រាជធានីភ្នំពេញ៖ ប្រមុខរាជរដ្ឋាភិបាលកម្ពុជាបានអំពាវនាវដល់ម្ចាស់រោងម៉ាស៊ីនកិនស្រូវដែលទទួលទិញស្រូវពីប្រជាកសិករមេត្តាកុំទម្លាក់ថ្លៃស្រូវ ឬបង្អាប់ថ្លៃស្រូវពេលកសិករកំពុងច្រូតកាត់ ស្របពេលដែលរាជរដ្ឋាភិបាលបានបញ្ចេញថវិកាប្រមាណ ៥០ លានដុល្លារអាមេរិកសម្រាប់បម្រើក្នុងវិស័យកសិកម្ម រក្សាតម្លៃស្ថិរភាពថ្លៃក៏ដូចជាការប្រមូលទិញស្រូវពីប្រជាកសិករ ។ មិនត្រឹមតែប៉ុណ្ណោះរាជរដ្ឋាភិបាលក៏បានឱ្យក្រសួងពាក់ព័ន្ធចុះត្រួតពិនិត្យតម្លៃស្រូវនេះតាមតែអាចធ្វើទៅបាន ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងនៅក្នុងពិធីប្រគល់សញ្ញាបត្រជូនដល់និស្សិតនៃសាកលវិទ្យាល័យឯកទេសនៃកម្ពុជា កាលពីថ្ងៃទី ១១ខែធ្នូម្សិលមិញ ថារោងម៉ាស៊ីនកិនស្រូវទទួលទិញស្រូវពីប្រជាពលរដ្ឋ មេត្តាកុំទម្លាក់ថ្លៃស្រូវរបស់ប្រជាជនដែលគាត់កំពុងច្រូតកាត់ ។ សម្តេចមានប្រសាសន៍ថា «យើងយល់ហើយអំពីក្រិត្យក្រមនៃសេដ្ឋកិច្ច ។ មានតម្រូវការច្រើនការផ្គត់ផ្គង់តិចតម្លៃវាឡើងថ្លៃ មានតម្រូវការតិចតែតម្រូវការផ្គត់ផ្គង់ច្រើនគឺវាចុះថ្លៃ ។ ប៉ុន្តែខ្ញុំសូមអំពាវនាវចំពោះរោងម៉ាស៊ីនកិនស្រូវ កន្លែងស្តុកស្រូវទទួលទិញពីប្រជាកសិករសូមកុំបង្អាប់ថ្លៃស្រូវរបស់ប្រជាជន» ។
សម្តេចសង្កត់ធ្ងន់ថា «រាជរដ្ឋាភិបាលបានបញ្ចេញថវិកាប្រមាណ ៥០ ដុល្លារអាមេរិកដើម្បីជួយឱ្យរោងម៉ាស៊ីនកិនស្រូវ ។ ប៉ុន្តែសូមអស់លោកយល់មិនមែនយក ៥០ លានដុល្លារអាមេរិកនេះទៅច្របាច់ករប្រជាជនសម្រាប់ទម្លាក់ថ្លៃស្រូវនោះទេ ។ ខ្ញុំសូមឱ្យក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ ត្រួតពិនិត្យមើលបញ្ហានេះឱ្យបានឆាប់តាមតែអាចធ្វើទៅកើត ។ ស្រូវកំពុងពេញច្រូតកាត់ទាំងស្រូវវស្សា និងស្រូវប្រាំងដំណាលគ្នា ស្រូវមានចំនួនច្រើន ប៉ុន្តែថ្លៃស្រូវក៏បានធ្លាក់ចុះ ។ អ៊ីចឹងសូមឱ្យបណ្តារោងម៉ាស៊ីនកិនស្រូវទទួលទិញស្រូវក្នុងតម្លៃសមរម្យ កុំទម្លាក់ថ្លៃជ្រុលហួសជាហេតុធ្វើឱ្យប្រជាកសិកររបស់យើងជួបការលំបាក» ។
សម្តេចលើកឡើងថា «យើងយល់អំពីទីផ្សារ មិនមែនមានតែកម្ពុជាមួយនោះទេដែលផលិតស្រូវនោះ ។ នៅវៀតណាម ថៃ គេធំជាងយើងឆ្ងាយហើយនៅមីយ៉ាន់ម៉ា ក៏មានចំនួនច្រើនដែរ ។ សូមឱ្យមានក្រសួងពាក់ព័ន្ធមានការយកចិត្តទុកដាក់លើបញ្ហានេះ ។ សហព័ន្ធស្រូវអង្ករកម្ពុជាសូមើល ។ សភាពាណិជ្ជកម្មត្រូវប្រជុំមើលរឿងនេះ ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និងក្រសួងកសិកម្ម រុក្ខាប្រមាញ់ និងនេសាទ ក៏ត្រូវពិនិត្យមើលពីបញ្ហានេះ ដើម្បីចៀសវាងនៅការជន់លិច ពេលឃើញស្រូវប្រជាពលរដ្ឋច្រើន អ៊ីចឹងទៅទម្លាក់ថ្លៃរបស់ពួកគាត់ដែលជារឿងមួយមិនគួរគម្បីនោះទេ» ។
