រាជធានីភ្នំពេញ ៖ មន្ត្រីជាន់ខ្ពស់អង្គការខាងការងារ (ILO) កោតសរសើចំពោះវឌ្ឍន៍ភាពខាងការងាររបស់ប្រទេសកម្ពុជាដែលបណ្តាប្រទេសមួយចំនួនមិនអាចធ្វើបានដូចកម្ពុជានោះទេ ។ ប៉ុន្តែនៅមានបញ្ហាមួយចំនួន គឺការបង្កើតឲ្យមានតម្រូវការទីផ្សារការងារ ។
ថ្លែងក្នុងកិច្ចប្រជុំលើកទី៤ របស់គណៈកម្មការអន្តរក្រសួងសម្រាប់ដឹកនាំត្រួតពិនិត្យ និងវាយតម្លៃលើការអនុវត្តគោលនយោបាយជាតិស្តីពីមុខរបរ និងការងារ ឆ្នាំ២០១៥- ២០២៥ នាព្រឹកថ្ងៃទី១២ ខែធ្នូ ឆ្នាំ២០១៩ នៅឌឺហ្គ្រេតឌូកលោកស្រី Makiko Matsumoto អ្នកជំនាញជាន់ខ្ពស់ខាងមុខរបរ និងការងាររបស់អង្គការខាងការងារ ILO បានសរសើរចំពោះភិវឌ្ឍវិស័យការងាររបស់កម្ពុជា នាពេលកន្លងនេះដោយរាជរដ្ឋាភិបាលបានជ្រោមជ្រែង ពិសេសនោះក្រសួងការងារ និងបណ្តុះបណ្តាលវិជ្ជាជីវៈបានជួយដោះស្រាយបានជាបន្តបន្ទាប់ចំពោះវិស័យការងារ ។
លោកស្រីបានបញ្ជាក់ថា ៖«ខ្ញុំបានមើលឃើញថា វិស័យការងារនៅកម្ពុជាមានវឌ្ឍនភាព ហើយប្រទេសផ្សេងមិនអាចធ្វើបានអីញ្ចឹងទេ ។ អីញ្ចឹងខ្ញុំគិតថា មានវឌ្ឍនភាព ប៉ុន្តែយើងនៅ មានចំណុចខ្សោយមួយចំនួន គឺការបង្កើតឲ្យមានតម្រូវការទីផ្សារការងារ ឬឱកាសការងារ ។ ចំណុចនេះ គឺយើងទាមទារឲ្យមានការខិតខំបង្កើតយន្តការបន្ថែមទៀត ដើម្បីបង្កើនការងារ ឲ្យច្រើន» ។ លោកស្រីបានបន្តថា កម្ពុជាមានគោលនយោបាយច្រើនត្រូវមានការចូលរួមពីអន្តរក្រសួងក្នុងការពិភាក្សា ប៉ុន្តែពេលកន្លងមកទោះបីជាមានគោលនយោបាយយ៉ាងណាក្តីក៏ការអនុវត្តមិនសូវបានធ្វើបានពេញលេញនោះទេ ។ កត្តានេះយើងត្រូវតែពិនិត្យឡើងវិញពីគ្រប់ភាគី ។
លោកស្រីបញ្ជាក់ថា ៖«ខ្ញុំចង់បញ្ហាថា បច្ចុប្បន្ននេះ ILO បានឃើញ និងមានបទពិសោធន៍ផងដែរទាក់ទង និងការងារដែលយើងបានផ្តល់ទៅលើគោលនយោបាយជាតិ និងមុខរបរនេះមិនថា កម្ពុជានោះទេ គឺទៅបណ្តាប្រទេសលើសកលលោក យើងឃើញថា មានឧបសគ្គស្រដៀងគ្នារវាងប្រទេសទាំងឡាយហ្នឹង ប៉ុន្តែកម្ពុជាមានវឌ្ឍនភាពខាងវិស័យការងារ» ។ លោកស្រីបន្ថែមថា ការធ្វើបែបនេះ ដើម្បីឲ្យប្រជាជនស្វែងរកការងារបាន និងមានឱកាសក្នុងការធ្វើការងារនៅតាមមូលដ្ឋាន ដើម្បីទទួលបានប្រាក់កម្រៃសមស្របនឹងកម្លាំងពលកម្ម ឬស្វែងរកកន្លែងការងារឲ្យពួកធ្វើ ។ លោកស្រីបន្ថែមថា ការបង្ហាញរបាយការទៀតទាត់ក៏ជាលក្ខណៈល្អប្រសើរផងដែរ ពាក់ព័ន្ធនឹងការស្វែងរកការងារ និងរកការងាងឲ្យប្រជាពលរដ្ឋធ្វើ ។
