រាជធានីភ្នំពេញ ៖ សាលាឧទ្ធរណ៍ កាលពីរសៀលថ្ងៃទី៩ ខែធ្នូ បានចេញសេចក្តីប្រកាសព័ត៌មានបដិសេធបណ្តឹងប្រឆាំងនឹងសេចក្តីសម្រេចរបស់ចៅក្រមស៊ើបសួរសាលាដំបូងរាជធានីភ្នំពេញ ដែលបញ្ជូនសំណុំ រឿងលោក កឹម សុខា ទៅជំនុំជម្រះ ។
កាលពីថ្ងៃទី២ ខែធ្នូកន្លងមកនេះ ចៅក្រមស៊ើបសួរនៃសាលាដំបូងរាជធានីភ្នំពេញ លោក គី ឫទ្ធី បានសម្រេចបញ្ជូនសំណុំរឿង «សន្ទិដ្ឋិភាពជាមួយបរទេស» របស់លោក កឹម សុខា អតីតប្រធានអតីតគណបក្សសង្គ្រោះជាតិ ទៅជំនុំជម្រះ បន្ទាប់ពីបានបិទការស៊ើបសួរកាលពីពាក់កណ្តាលខែវិច្ឆិកាកន្លងទៅ ។
លោក កឹម សុខា បានត្រូវសមត្ថកិច្ចចាប់ ខ្លួននាវេលារំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២០១៧ ពាក់ព័ន្ធនឹងការប្រព្រឹត្តអំពើ«ក្បត់ជាតិ» គឺឃុបឃិតជាមួយបរទេសផ្តួលរំលំរាជរដ្ឋាភិបាលស្របច្បាប់ ហើយត្រូវបានឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ រយៈពេលជាង១ឆ្នាំ ទើបដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ ។
ការចាប់ខ្លួនលោក កឹម សុខា នេះគឺបន្ទាប់ពីបែកធ្លាយវីដេអូមួយកាលពីឆ្នាំ២០១៣ ដែលលោកនិយាយនៅប្រទេសអូស្ត្រាលីថា លោកអនុវត្តតាមការណែនាំពីបរទេស ដើម្បីធ្វើការផ្លាស់ប្តូរប្រទេសកម្ពុជា ដោយយកលំនាំតាមប្រទេសយូហ្គោស្លាវី និងប្រទេសស៊ែប៊ី ។
កាលពីថ្ងៃទី១០ ខែវិច្ឆិកា ឆ្នាំ២០១៩ សាលាដំបូងរាជធានីភ្នំពេញ បានចេញសេចក្តីប្រកាសព័ត៌មានដោយសម្រេចដាក់លោក កឹម សុខា ឲ្យស្ថិតក្រោមការត្រួតពិនិត្យតាមផ្លូវតុលាការដដែល ប៉ុន្តែទទួលបានការបន្ធូរបន្ថយលក្ខខណ្ឌត្រួតពិនិត្យ ដោយត្រូវជាប់កាតព្វកិច្ចដូចខាង
ក្រោម ៖
១-មិនត្រូវចេញក្រៅព្រំប្រទល់ដែនដីនៃព្រះ រាជាណាចក្រកម្ពុជា
២-មិនត្រូវធ្វើសកម្មភាពនយោបាយ និង៣-ត្រូវឆ្លើយតបនឹងការកោះហៅពីគ្រប់សមត្ថកិច្ច ។ នៅវេលាល្ងាច បន្ទាប់ពីសាលាឧទ្ធរណ៍បដិសេធបណ្តឹងរបស់ក្រុមមេធាវីលោក កឹម សុខា សាលាដំបូងរាជធានីភ្នំពេញ បានប្រកាសបើកសវនាការជំនុំជម្រះលើសំណុំរឿង «សន្ទិដ្ឋិភាពជាមួយបរទេស» របស់លោកកឹម សុខា នៅថ្ងៃទី១៥ ខែមករា ឆ្នាំ២០២០ ខាងមុខនេះ ។ខាងក្រោមនេះ ជាសេចក្តីប្រកាសព័ត៌មានរបស់អ្នកនាំពាក្យសាលាដំបូងរាជធានីភ្នំពេញ ស្តីពីការបើកសវនាការលើសំណុំរឿងលោក កឹម សុខា ៕
ចែករំលែកព័តមាននេះ