រាជធានីភ្នំពេញ ៖ ក្នុងឆ្នាំ ២០១៩នេះ វិស័យសំណង់និងអចលនទ្រព្យនៅតែឈានមុខគេនាំមុខវិស័យផ្សេងៗលើការទាក់ទាញទុនវិនិយោគទាំងក្នុងនិងក្រៅស្រុក ជាក់ស្ដែងក្នុងឆ្នាំ ២០១៩នេះ ទុនវិនិយោគដែលកម្ពុជាទទួលបានពីការបណ្ដាក់ទុនរបស់វិនិយោគិនក្នុងនិងក្រៅប្រទេសសរុបមានប្រមាណ៩,៣ពាន់លានដុល្លារអាមេរិក កើនឡើងដល់ជាង៧៨ភាគរយធៀបនឹងរយៈពេលដូចគ្នានៃឆ្នាំ ២០១៨…
រាជធានីភ្នំពេញ ៖ ក្នុងឆ្នាំ ២០១៩នេះ វិស័យសំណង់និងអចលនទ្រព្យនៅតែឈានមុខគេនាំមុខវិស័យផ្សេងៗលើការទាក់ទាញទុនវិនិយោគទាំងក្នុងនិងក្រៅស្រុក ជាក់ស្ដែងក្នុងឆ្នាំ ២០១៩នេះ ទុនវិនិយោគដែលកម្ពុជាទទួលបានពីការបណ្ដាក់ទុនរបស់វិនិយោគិនក្នុងនិងក្រៅប្រទេសសរុបមានប្រមាណ៩,៣ពាន់លានដុល្លារអាមេរិក កើនឡើងដល់ជាង៧៨ភាគរយធៀបនឹងរយៈពេលដូចគ្នានៃឆ្នាំ ២០១៨ ។
លោកជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់បានអោយដឹងថា ក្នុងរយៈពេលប៉ុន្មានទសវត្សរ៍កន្លងមកនេះ វិស័យសំណង់បានទាញយកទុនវិនិយោគពីក្នុងនិងក្រៅប្រទេសជាច្រើន និងកំពុងមានការអភិវឌ្ឍទាំងនៅរាជធានីភ្នំពេញ និងតាមបណ្ដាខេត្ត ។
ក្នុងឆ្នាំ ២០១៩នេះ តាមការកត់ត្រាតួលេខវិស័យសំណង់ទទួលបានទុនប្រមាណជាង៩៣០០លានដុល្លារអាមេរិក ហើយបើធៀបនឹងឆ្នាំ ២០១៨កន្លងទៅនេះ មានកំណើនដល់ជាង៧៨ភាគរយឯណោះ ។
លោកជា សុផារ៉ា បានបញ្ជាក់ថា «តួលេខនេះ គឺធំណាស់សម្រាប់កម្ពុជា ដោយទុនមួយចំនួនធំគឺបានមកពីការវិនិយោគក្នុងវិស័យសំណង់ក្នុងខេត្តព្រះសីហនុ ជាពិសេសគឺទុនមានប្រភពមកពីប្រទេសចិន ដែលបានវិនិយោគយ៉ាងច្រើនក្នុងខេត្តព្រះសីហនុ ។ ក្រៅពីប្រភពទុនមកពីប្រទេសចិន ក្នុងវិស័យសំណង់កម្ពុជានេះដែរ ក៏ទទួលបានពីប្រទេសផ្សេងៗទៀត ដូចជាសិង្ហបុរីនិងបណ្ដាប្រទេសក្នុងតំបន់ជាច្រើនទៀត» ។
លោកបានបន្តថា ដើម្បីសម្រួលដល់ការវិនិយោគរបស់ក្រុមហ៊ុនសំណង់នានា នៅកម្ពុជា ក្រសួងដែនដី នឹងពង្រឹងនិងពន្លឿនរាល់ដំណើរការរបស់ក្រុមហ៊ុនដែលបានស្នើសុំមកកាន់ក្រសួង ធ្វើយ៉ាងណាអោយអ្នកអភិវឌ្ឍន៍ មានភាពងាយស្រួលកុំអោយមានភាពយឺតយ៉ាវផងដែរ តែអ្វីដែលក្រុមហ៊ុនសាងសង់ត្រូវធ្វើជាមួយរាជរដ្ឋាភិបាលនោះ គឺក្រុមហ៊ុនត្រូវមានច្បាប់សាងសង់ មុននឹងចាប់ផ្ដើមការសាងសង់សំណង់របស់ខ្លួន ។ ការធ្វើបែបនេះ គឺដើម្បីអោយមានតម្លាភាពទាំងអស់គ្នា ការពារដល់សុវត្ថិភាពដល់អ្នកសាងសង់ និងអ្នកស្នាក់អាស្រ័យក្នុងសំណង់នោះពេលសាងសង់រួចរាល់ ។
