ខេត្តកំពង់ចាម ៖ ប្រជាពលរដ្ឋក្មេងចាស់ប្រុសស្រី រស់នៅក្នុងស្រុកព្រៃឈរ និងតាមបណ្ដាស្រុកមួយចំនួន បានស្គាល់បុរសចំណាស់វ័យ៦៣ឆ្នាំ រស់នៅភូមិស្វាយពិន ឃុំគរ ស្រុកព្រៃឈរដែលធ្វើឲ្យមហាជនទូទៅមានការចាប់អារម្មណ៍គ្រប់គ្រប់ៗគ្នា ដោយសារតែគាត់ស្លៀកពាក់តុបតែងជាតួល្ខោនបាសាក់រួមនឹងកង់១គ្រឿង…
ខេត្តកំពង់ចាម ៖ ប្រជាពលរដ្ឋក្មេងចាស់ប្រុសស្រី រស់នៅក្នុងស្រុកព្រៃឈរ និងតាមបណ្ដាស្រុកមួយចំនួន បានស្គាល់បុរសចំណាស់វ័យ៦៣ឆ្នាំ រស់នៅភូមិស្វាយពិន ឃុំគរ ស្រុកព្រៃឈរដែលធ្វើឲ្យមហាជនទូទៅមានការចាប់អារម្មណ៍គ្រប់គ្រប់ៗគ្នា ដោយសារតែគាត់ស្លៀកពាក់តុបតែងជាតួល្ខោនបាសាក់រួមនឹងកង់១គ្រឿង មានបំពាក់ដោយស្គរ មេក្រូ សម្រាប់ច្រៀងឲ្យគេសណ្ដាប់ ពេលណាដែលមកទិញការ៉េម របស់គាត់យកទៅពិសារមិនថាតិចឬក៏ច្រើនសប្បាយទាំងអ្នកលក់ សប្បាយទាំងអ្នកទិញ ។
លោក មិន លឹមហៃ អ្នកប្រកបរបរលក់ការ៉េមប្រាប់ឲ្យដឹងនៅព្រឹកថ្ងៃទី ២៣វិច្ឆិកា២០១៩ថា:នៅក្នុងឆ្នាំ១៩៨០ គ្រាដែលប្រទេសកម្ពុជា ត្រូវបានរំដោះពីរបបប្រល័យពូជសាសន៍៣ឆ្នាំ៨ខែ និង២០ថ្ងៃ ក៏បានរៀបការជាមួយនឹងអ្នកស្រី ទៀប យឿន ក្រោយមកក៏សម្រាលបានកូនបន្តបន្ទាប់ចំនួន២នាក់ក្នុងនោះកូនប្រុសបងឈ្មោះ ផៃ លឹមហឿន និងកូនស្រីឈ្មោះ ផៃ សុផល ក្នុងពេលនោះបានប្រកបរបរធ្វើស្រែនៅក្រោយភូមិដើម្បីដោះស្រាយជីវភាពគ្រួសារ ។
លោក លឹម ហៃ បានប្រាប់បន្តថា ក្រោយមកទៀតគាត់មានកង់មួយគ្រឿងក៏បែកគំនិតរកស៊ីទទួលការ៉េមកីរបស់គេនៅផ្សារព្រៃទទឹងយកទៅលក់ ដោយឌុបលក់នៅក្នុងភូមិនិងក្រៅភូមិ ។
គាត់ថា ក្នុងគ្រាដែលនៅកម្លាំងពេញគឺឌុបការ៉េមកីលក់រហូតទៅដល់ស្គន់ស្រុកជើងព្រៃ ទៅឃុំពាមជីកង ស្រុកកងមាស រង្វង់មូលត្រើង ស្រុកកំពង់សៀម និងឃុំបុសខ្នុរ ស្រុកចំការលើរួចក៏បានជិះវាងត្រឡប់មកផ្ទះវិញពេលលក់អស់ ។ គាត់ដំណាលថា ក្នុងពេលលក់ដំបូងៗនៅក្នុងភូមិមានតែគាត់ម្នាក់ទេ គឺការ៉េមឌុបលក់តាមកង់ លក់ដាច់ទទួលបានប្រាក់ចំណេញគ្រាន់បើសម្រាប់ដោះស្រាយជីវភាពគ្រួសារ ។
