ខេត្តប៉ៃលិន ៖ នារដូវប្រមូលផលស្រូវនិងកសិផលមួយចំនួនទៀតបានឈានមកដល់ តែកសិករបែរជាបង្ហាញនូវក្តីបារម្មណ៍ទៅវិញ បន្ទាប់ពីតម្លៃស្រូវ តម្លៃម្រេចខ្មៅបានធ្លាក់ចុះជាបន្តបន្ទាប់ ។ ជាមួយគ្នានេះផងដែររដូវប្រមូលផលពោតក្រហមនាចុងឆ្នាំ២០១៩ នេះ បានឈានចូលមកដល់ដូចគ្នាធ្វើឱ្យកសិករម្នាក់ៗក្នុងក្រុងប៉ៃលិន ដែលប្រកបរបរដាំដំណាំពោតក្រហម បាននាំគ្នាម្នីម្នា រកជួលកម្មករទៅប្រមូលផលពោត ដែលកំពុងតែទុំពេញក្នុងចំការយ៉ាងមមាញឹកតែម្តង ។
តែអ្វីដែលធ្វើឱ្យពួកគាត់មិនសប្បាយចិត្តនោះ គឺទិន្នផលពោតក្រហមក្នុងឆ្នាំនេះមិនសូវ
ល្អប្រសើរនោះឡើយ និយាយរួមគឺទិន្នផលមានការធ្លាក់ចុះខ្លាំង ។ កាន់តែអាក្រក់នោះ គឺតម្លៃ
ទីផ្សារក៏ស្ទើតែនិយាយមិនចេញផងដែរ ជាហេតុធ្វើឱ្យពួកគាត់ម្នាក់ៗ រអ៊ូរទាំថាដាំបានដំណាំអ្វី
ពេលប្រមូលផលដំណាំនោះ មានការធ្លាក់ចុះថោក ។
កសិករម្នាក់ ឈ្មោះ រ៉ុន ភេទប្រុស អាយុ៣២ឆ្នាំ ប្រពន្ធ ឈ្មោះ ចន្ថា អាយុ៣១ឆ្នាំ រស់
នៅភូមិ ក្រចាប់ សង្កាត់អូរតាវ៉ៅ ក្រុងប៉ៃលិន បានរៀបរាប់ឱ្យដឹងទាំងទឹកមុខស្រពាប់ស្រពោន ថានៅពេលនេះ ដំណាំពោតក្រហមរបស់គាត់ត្រូវបានជួលកម្មករទៅប្រមូលជិតរួចរាល់អស់ពី
ក្នុងចម្ការហើយ ។ លោកបានបន្តថា «តែអ្វីដែលធ្វើឱ្យខ្ញុំពិបាកចិត្តបំផុតនោះគឺទិន្នផលពោតក្រហមឆ្នាំនេះមានការធ្លាក់ចុះ ព្រោះរាំងភ្លៀងរយ:ពេលយូរពេក បណ្តាលឱ្យងាប់អស់ជាច្រើន ។ ទោះបីជាពួកខ្ញុំខិតខំដាំជាច្រើនលើកច្រើនសារយ៉ាងណា ក៏ងាប់ដើមអស់ជាច្រើនដែរ»។ គាត់បន្តទៀតថា រហូតមកដល់ចុងឆ្នាំនេះ តម្លៃទីផ្សារកសិផលពោតក្រហម ក្នុង១គីឡូក្រាមលក់បានត្រឹមតែ ៤.៣បាត (ប្រាក់ថៃ) ប្រហែល៥០០រៀលប៉ុណ្ណោះ ។ ចំណែកនៅឆ្នាំមុនៗ តម្លៃពោតក្រហម១ គីឡូក្រាមអាចលក់បាន៥ទៅ៦បាត (ប្រាក់ថៃ) ដែរ តែយូរទៅកាន់តែថោកទៅៗ ។
លោក រ៉ុន បានបន្តថា «ដូច្នេះ បន្ទាប់ពីប្រមូលផលរួច មើលទៅមិនអាចសល់ថវិកាសម្រាប់ផ្គត់ផ្គង់ជីវភាពគ្រួសារបាននោះទេ ខណ:ទិញគ្រាប់ពូជពោត ក៏ថ្លៃ ទិញជីប៉ូវដើម ប៉ូវផ្លែ និងប្រើថ្នាំបាញ់ស្មៅអស់ជាច្រើនថែមទៀត។ ដូច្នេះ ម្នាក់ៗ លែងមានអារម្មណ៍ចង់បន្តដាំពោតក្រហមទៀតហើយ»។ គាត់បានបញ្ជាក់ថា មិនមែន ត្រឹមតែដំណាំពោតមានការធ្លាក់ថ្លៃនោះទេ ពោលគឺដាំអ្វីបាន គឺកសិផលនោះតែងតែមានការធ្លាក់ថ្លៃតែម្តង ដែលមិនអាចឱ្យពួកគាត់ ទទួលយកបាននោះឡើយ ។ ពួកគាត់ក៏សូមអំពាវនាវ ដល់អាជ្ញាធរខេត្ត ក៏ដូចជាមន្ទីរកសិកម្មខេត្ត មេត្តាជួយរកទីផ្សារជូនប្រជាពលរដ្ឋទាំងអស់ផង ព្រោះធ្វើចម្ការយូរៗ ទៅ ខាតដើម ខាតចុង ដោយម្នាក់ៗស្ទើរតែឈប់ដាំំដំណាំទាំងនេះ ហើយលក់ដីធ្លីរត់ទៅធ្វើខ្ញុំគេនៅប្រទេសថៃ ដើម្បីរកប្រាក់មកសងបំណុលគេផងដែរ ។
ពាក់ព័ន្ធនឹងបញ្ហានេះ ភ្នាក់ងារយើងមិនអាចសុំការបំភ្លឺពីលោក សាយ សុផាត ប្រធាន
មន្ទីរកសិកម្មបានទេ ខណ:ងារយើងទូរស័ព្ទចូល លោកបានប្រាប់ថា កំពុងជាប់រវល់ប្រជុំ ហើយក៏បិទទូរស័ព្ទតែម្តង ៕ កែសម្រួលដោយ ៖ សុឃាក់
ចែករំលែកព័តមាននេះ