រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានរំពឹងទុកថា នៅឆ្នាំ២០២០ខាងមុខទំហំពាណិជ្ជកម្មរវាងប្រទេសកម្ពុជា និងវៀតណាម ឈានដល់ជាង៥ពាន់លានដុល្លារ ។ យោងតាមគេហទំព័រហ្វេសប៊ុករបស់សម្ដេចតេជោបានឲ្យដឹងថា ក្នុងជំនួបពិភាក្សាការងារជាមួយលោក ជឿង ហ័រប៊ិញ ឧបនាយករដ្ឋមន្ត្រី ប្រចាំការវៀតណាម នៅថ្ងៃទី១៣ ខែធ្នូនេះ នៅវិមានសន្តិភាព ។
សម្ដេចតេជោ ហ៊ុន សែន ថ្លែងថា «ពាក់ព័ន្ធទៅនឹងវិស័យពាណិជ្ជកម្មរវាងប្រទេសទាំងពីរដែលបានកំណត់កម្រិត៥ពាន់លានដុល្លារ ឆ្នាំ២០២០ ។ ការពិតទំហំពាណិជ្ជកម្មរវាងប្រទេសទាំងពីរ គឺអាចធំជាង៥ពាន់លានដុល្លាររួចទៅហើយព្រោះថា ទំហំពាណិជ្ជកម្មដែលមាននៅក្នុងបញ្ជីមានតួលេខផ្សេង យើងក៏មានទំហំពាណិជ្ជកម្មដែលមិនមានចុះនៅក្នុងបញ្ជីដូចជា ការនាំស្រូវទៅវៀតណាមជាដើម ដែលពុំមានការកត់ត្រានៅក្នុងបញ្ជី» ។
ឆ្លៀតឱកាសនោះដែរសម្តេចតេជោនាយករដ្ឋមន្ដ្រីកម្ពុជាលើកឡើងថា នៅឆ្នាំ២០២០ខាងមុខកម្ពុជានឹងទទួលធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប ដូច្នេះកម្ពុជា-វៀតណាម សហការគ្នារួមគ្នាគាំទ្រទៅវិញទៅមកទាំងនៅកិច្ចប្រជុំនៅវៀតណាម និងកិច្ចប្រជុំនៅកម្ពុជា ដើម្បីទទួលបាននូវភាពជោគជ័យឲ្យកិច្ចសហប្រតិបត្តិការនៃប្រទេសទាំងពីរបានរីកចម្រើនឡើងថែមទៀត ។
ចំណែក លោក ជឿង ហ័រប៊ិញ បានឲ្យដឹងថា វៀតណាមនឹងធ្វើជាម្ចាស់ផ្ទះនៃកិច្ចប្រជុំអាស៊ាន នៅឆ្នាំ២០២០ ហើយនឹងក្លាយទៅជាសមាជិកមិនអចិន្ត្រៃយ៍នៅអង្គការសហប្រជាជាតិផងដែរ ។ ក្នុងន័យនេះលោកស្នើសុំឲ្យកម្ពុជាគាំទ្រ និងសហការគ្នាធ្វើយ៉ាងណាឲ្យកិច្ចសហប្រតិបត្តិការរវាងប្រទេសទាំងពីរកាន់តែមានការរីកចម្រើនខ្លាំងឡើងថែមទៀត ។ លោកក៏បានគូសបញ្ជាក់ផងដែរថា សេដ្ឋកិច្ចវៀតណាមនៅពេលនេះមានការកើនឡើងប្រមាណ៧ភាគរយ ហើយអតិផរណាទាបមានប្រមាណតែ២ភាគរយប៉ុណ្ណោះ ។
ក្នុងជំនួបនោះដែរលោក ជឿង ហ័រប៊ិញ ក៏បានសំដែងនូវការរីករាយជាមួយនឹងទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងវៀតណាមលើគ្រប់វិស័យជាពិសេសលើវិស័យការពារជាតិលើវិស័យសន្តិសុខសណ្តាប់ធ្នាប់តាមព្រំដែនវិស័យសេដ្ឋកិច្ចក៏ដូចជា វិស័យពាណិជ្ជកម្មផងដែរ ៕
ចែករំលែកព័តមាននេះ