កម្ពុជាមានវិស័យច្រើនបានរីកចម្រើន ដែលធ្វើឲ្យសេដ្ឋកិច្ចមានការរីកចម្រើនក្នុងរយៈពេលប៉ុន្មានមកឆ្នាំនេះ ។ ប៉ុន្តែយើងឃើញថា ក៏នៅមានបញ្ហាមួយចំនួនទាក់ទង និងអាត្រាការងារធ្វើរបស់ប្រជាពលរដ្ឋនៅមានអ្នកធ្វើចំណាក់ស្រុកទៅស្វែងរកការងារធ្វើនៅក្រៅប្រទេស ។ លោកស្រីក៏បានលើកឡើងថា បញ្ហាចំណាកស្រុកស្វែងរកការងារធ្វើនេះ រាជរដ្ឋាភិបាលក៏ដូចជា ក្រសួងការងារគួរតែគិតគូស្វែងរកការងារក្នុងប្រទេសជូនពួកគាត់ ។ ក្នុងកិច្ចប្រជុំនោះដែរលោកស្រីក៏បានអះអាងថា អង្គការខាងការងារនៅបន្តជួយបណ្តុះបណ្តាលផ្នែកបច្ចេកទេសដល់កម្ពុជាផងដែរ ។
ក្នុងកិច្ចប្រជុំនោះដែរ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានទទួលស្គាល់ចំពោះការលើកឡើងនេះ ពិសេសការធ្វើចំណាកស្រុករបស់ពលករ ដើម្បីស្វែងរកការងារធ្វើនៅក្រៅប្រទេស ។ លោកបន្តថា ចំពោះបញ្ហាចំណាក់ស្រុកស្វែងរកការងារធ្វើរបស់ពលករនោះវាជាបញ្ហាចរន្តក្នុងពិភពលោកទៅហើយ ។ ព្រោះថា នៅក្នុងប្រទេសណាក៏មានបញ្ហាចំណាកស្រុកស្វែងរកការងារនោះដែរ ដោយសារពួកគេស្វែងរការងារនោះដោយទទួលបានប្រាក់ឈ្នួលច្រើន ។
ទាក់ទិននឹងកិច្ចប្រជុំវិញលោករដ្ឋមន្ត្រីបានគូសបញ្ជាក់ថា ៖«យើងគួរតែកែទម្រង់នៃកិច្ចប្រជុំត្រួតពិនិត្យ និងវាយតម្លៃលើកការអនុវត្តគោលនយោបាយជាតិស្តីពីមុខរបរ និងការងារនេះ គឺ យើងត្រូវធ្វើឡើងនៅដើមឆ្នាំ២០២០ ។ យ៉ាងណានៅក្នុងត្រីមាស ឆ្នាំ២០២០ យើងគួរតែធ្វើឲ្យទៀតទាត់ព្រោះអ្វីដែលជាទិសនៅយើងដាក់ ដើម្បីពិនិត្យពិភាក្សា» ។
ទាក់ទិននឹងវិស័យការងារវិញលោករដ្ឋមន្ត្រីបានលើកឡើងថាបច្ចុប្បន្ននេះវិស័យការងារមានការវិវឌ្ឍន៍លឿនណាស់ ហើយការវវត្តន៍របស់កម្ពុជាបានធ្វើឲ្យមានចលភាពនៃកម្លាំងពលកម្មឬចំណាកស្រុកពីកន្លែងមួយទៅកន្លែងមួយក្នុងប្រទេស និងចេញទៅក្រៅប្រទេស ។ ឥឡូវនេះមានការប្តូរពីកសិករមកវិស័យឧស្សាហកម្ម សំណង់ ជាដើម ដែលធ្វើឲ្យវិស័យកសិកម្មថយចុះ ។ លោករដ្ឋមន្ត្រីបានលើកឡើងថា បញ្ហាសង្គ្រាមពាណិជ្ជកម្មលោកមិនអាចទស្សទាយបានទេ ថា នឹងកើតអ្វីដល់កម្ពុជា ប៉ុន្តែកម្ពុជាត្រូវតែគិតគូរពីបញ្ហារកការងារ និងមុខរបរជូនប្រជា ពលរដ្ឋ ដើម្បីឆ្លើយតម្រូវការក្នុងស្រុក ។
លោកបន្តថា ចរន្តដែលនាំឲ្យពលករធ្វើការចំណាក់ស្រុកទៅប្រទេសក្រៅដោយសារតែប្រាក់ខែខ្ពស់ ជាក់ស្តែងនោះពលករកម្ពុជាទៅថៃដោយសារតែបញ្ហាប្រាក់ ។ ទោះបីជាមានពលករកម្ពុជាធ្វើចំណាក់ស្រុកទៅក្រៅប្រទេសយ៉ាងណាក្តី បច្ចុប្បន្ននេះ នៅក្នុងប្រទេសកម្ពុជា ក៏មានកន្លែងខ្លះបានកំពុងតែទាញយកកម្លាំងពលកម្មច្រើន ដូចជា ចម្ការចេក ចម្ការស្វាយ ហើយកម្លាំងពលកម្មទទួលបានប្រាក់ខែច្រើនគួរសមដែរ ៕
ចែករំលែកព័តមាននេះ