លោកឧបនាយករដ្ឋមន្ត្រីរូបនេះ បានបន្ថែមថា កំណើនការវិនិយោគ ក្នុងវិស័យសំណង់នេះដែរ បានផ្ដល់ផលប្រយោជន៍ជាច្រើនដល់ប្រទេសកម្ពុជា រួមមានការកាត់បន្ថយលំហូរពលកម្មចេញទៅក្រៅប្រទេស ផ្ដល់ប្រាក់ចំណូលដល់ប្រជាពលរដ្ឋក្នុងស្រុកតាមការផ្ដល់ឱកាសការងារដល់យុវជន និងអ្នកមានសមត្ថភាព ជាពិសេសគឺការទទួលបានជំនាញថ្មីៗពីវិស័យសំណង់ដើម្បីអភិវឌ្ឍន៍ប្រទេសជាតិផងដែរ ។
លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានមានប្រសាសន៍ផងដែរថា បច្ចុប្បន្ន វិស័យសំណង់ គឺជាវិស័យមួយដែលលេចធ្លោ និងមានភាពរីកចម្រើនគួរអោយកត់សម្គាល់ ក្នុងចំណោមវិស័យ៤ធំៗទៀត មានវិស័យកសិកម្ម វាយនភ័ណ្ឌ ទេសចរណ៍ និងហិរញ្ញវត្ថុ ដែលបានជួយគាំទ្រដល់សេដ្ឋកិច្ចជាតិកម្ពុជា ។ ជាមួយគ្នានេះដែរអត្រាកំណើនសេដ្ឋកិច្ចនៅកម្ពុជា និងប្រាក់ចំណូលប្រចាំឆ្នាំរបស់ប្រជាជនតែងតែមានការកើនឡើងគួរអោយកត់សម្គាល់ជារៀងរាល់ឆ្នាំ ជាក់ស្ដែងក្នុងឆ្នាំ ២០១៨ កម្ពុជាសម្រេចបានកំណើនសេដ្ឋកិច្ច៧,៥ភាគរយ និងប្រាក់ចំណូលប្រចាំឆ្នាំរបស់ប្រជាជនក្នុងមួយនាក់មានចំនួន ១៥៦៣ដុល្លារអាមេរិក។
លោកឧកញ៉ាបានបន្តថា «ដោយកំណើនប្រាក់ចំណូលនិងការរស់នៅកាន់តែស៊ីវិល័យ ធ្វើអោយតម្រូវការលំនៅឋាននៅកម្ពុជាក្នុងមួយឆ្នាំៗមានប្រមាណ៥ម៉ឺនខ្នង ដែលធ្វើអោយការផ្គត់ផ្គង់នាពេលបច្ចុប្បន្ននេះ មិនទាន់ឆ្លើយតបនឹងតម្រូវការជាក់ស្ដែងនៅឡើយ»។ លោកឧកញ៉ាបានបន្តថា បច្ចុប្បន្ននេះ ការផ្គត់ផ្គង់ភាគច្រើនផ្ដោតលើបុរី អគារខុដូ និងអគារមជ្ឈមណ្ឌលពាណិជ្ជកម្មទំនើបជាដើម ។
តែយ៉ាងណាក៏ដោយ អ្នកអភិវឌ្ឍន៍លំនៅឋាននៅកម្ពុជាមួយចំនួនក៏បានងាកមកអភិវឌ្ឍន៍លំនៅឋានដែលមានតម្លៃសមរម្យសម្រាប់ផ្គត់ផ្គង់ដល់ប្រជាពលរដ្ឋដែលមានប្រាក់ចំណូលទាបនិងមធ្យមផងដែរ ដើម្បីគាំទ្រដល់រាជរដ្ឋាភិបាលក្នុងការដោះស្រាយបញ្ហាលំនៅឋានរបស់ពលរដ្ឋ ៕ (កែសម្រួលដោយ ៖ បុប្ផា)
ចែករំលែកព័តមាននេះ