រាជធានីភ្នំពេញ ៖ ស្ត្រីម្នាក់បានជិះរថយន្តតាក់ស៊ីពីក្រុងព្រះសីហនុ ឆ្ពោះមករាជធានីភ្នំពេញ លុះមកដល់ពាក់កណ្ដាលផ្លូវ ស្រាប់តែបុរសជាអ្នកបើកតាក់ស៊ីនោះ ប៉ងចាប់រំលោភ តែមិនបានសម្រេចដោយត្រូវស្ត្រីរងគ្រោះប្រើល្បិចលួងលោមថា ចាំដល់ភ្នំពេញសិន ហើយពេលមកដល់ភ្នំពេញបានជួបប្តីដែលណាត់គ្នាក៏ប្តឹងសមត្ថកិច្ចឱ្យឃាត់ខ្លួន ។ ករណីនេះ បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៤ទៀបភ្លឺថ្ងៃទី១១ ខែធ្នូ នៅផ្លូវលេខ៥៩៥ សង្កាត់ទួលសង្កែទី២ ខណ្ឌឫស្សីកែវ ។
អ្នកដឹងឮរឿងរ៉ាវនេះនិយាយថា មិនគប្បីជិះតាក់ស៊ីតែម្នាក់ឯងពេលយប់បែបនេះទេ ព្រោះប្រឈមនឹងគ្រោះថ្នាក់ណាស់ ។ សំណាងហើយដែលស្ត្រីរូបនេះបានរួចផុតពីក្រញាំព្រាន ដោយសារប្រើល្បិចឱ្យប្រុសកំហូចជឿនៅពេលមកដល់ភ្នំពេញ ។
ស្ត្រីជាដើមចោទឈ្មោះ ស្រី មាន អាយុ៣៤ឆ្នាំ ជាបុគ្គលិកកាស៊ីណូមួយនៅក្រុងព្រះសីហនុ ។ ចំណែកអ្នកបើកតាក់សុីដែលជាប់ចោទឈ្មោះ រ៉េត អាយុ២៩ឆ្នាំ ស្នាក់ការនៅក្នុងសង្កាត់ចោមចៅ ខណ្ឌពោធិ៍សែនជ័យ ។ ក្រោយពីទទួលបានពាក្យបណ្តឹង សមត្ថកិច្ចក៏បានដកហូតរថយន្តឡិចស៊ីសRX៣០០ ពណ៌ប្រផេះ ពាក់ផ្លាកលេខ ភ្នំពេញ ២O-៦៦៥៥ ជារបស់ជននេះផងដែរ ។ តាមស្ត្រីជាដើមបណ្តឹងនិយាយថា រូបគាត់បានជិះរថយន្តឈ្នួលពីចំណតមហោស្រពក្រុងព្រះសីហនុ មកភ្នំពេញដើម្បីជួបប្តីរបស់គាត់ ។
លុះជិះចេញពីក្រុងព្រះសីហនុបានបន្តិច ម្ចាស់រថយន្តឈ្នួលនោះ បានសាងគាត់ឱ្យជិះរថយន្តឡិចស៊ីសខាងលើ ដែលជារថយន្ដជនសង្ស័យដោយជិះតែ២នាក់ ។ រូបគាត់ត្រូវអ្នកបើកបរឱ្យអង្គុយនៅខាងមុខជាប់កៅអីគ្នា ព្រោះកៅអីខាងក្រោយជាប់ដឹកអីវ៉ាន់ពេញ ។ ប្រភពដដែលបន្តទៀតថា ពេលធ្វើដំណើរបន្តមកភ្នំពេញនោះ បុរសអ្នកបើកតាក់ស៊ីបានយកដៃមកស្ទាបអង្អែលរូបគាត់ម្តងហើយម្ដងទៀតក្នុងន័យលួងលោមស្នេហា ព្រោះរថយន្តមានតែ២នាក់គិតថា ជាឱកាសល្អបែបនឹកស្មានថា នាងជាស្រីងាយ ។ លុះបន្តដំណើរមកដល់ពាក់កណ្ដាលផ្លូវ ស្រាប់តែអ្នកបើកបរបានឈប់ ធ្វើជាខូចរថយន្តនៅកន្លែងស្ងាត់ ហើយអ្នករត់តាក់ស៊ីនេះបានប្រើពាក្យសម្ដីលួងលោម និយាយលែបខាយហៅសុទ្ធតែប្រពន្ធ ហើយចាប់រូបគាត់បម្រុងរំលោភតែម្តង ។