ប៉ុន្តែពីមួយឆ្នាំទៅមួយឆ្នាំអ្នកផ្សេងទៀតគេក៏បានប្រកបរបរលក់ការ៉េម ដឹកតាមកង់ដូចគាត់ដែរ ហើយអ្នកលក់ខ្លះ ក៏បានប្រើប្រាស់ម៉ូតូដឹកការ៉េមលក់ទៅទីជិតឆ្ងាយ ចំណែករូបគាត់វិញនៅតែជិះកង់ត្រឹកៗលក់ការ៉េមដដែល សឹងថាលក់ចាញ់គេ ព្រោះគេលក់តាមភូមិបានមុនដោយសារម៉ូតូ ។
គាត់បានរៀបរាប់បន្តទៀតថា ជាមួយនោះដើម្បីបង្កើតនូវភាពទាក់ទាញ ឱ្យការលក់ការ៉េមបានដាច់ជាងមុន គាត់បានច្នៃប្រឌិតដោយស្លៀកពាក់ជាតួល្ខោនបាសាក់ មានបំពាក់គ្រឿងបំពងសំឡេង ជិះកង់ដើរលក់នៅក្នុងភូមិទាក់ទាញអ្នកទិញបានច្រើនជាងមុន ធ្វើឱ្យអ្នកទិញសប្បាយនិងចាប់អារម្មណ៍ ។ គាត់ថា បីបួនឆ្នាំមកហើយប្រជាពលរដ្ឋ ពេលដែលឃើញគាត់សម្ដែងច្រៀងល្ខោនបាសាក់គេនាំគ្នាអាណិតមកចោមរោមជួយទិញការ៉េមក្នុងមួយថ្ងៃប្រាក់ចំណេញទទួលបានប្រមាណ៣ម៉ឺនរៀល យ៉ាងតិចសម្រាប់ដោះស្រាយជីវភាពចិញ្ចឹមចៅប្រុសស្រី៤នាក់ដែលកំព្រាឪពុកត្រូវគាត់រ៉ាប់រងចិញ្ចឹម ។
លោក លឹម ហៃ បានបញ្ជាក់ថារាល់ថ្ងៃនេះចៅចំនួន៤នាក់ ក្នុងនោះមានពីរនាក់បានចេញទៅប្រកបរបរលក់ដូរនៅរាជធានីភ្នំពេញ នៅសល់ចៅតូចចំនួន២នាក់ កំពុងតែចិញ្ចឹមមើលថែទាំឱ្យពួកគេបានទៅរៀនសូត្រ ។ កូនប្រុសច្បងរបស់គាត់ឈ្មោះលឹម ហឿន សព្វថ្ងៃអាយុ៣៨ ឆ្នាំ ពិការមិនដឹងអ្វីនោះទេត្រូវគាត់រាប់រងចិញ្ចឹមទៀត។
គាត់រៀបរាប់ដំណាលថា មានពេលខ្លះគាត់បានច្រៀងល្ខោនបាសាក់លក់ការ៉េមកីក៏មានប្រជាពលរដ្ឋមួយចំនួន គេបានថតបង្ហោះតាមហ្វេសប៊ុកត្រូវបានគេស៊ែ ពីមួយទៅមួយរហូតដល់រាប់ម៉ឺនអ្នកហើយសំលេងរបស់គាត់ក៏ច្រៀងពីរោះគ្រាន់បើ ។
ក្រោយមកក៏មានទូរទស្សន៍ឯកជនក្នុងស្រុក១ បានហៅគាត់ទៅច្រៀងសម្តែងឲ្យទស្សនិកជនទស្សនាហើយក៏មានអ្នកដែលបានចូលរួមទស្សនាដោយផ្ទាល់បានរៃអង្គាសថវិកាឧបត្ថម្ភមកដល់រូបគាត់បានគ្រាន់បើ រួមផ្សំនឹងប្រាក់ឧបត្ថម្ភរបស់ស្ថានីយទូរទស្សន៍នោះថែមទៀត ដោយបានធ្វើឲ្យគាត់រឹតតែល្បីឈ្មោះបោះសំឡេងរហូតដល់សម្ដេចកិត្តិព្រឹទ្ធបណ្ឌិត ប៊ុន រ៉ានី-ហ៊ុន សែន បានជួយឧបត្ថម្ភថវិកាចំនួន២លានរៀលមកដល់រូបគាត់ ដែលធ្វើឲ្យជីវភាពរបស់គាត់បានធូរស្រាលមួយកម្រិតធំទៀត ។
