ខេត្តកំពង់ចាម ៖ ដោយអនុវត្តន៍តាមការណែនាំរបស់លោក ឧត្តមសេនីយ៍ត្រី បែន រ័ត្ន ស្នងការនគរបាលខេត្ត ក្នុងការទប់ស្កាត់ បទល្មើសនេសាទ កម្លាំងប៉ុស្តិ៍រដ្ឋបាលឃុំប្រាំយ៉ាម បើកកិច្ចសហការជាមួយ និងប៉ុស្តិ៍រដ្ឋបាលឃុំបារាយ៍ ។ បានចុះបង្ក្រាប ក្រុម ឆក់ត្រីខុសច្បាប់បានចំនួន២នាក់ ដោយធ្វើឡើងនៅវេលាម៉ោង១១ និង៣០នាទីព្រឹក ថ្ងៃទី ៣១ ឧសភា ២០១៤ ដកហូតបាន ត្រីទង្ងន់ ១០គីឡូក្រាមរួមនិងរបស់ផ្សេងៗជាច្រើនផងដែរ ។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ បានប្រាប់ឲ្យដឹងថាបុរសទាំង២ នាក់ដែលសមត្ថកិច្ច ចាប់ ខ្លួននោះមានៈ១-ឈ្មោះ ជុន វុន អាយុ៣៩ឆ្នាំ ២-ឈ្មោះ ឡេង ខេន អាយុ៤០ឆ្នាំរស់នៅភូមិកំផ្លាក ឃុំបារាយ៍ ស្រុកស្រីសន្ធរ ទាំង អស់គ្នាត្រូវបានបញ្ជូនមកកាន់ អធិការដ្ឋាននគរបាលស្រុកស្រីសន្ធរ ដើម្បីចាត់ការតាមនីតិវិធី ។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ បានប្រាប់បន្តថា មុននឹងឈានចាប់ ខ្លួនជនទាំងនេះ ត្រូវ បានប្រជាពលរដ្ឋមូលដ្ឋាន រាយការណ៍មករូបលោកថាបានឃើញពីសកម្មភាពឆក់ត្រីខុសច្បាប់របស់បុរសទាំង២នាក់ ។ រំពេចនោះក៏បានចាត់ឲ្យ ប៉ុស្តិ៍រដ្ឋបាលឃុំប្រាំយ៉ាម និងប៉ុស្តិ៍រដ្ឋបាលឃុំបារាយ៍ មានកម្លាំងជិត១០នាក់ ចុះទៅជាបន្ទាន់ ក៏បាន ឃើញមែន ក៏ចាប់ខ្លួនដោយដកហូតបាននូវសម្ភារដូចជា ម៉ូតូ C 100 កូរ៉េមួយគ្រឿង ដក់ឆក់ចំនួន៥គ្រឿង អាគុយ៤០ អំពែ ចំនួន៥គ្រឿងដងឆក់ចំនួន៥គូរ ប៊ីដុងចំណុះ៣០លីត្រចំនួន៤ និងត្រីទង្ងន់ ១០គីឡូក្រាម ។ បុរសទាំង២នាក់ត្រូវបានបញ្ជូនមកកាន់ អធិកាដ្ឋាននគរបាលស្រុកស្រីសន្ធរ ។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ បានបញ្ជាក់ថា នាល្ងាចថ្ងៃដដែលដោយមានការអាណិតអាសូរ ពីសំណាក់អាជ្ញាធរស្រុកនោះ ព្រោះតែឃើញជីវភាពរបស់អ្នកឆក់ត្រីក្រីក្រដោយគ្រាន់តែធ្វើការព្រមាន មិនឲ្យមានជាលើកទី២ទៀតឡើយ ។ បើពុំនោះទេនឹងចាប់បញ្ជូនទៅ កាន់សាលាដំបូងខេត្ត ចាត់វិធានការទៅតាមច្បាប់ ។
ចែករំលែកព័តមាននេះ