នាងបាននិយាយប្រាប់អ្នកកាសែតថា ពេលនោះ នាងបានរើបម្រះចេញពីរថយន្ដមកខាងក្រៅ ឈរហៅរថយន្តផ្សេងៗទៀតដើម្បីបន្តដំណើរ តែពេលនោះអ្នកបើកបររថយន្ត តាក់សុីរូបនេះបានលួងលោមឱ្យឡើងជិះទៅនឹងជូននាងឱ្យដល់រាជធានីភ្នំពេញ ទើបនាងព្រមឡើងជិះបន្តដំណើរមកជាមួយ ។
នៅតាមផ្លូវនាងក៏បានឆាត(Chat)តាមហ្វេសប៊ុកប្រាប់ប្តីពីដំណើររឿង ។ នាងថា រហូតមកដល់រាជធានីភ្នំពេញ អ្នកបើកបរបម្រុងនែបនិត្យរូបនាងទៀត តែនាងយកលេសឲ្យដឹកមកដល់ផ្លូវបែកជា៤កាំកូស៊ីធីសិន ចាំយើងជួបគ្នា ។ អ្នកបើកបរទំនងគិតថា មកដល់ផ្លូវបំបែកកាំកូនឹងបាននាងអូខេមិនខាន ។ ប៉ុន្តែផ្ទុយទៅវិញពេលបើកមកដល់ផ្លូវបំបែកពេលចុះពីរថយន្ត ក៏បានជួបប្តីដែលនាងបានណាត់គ្នាតាមឆាតហ្វេស
ប៊ុក ហើយក៏ប្តឹងសមត្ថកិច្ចឲ្យឃាត់ខ្លួនបុរសជាអ្នកបើករថយន្តតាក់សុីនេះតែម្តង ។
នៅពេលត្រូវបានឃាត់ខ្លួនភ្លាម អ្នកបើកបររថយន្តតាក់សុីរូបនេះ បានអង្វរទៅប្តីស្ត្រីរងគ្រោះសុំជូន៣០០ដុល្លារកុំឱ្យប្តឹងប្តល់អី តែប្តីនាងមិនព្រម ។ ដោយឡែក អ្នកបើកតាក់សុីដែលជាប់ចោទប៉ងរំលោភស្ត្រីជាភ្ញៀវជិះក្នុងរថយន្តវិញនិយាយថា រូបគាត់បានត្រឹមតែចាប់អង្អែលដៃស្ត្រីរងគ្រោះប៉ុណ្ណោះ មិនបានរំលោភទេ ។
នៅពេលកើតហេតុ សមត្ថកិច្ចមកដល់ឃាត់ខ្លួនជនសង្ស័យនាំយកទៅសាកសួរនៅប៉ុស្តិ៍នគរបាលទួលសង្កែទី២ ហើយជនរងគ្រោះក៏ប្តឹងឱ្យសមត្ថកិច្ចចាត់ការតាមផ្លូវច្បាប់ ។ ជាចុងក្រោយ អ្នករត់តាក់សុីរូបនេះក៏សុំអង្វរសុខចិត្តយល់ព្រមបង់សងជំងឺចិត្តដល់ស្ត្រីរងគ្រោះចំនួន៥០០ដុល្លារ នៅចំពោះមុខសមត្ថកិច្ចដើម្បីបញ្ចប់រឿង ។
នេះជាមេរៀនមួយសម្រាប់បុរសអ្នករត់តាក់ស៊ីទាំងឡាយ ។ ចំណែកអ្នកបើកតាក់ស៊ីដ៏កំហូចនេះ ទំនងរាងហើយ…ប៉ុន្តែប៉ុណ្ណឹងហើយបើមិនរាងទេ…ថ្ងៃក្រោយសុំកុំរាង !…ហេ ! ហេ !
ចែករំលែកព័តមាននេះ