គាត់មានមោទនភាពថា ឲ្យតែគាត់ជិះកង់ឌុបការ៉េមលក់ឮសំឡេងច្រៀងល្ខោន នៅក្នុងភូមិនិងតាមបណ្ដាភូមិផ្សេងៗទៀត គឺមានប្រជាពលរដ្ឋមកជួយទិញកុះករ ព្រោះបានធ្វើឱ្យសប្បាយរីករាយគ្រប់គ្នា ។ ម្យ៉ាងវិញទៀតរាល់ថ្ងៃនេះកម្លាំងបានចុះខ្សោយ ហើយពេលណាដែលប្រឹងធាក់កង់ដើរលក់ការ៉េមពេលដែលត្រឡប់មកដល់ផ្ទះវិញ ពេលយប់សម្រាន្តមិនលក់ទេ ដោយសារតែរោយជើងពេកហើយត្រូវឈប់សម្រាកពីរបីថ្ងៃទើបចេញទៅលក់ម្ដង ។
គាត់ថា បើសិនជាសម្រាកនៅផ្ទះ យូរពេកដូចជាមិនសូវសប្បាយចិត្ត ហើយបើបានដើរចេញទៅលក់ការ៉េមកីមានអារម្មណ៍ថាសប្បាយរីករាយគ្រប់ពេលវេលា ព្រោះតែបានច្រៀងល្ខោនបាសាក់បំពង់សំឡេង ឲ្យគេស្ដាប់ហើយធ្វើឲ្យទុក្ខកង្វល់នៅក្នុងខ្លួនទាំងប៉ុន្មានក៏ត្រូវរំសាយតាមនោះដែរ យើងច្រៀងក៏សប្បាយ អ្នកទិញក៏សប្បាយ ។ សម្រាប់និស្ស័យវិញ គឺគាត់ស្រឡាញ់ល្ខោនបាសាក់មានពេលខ្លះឲ្យតែល្ខោនលោកតាអូកូឡូញ មកសម្ដែងក្នុងស្រុកព្រៃឈរ គាត់តែងតែដើរទៅមើលនៅកៀកនឹងរោងល្ខោនតែម្ដង ។ គាត់ថា មានវង់ល្ខោននៅក្នុងស្រុកព្រៃឈរ តែគាត់មិនហ៊ានសុំគេចូលរួមសម្ដែងនោះទេចេះតែខ្លាចរអា ។
លោក លឹម ហៃ បានលើកឡើងទៀតថា គាត់មានបងប្អូនបង្កើតសរុបចំនួន៧នាក់ក្នុងនោះប្រុស២នាក់ ស្រី៥នាក់ ហើយគាត់គឺជាកូនបងគេមានឪពុកឈ្មោះមិន ផៃអាយុ៨៨ឆ្នាំ និងម្ដាយឈ្មោះ ស្រ៊ុន គីម អាយុ៨៥ឆ្នាំ នៅភូមិតាម៉ូត ឃុំគរ ស្រុកព្រៃឈរ រាល់ថ្ងៃនេះពួកគាត់នៅមានជីវិតរស់នៅឡើយ ។
សម្រាប់ព្រឹកថ្ងៃទី២៣ វិច្ឆិកា២០១៩ គាត់មិនបានចេញទៅលក់ការ៉េមកី ដោយសារតែជាប់រវល់ទៅបូមទឹកដាក់ស្រែនៅក្រោយភូមិ ព្រោះស្រូវគាត់ប្រឈមនឹងកង្វះទឹកប្រសិនបើមិនបូមទឹកដាក់នោះស្រូវប្រមាណកន្លះហិកតានឹងត្រូវខូចខាតនឹងធ្វើឲ្យជីវភាពរបស់គាត់ជួបនូវការលំបាក ។
គាត់រៀបរាប់ថា របរលក់ការ៉េមកី ក្លែមដោយច្រៀងល្ខោនបាសាក់នេះ សម្រាប់ដោះស្រាយជីវភាពគ្រួសារ គាត់ចង់លក់បន្តឲ្យបានច្រើនឆ្នាំតទៅមុខទៀត ប៉ុន្តែសុខភាពរបស់គាត់ហាក់បីដូចជាមិនអំណោយផល ដូច្នេះគាត់នឹងត្រូវឈប់សម្រាកនៅពេលណាមួយ ។ គាត់សង្ឃឹមថាចៅទាំង៤របស់គាត់ រួមនឹងកូនស្រីអាចនឹងចិញ្ចឹមគាត់រស់ហើយ ដល់ពេលពួកគេធំឡើងប្រហែលជាមិនពិបាកដូចចាស់សម័យគាត់នេះទៀតឡើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