ព្រោះតែរឿងបែបនេះទើបមហាសេដ្ឋីមួយរូបមិនចង់រកលុយបន្ថែមទៀត
លោក ម៉ាក ឃ្យូបេន (Mark Cuban) ដែលជាមហាសេដ្ឋី វិនិយោគិន និងម្ចាស់ក្រុមហ៊ុន Dallas Mavericks…
លោក ម៉ាក ឃ្យូបេន (Mark Cuban) ដែលជាមហាសេដ្ឋី វិនិយោគិន និងម្ចាស់ក្រុមហ៊ុន Dallas Mavericks…
លោក ម៉ាក ឃ្យូបេន (Mark Cuban) ដែលជាមហាសេដ្ឋី វិនិយោគិន និងម្ចាស់ក្រុមហ៊ុន Dallas Mavericks មានទ្រព្យសម្បត្តិសរុបប្រមាណ ៤.១ ប៊ីលានដុល្លារ បើយោងទៅតាមទស្សនាវដ្តី Forbes ហើយលោកបានអះអាងថា ចំនួនលុយនេះ គឺគ្រប់គ្រាន់ហើយសម្រាប់លោក ។
ផ្ទុយមកវិញលោកធ្លាប់បានចែករំលែកមកថា លោកបានបញ្ឈប់ខ្លួនឯងក្នុងការរកលុយបន្ថែមជាយូរលង់ណាស់មកហើយ ព្រោះលោកមានលុយគ្រប់គ្រាន់ហើយ ខណៈដែលលោកផ្តល់តម្លៃលើពេលវេលាច្រើនជាងលុយទៅទៀតបច្ចុប្បន្ននេះ ។ លោកបានបន្តថា ការផ្លាស់ប្តូរគំនិតនេះបានចាប់ផ្តើមពេលដែលលោក និងដៃគូអាជីវកម្មរបស់លោកលក់ក្រុមហ៊ុន Broadcast.com ឲ្យទៅ Yahoo ក្នុងតម្លៃ ៥.៧ ប៊ីលានដុល្លារកាលពីឆ្នាំ១៩៩៩ ។ ពេលនោះជាពេលដែលលោកដឹងថាលោកមិនត្រូវការលុយបន្ថែមទៀតទេ ព្រោះយោងទៅតាមលោកឃ្យូបេន លុយមិនអាចទិញសុភមង្គលបានឡើយ ។
លោកបានប្រាប់ថា «លុយអាចទិញភាពស្រណុកស្រួលឲ្យអ្នក ។ លុយអាចទិញយកវិចារណញ្ញាណបានខ្លះ ។ លុយលុបបំបាត់អារម្មណ៍ស្ត្រេសជាច្រើន ក្នុងការបង់ថ្លៃទឹក ភ្លើង ប៉ុន្តែវាមិនជួយឲ្យអ្នកសប្បាយចិត្តទេ ។ ខ្ញុំមានសុភមង្គលពេលដែលខ្ញុំគ្មានលុយ ។ បើអ្នកមិនមានសុភមង្គលពេលដែលអ្នកគ្មានលុយ ការមានលុយក៏មិនអាចផ្លាស់ប្តូរវាដែរ» ។ «បើអ្នកមានសុភមង្គលពេលដែលអ្នកមិនមានលុយច្រើន ហើយស្រាប់តែអ្នកជោគជ័យនោះ អ្នកនឹងស្រលាញ់ជីវិតរបស់អ្នកកាន់តែខ្លាំងឡើង ។ ហើយវាជាអ្វីដែលកើតឡើងលើខ្លួនខ្ញុំ» ។
ក្រៅពីលុបបំបាត់អារម្មណ៍ស្ត្រេសហើយ លោក ឃ្យូបេន បានប្រាប់ទៀតថា លុយក៏អាចធ្វើឲ្យមនុស្សធ្វើអ្វីផ្សេងៗដែលជួយទិញពេលវេលាដែរដូចជា ធ្វើអ្វីមួយដោយលឿន ។ ការចាយវាយធំដំបូងរបស់លោកមហាសេដ្ឋីនេះ គឺការទិញយន្តហោះផ្ទាល់ខ្លួនមួយ ដើម្បីសន្សំសំចៃពេលវេលាពេលធ្វើដំណើរ ។ បច្ចុប្បន្នលោកផ្តោតស្មារតីទៅលើវិស័យសុខាភិបាលរបស់សហរដ្ឋអាមេរិក ។
លោកបានអះអាងថា មនុស្សគ្រប់គ្នាមិនទាន់អាចទទួលបានការមើលថែព្យាបាលតាមតម្រូវការក្នុងតម្លៃដែលពួកគេអាចបង់បានទេ ។ លោកចាប់អារម្មណ៍លើការធ្វើឲ្យមនុស្សកាន់តែមានសុខភាពល្អ ដោយហេតុដូចនេះ ទើបលោកបានចាប់ផ្តើមក្រុមហ៊ុនមួយក្នុងផ្នែកឱសថទោះជាក្រុមហ៊ុននេះមិនជួយរកចំណូលឲ្យលោកច្រើនពិតមែនក្តី ។ លោកគ្រាន់តែមិនចង់ស្តាយក្រោយនៅថ្ងៃមុខប៉ុណ្ណោះ ៕ កែសម្រួលដោយ ៖ សុឃាក់
ចែករំលែកព័តមាននេះ