រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានបានបញ្ជាក់ថា នៅពេលនេះរាជរដ្ឋាភិបាលយើងមានថវិកាជាសាច់ប្រាក់ប្រមាណ៣,៥០០លានដុល្លារ ដែលអាចប្រើប្រាស់បានភ្លាមៗ ដែលមិនបានរួមបញ្ចូលពីទុនបម្រុងអន្តរជាតិប្រមាណ១៥ពាន់លានដុល្លារ និងមាសប្រមាណ៣០តោនទៀតផង ។
សម្តេចបានសំអាងថា ថវិកានេះសល់ដោយសារកំណើនសេដ្ឋកិច្ចកម្ពុជាកាន់តែរីកលូតលាស់ក្រោមដំបូលសន្តិភាព ។ សម្តេចបានលើកឡើងតាមបណ្តាញសង្គម កាលពីល្ងាចថ្ងៃទី១២ ធ្នូ យ៉ាងដូច្នេះថា« ច្បាស់ណាស់កត្តាសន្តិភាព គឺមានសារៈសំខាន់ខ្លាំងបំផុត ជាពិសេសសម្រាប់ប្រទេសកម្ពុជាដែលធ្លាប់បានឆ្លងកាត់សង្គ្រាម និងវិនាសកម្មនៃរបបប្រល័យពូជសាសន៍កន្លងមកដែលបានបំផ្លាញជីវិតមនុស្សរាប់លាននាក់ និងបានធ្វើឲ្យប្រទេសជាតិអន្តរាយធ្លាក់ក្រោមចំណុចសូន្យ ។
សម្តេចសង្កត់ធ្ងន់ថា«ពិតប្រាកដណាស់ មានសន្តិភាព ទើបពលរដ្ឋមានសិទ្ធិសេរីភាព មានសន្តិភាពទើបប្រទេសជាតិមានការអភិវឌ្ឍន៍រីកចម្រើនទៅបាន ។ ប្រមុខរាជរដ្ឋាភិបាលបានអះអាងថា សន្តិភាពពេញលេញជាង២០ឆ្នាំមកនេះ គឺបានផ្តល់ឱកាសឲ្យកម្ពុជាបានកសាងអភិវឌ្ឍន៍សង្គមជាតិរីកចម្រើនដល់សព្វថ្ងៃ ដែលបានធ្វើសេដ្ឋកិច្ចជាតិកាន់តែរីកលូតលាស់ជាមួយកំណើនក្នុងរង្វង់ប្រមាណ៧.១% ដែលមានអត្រាអតិផរណាត្រឹមតែ២.៥%ប៉ុណ្ណោះ ។
សម្តេចបានលើកឡើងទៀតថា គិតមកទល់ខែធ្នូ ២០១៩នេះ ចំណូលដែលបានមកពីរដ្ឋករគយ បើតាមគម្រោងផែនការកំណត់ត្រូវប្រមូលឲ្យបាន២,២៦០លានដុល្លារ ។ ប៉ុន្តែមកដល់ត្រឹមថ្ងៃទី៩ ខែធ្នូ ២០១៩ គឺយើងប្រមូលបាន៣,០១៣ លានដុល្លារ លើសផែនការប្រមាណ៧៥៨លានដុល្លារ (ស្មើនឹង៣៣.៥% ) ។ បើគិតជាមធ្យមចំណូលដែលមកពីរដ្ឋករគយ គឺប្រមូលបានប្រមាណ១០លានដុល្លារក្នុងមួយថ្ងៃៗ ។ យើងនៅសល់ជិត២០ថ្ងៃទៀតដែលមិនទាន់បានគិតបូកថែម ហើយដែលយើងរំពឹងថា ចំណូលគយ គឺនឹងកើនលើសផែនការប្រមាណជាង៨០០លានដុល្លារ ។
សម្តេចបន្ថែមថា ចំពោះចំណូលពីអគ្គពន្ធដាវិញ គឺមានផែនការប្រមូលឲ្យបានប្រមាណ ២,២៨៨ លានដុល្លារ ។ ប៉ុន្តែមកទល់ពេលនេះ គឺប្រមូលចំណូលបាន ២,៦៣៤ លានដុល្លាររួចហើយ ដែលពេលនេះបានលើសផែនការប្រមាណ៣៤៥ លានដុល្លារ ។ សរុបក្នុងច្បាប់ផែនការថវិកាពីរដ្ឋករគយ និងអគ្គពន្ធដាដែលបានដាក់ចេញ គឺមានគម្រោងប្រមូលចំណូលប្រមាណ៤,៥៤៨លានដុល្លារ ។ ប៉ុន្តែរហូតដល់ពេលនេះ គឺប្រមូលបានប្រមាណ៥,៦៥២ លានដុល្លារ ដែលប្រមូលបានលើសពីផែនការដែលបានកំណត់ប្រមាណ១,១០៤ លានដុល្លាររួចស្រេចទៅហើយ ។
បើយើងបូករួមទាំង២ខែមុន យើងអាចប៉ាន់ស្មានបានថា នឹងចំណូលលើសផែនការ គឺនឹងឈានដល់១,៣០០លានដុល្លារ ដែលជា ថវិកាដ៏ល្អបានមកពីចំណូលសារពើពន្ធហើយដែលមិនទាន់បានបូកបញ្ចូលពីចំណូលមិនមែនសារពើពន្ធមានដូចជា ចំណូលបានមកពីថ្លៃទិដ្ឋាការទេសចរណ៍ អាកាយានដ្ឋាន អាកាសចរណ៍ ប័ណ្ណចូលទស្សនាអង្គវត្ត និងពីដីកសិកម្ម(ដីសម្បទានសេដ្ឋកិច្ចដែលជួលទៅអោយឯកជនវិនិយោគ)… ៕
ចែករំលែកព័តមាននេះ