ទាក់ទងនិងការប្រមូលផលស្រូវ និងតម្លៃស្រូវនេះនៅពេលថ្មីៗបើតាមប្រជាកសិករដែលរស់នៅឃុំសឿ ខេត្តបន្ទាយមានជ័យ លោក ទិត្យ សុផា បានឱ្យដឹងថាស្ថិតក្នុងរដូវប្រមូលផលស្រូវសែនក្រអូបឆ្នាំនេះ តម្លៃស្រូវបើប្រៀបធៀបនឹងពេលដូចគ្នាឆ្នាំមុន វាខុសគ្នាប្រហែល ២.០០០ បាត (ប្រហែល ២៦៨.៦០០ រៀល) ក្នុងមួយតោន ឬក្រោមនេះបន្តិចផ្អែកទៅលើគុណភាពស្រូវជាក់ស្តែង ។ នៅតំបន់នេះគេពេញនិយមធ្វើស្រូវសែនក្រអូប ព្រោះស្រូវសែនក្រអូបនេះគេលក់បានថ្លៃជាងស្រូវមួយចំនួនផ្សេងទៀត ។
កសិកររូបនេះបញ្ជាក់ថា «មកដល់ឥឡូវមិនទាន់មានកសិករច្រើនទេធ្វើការច្រូតស្រូវ ឬប្រមូលផលស្រូវរបស់ខ្លួនដោយសារតម្លៃស្រូវវាថោក ហើយអត់សូវមានអ្នកទិញទៀត ។ កសិករបង្អង់ចាំមើលគ្នា ឬចាំមើលតម្លៃក្រែងតម្លៃស្រូវប្រសើរជាងនេះ ខណៈស្រូវដល់ពេលទុំក្រហមពេញវាលស្រែអស់ហើយ ។ ម្សិលមិញគេហ៊ានទិញស្រូវសែនក្រអូបក្នុងមួយតោនថ្លៃ ៧.១០០ បាត (ប្រហែល ៩៥៣.៥៣០ រៀល) តែមកដល់ថ្ងៃនេះស្រាប់តែធ្លាក់ចុះមកនៅត្រឹម ៦.៩០០ បាត (ប្រហែល ៩២៦.៦៧០ រៀល) វិញ ហើយអត់ហ៊ានទទួលទិញច្រើនទៀត» ។
តាមការយល់ឃើញលោក ទិត្យ សុផា ខណៈតម្លៃស្រូវចុះថោក កសិករបន្តរងចាំតម្លៃស្រូវងើបឡើងវិញ វាអាចធ្វើឱ្យកសិករកាន់តែខាតបង់ប្រាក់ថែមទៀត ។ ព្រោះសព្វថ្ងៃនេះឈ្មួញគេមកទិញស្រូវ គេយកទៅសម្ងួត តែបើកសិករពន្យាពេលអូសបន្លាយបែបនេះវានឹងធ្វើឱ្យស្រូវទុំខ្លាំងពេក ធ្វើឱ្យម្ចាស់រោងម៉ាស៊ីនលែងទិញ ។ ដូចនេះដើម្បីកុំឱ្យខាតបង់ព្រោះតែការរងចាំតម្លៃនេះ កសិករមួយចំនួនបង្ខំចិត្តលក់ត្រូវយកលុយខ្លះ សងថ្លៃជី ថ្នាំដែលបានទិញជំពាក់គេនៅពេលកន្លងមក អ៊ីចឹងកសិករឆ្នាំនេះប្រឈមនឹងហានិភ័យ ។
យោងតាមសេចក្តីប្រកាសរបស់សហព័ន្ធស្រូវអង្ករកម្ពុជាថ្មីៗនេះបង្ហាញថា តម្លៃស្រូវរបស់កសិករពិតជាធ្លាក់ចុះមែន ក៏ប៉ុន្តមិនមែនធ្លាក់ចុះចំពោះស្រូវគ្រប់ប្រភេទនោះទេ គឺធ្លាក់ចុះ សម្រាប់តែស្រូវណាដែលមានគុណភាពអន់ ឬមិនត្រូវនឹងស្ដង់ដារទីផ្សារក្នុង និងក្រៅប្រទេស ។ បញ្ហាស្រូវមាននិន្នាការធ្លាក់ថ្លៃតាមការពិនិត្យជាក់ស្តែង តម្លៃស្រូវគុណភាពល្អ ផ្កាម្លិះ ផ្ការំដួល និង សែនក្រអូប មានតម្លៃធ្លាក់ចុះបន្តិចបន្តួចប្រហែល ១០០ រៀលប៉ុណ្ណោះក្នុងមួយគីឡូក្រាម ៕ កែសម្រួលដោយ ៖ សុឃាក់
ចែករំលែកព័តមាននេះ