាយតាមឆ្នេរនេះបានដោយមិនខ្លាចព្រួយបារម្ភពីផ្លូវលំបាកដូចពេលមុនៗឡើយ។
លោកស្រីអភិបាលស្រុកដំណាក់ចង្អើរបានឱ្យដឹងទៀតថា ផ្លូវដែលធ្វើមួយខ្សែនេះប្រវែង២គីឡូម៉ែត្រកន្លះ និងទទឹង៤ម៉ែត្រ ហើយលោកស្រីបានថ្លែងអំណរគុណដល់ប្រជាពលរដ្ឋដែលបានជួយសម្រួលដល់អាជ្ញាធរខេត្ត-ស្រុកឈូសឆាយផ្លូវហើយមានផលប៉ះពាល់មិនយកសំណង ៕ (កែសម្រួលដោយ ៖ ធីតា)
ចែករំលែកព័តមាននេះ