អគ្គលេខាធិការអង្គការសហប្រជាជាតិ លោកបាន គីមូន បានតែងតាំងលោក Abdelilah Al-Khatib អតីតរដ្ឋមន្ត្រី ការបរទេសហ្សកដានីជាបេសកជនពិសេសរបស់លោកប្រចាំប្រទេសលីប៊ី ។ នេះបើតាមការឱ្យដឹងតាមរយៈសេចក្តីថ្លែងការណ៍មួយចេញដោយអ្នកនាំពាក្យរបស់លោកកាលពីថ្ងៃទី៦ មីនា កន្លងមក ។ សេចក្តីថ្លែងការណ៍នោះឱ្យដឹងទៀតថា បេសកជនពិសេសថ្មីនេះនឹងធ្វើការពិគ្រោះយោបល់បន្ទាន់ជាមួយអាជ្ញាធរនៅក្នុងទីក្រុងទ្រីប៉ូលី រដ្ឋធានីលីប៊ី និងនៅក្នុងតំបន់ស្តីអំពីស្ថានការណ៍មនុស្សធម៌ ព្រមទាំងទំហំនៃវិបត្តិរបស់ប្រទេសលីប៊ី ។ លោក Al-Khatib នឹងធ្វើដំណើរទៅកាន់ទីក្រុងញូវយ៉ករយៈពេល២-៣ថ្ងៃខាងមុខនេះ មុនពេលទទួលយកកាតព្វកិច្ចរបស់លោក។
សេចក្តីថ្លែងការណ៍ខាងលើឱ្យដឹងទៀតថា ប្រមុខអង្គការសហប្រជាជាតិមានការព្រួយបារម្ភយ៉ាងខ្លាំងចំពោះការប្រយុទ្ធគ្នានៅភាគខាងលិចលីប៊ីដែលបណ្តាលឱ្យស្លាប់មនុស្សជាច្រើននាក់រួចមកហើយ ។
កាលពីថ្ងៃទី៦ មីនា នោះដែរ លោកបាន គីមូន បានពិភាក្សាជាមួយរដ្ឋមន្ត្រីការបរទេសលីប៊ី លោក Musa Kusae ហើយលោកបានអំពាវនាវឱ្យលីប៊ីបញ្ចប់អរិភាព និងគោរពតាមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាតិលេខ១៩៧០ ។ សេចក្តីសម្រេចចិត្តលេខ១៩៧០នេះ ដែលត្រូវបានអនុម័តជាឯកច្ឆ័ន្ទដោយក្រុមប្រឹក្សាសន្តិសុខកាលពីថ្ងៃទី២៦ កុម្ភៈ ដាក់ទណ្ឌកម្មប្រឆាំងប្រទេសលីប៊ី ក្នុងនោះមានដូចជាការហ៊ុមព័ទ្ធអាវុធ និងការហាមប្រាមលើការធ្វើដំណើរ និងការផ្អិបទ្រព្យសម្បត្តិរបស់មេដឹកនាំលីប៊ី លោកមូអាម៉ា កាដាហ្វី និងសមាជិកគ្រួសារសំខាន់ៗរបស់លោក ។
ក្នុងកិច្ចសន្ទនាតាមទូរស័ព្ទជាមួយរដ្ឋមន្ត្រីការបរទេសលីប៊ី លោកបាន គីមូន បានអំពាវនាវដល់អាជ្ញាធរក្រុងទ្រីប៉ូលី ឱ្យទទួលខុសត្រូវខ្ពស់ដើម្បីការពារជនស៊ីវិល ហើយស្តាប់ការណែ នាំរបស់សហគមន៍អន្តរជាតិ ៕
ចែករំលែកព័តមាននេះ