រាជធានីភ្នំពេញ ៖ ជប៉ុនបានចាប់អារម្មណ៍ និងសរសើរពីគុណភាពសូត្រខ្មែរថា មានគុណភាពល្អតែថា មិនទាន់អនុវត្តបានពេញលេញហើយខុសពីសូត្រជប៉ុន ។ លោក TAMURA Tsutomu នាយកចាត់ការទូទៅក្រុមហ៊ុន NIPPON KOEI របស់ជប៉ុនបានសម្ដែងការចាប់អារម្មណ៍លើផលិតកម្មសូត្រកម្ពុជាថា ជាផលិតផលមានគុណភាពល្អដែលមិនត្រឹមតែសម្រាប់ផលិតសូត្រដូចអ្វីដែលប្រជាពលរដ្ឋខ្មែរនិយមប្រើប្រាស់តាមបែបប្រពៃណីតាំងពីបុរាណកាលតរៀងមកនោះទេ ប៉ុន្តែជាផលិតកម្មសូត្រ និងដង្កូវនាង បើសម្រាប់ជនជាតិជប៉ុនគេយកវាទៅធ្វើជាគ្រឿងសំអាង ឬឱសថសម្រាប់រក្សាសម្ផស្សស្ត្រីឲ្យនៅក្មេងជាងវ័យ ។
ក្នុងជំនួបជាមួយលោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ នៅថ្ងៃទី៦ ខែធ្នូនេះ លោក TAMURA Tsutomu បានបញ្ជាក់យ៉ាងដូច្នេះថា «ក្រុមហ៊ុនរបស់ខ្ញុំមានចំណាប់អារម្មណ៍លើផលិតកម្មសូត្រកម្ពុជាដោយយល់ឃើញថា វាមានគុណភាពល្អ មិនត្រឹមតែសម្រាប់ផលិតសូត្រដូចអ្វីដែលប្រជាពលរដ្ឋខ្មែរនិយាមប្រើប្រាស់តាមបែបប្រពៃណីតាំងពីបុរាណកាលតរៀងមក ប៉ុន្តែផលិតកម្មសូត្រ និងដង្កូវនាងនេះសម្រាប់ជនជាតិជប៉ុនគេយកវាធ្វើជាគ្រឿងសំអាង ឬឱសថសម្រាប់រក្សាសម្ផស្សស្ត្រីឲ្យនៅក្មេងជាងវ័យ (anti-aging)» ។
លោកបន្តថា សម្រាប់ផលតិកម្មសូត្រនេះកម្ពុជាមានសក្តានុពលខ្លាំង ប៉ុន្តែគ្រាន់ថា ផលិតកម្មនេះនៅមិនទាន់បានអនុវត្តឲ្យបានពេញលេញ និងត្រឹមត្រូវលើខ្សែច្រវាក់ផលិតកម្ម និងទីផ្សារដែលជាដើមហេតុចម្បងធ្វើឲ្យផលិតកម្មនេះមានការធ្លាក់ចុះ និងបាត់បង់តម្លៃបន្ថែមផងដែរ ។ ក្នុងជំនួបនោះលោកវេង សាខុន រដ្ឋមន្ត្រីក្រដួងកសិកម្មបានឯកភាពលើមូលបញ្ហាទាំងអស់ ដែលភាគីជប៉ុនបានលើកឡើង និងគាំទ្រចំពោះគម្រោងនេះ ។
លោករដ្ឋមន្ត្រីបានស្នើឲ្យក្រុមហ៊ុនជប៉ុនធ្វើការសិក្សាជាបឋមអំពីមូលបញ្ហាសំខាន់ៗដែលធ្វើឲ្យផលិតកម្មសរសៃសូត្រខ្មែរ និងផលិតកម្មចិញ្ចឹមដង្កូវនាងមានការធ្លាក់ចុះឲ្យបានច្បាស់លាស់ បន្ទាប់មកត្រូវដាក់ចេញនូវយន្តការដោះស្រាយសមស្របទាន់ពេល និងមានប្រសិទ្ធភាព ដើម្បីលើកស្ទួយ ពង្រឹង និងពង្រីកផលិតកម្មនេះឲ្យមានលក្ខណប្រទាក់ក្រឡាគ្នាចាប់តាំងពីចំណុចចាប់ផ្តើមដល់ផលិតផលសម្រេច និងទីផ្សារ (A to Z) ដោយត្រូវបញ្ចូលបច្ចេកវិទ្យាថ្មីៗទៅក្នុងច្រវ៉ាក់ផលិតកម្មប្រកបដោយប្រសិទ្ធភាពខ្ពស់ និងមានការប្រកួតប្រជែង រួមទាំងការធ្វើទំនើបកម្មទុនផលិត និងការបណ្តុះបណ្តាលធ្វើយ៉ាងណាបង្កើនបរិមាណផលិត និងធានាគុណភាពខ្ពស់ ។
លោករដ្ឋមន្ត្រីបានសង្កត់ធ្ងន់ថា បើផលិតកម្មកើនគុណភាពត្រូវបានធានាទីផ្សារគាំទ្រនោះទើបកម្ពុជាអាចឈានទៅសម្រេចបានតាមផែនការដែលបានកំណត់ ។ លោកបញ្ជាក់ថា៖« ហេតុនេះ ដើម្បីឲ្យគម្រោងរបស់ក្រុមហ៊ុនលោក TAMURA Tsutomu សម្រេចបានជោគជ័យ ក្រសួងនឹងរង់ចាំផ្តល់កិច្ចសហការហើយក្រុមហ៊ុនត្រូវសហការជាមួយអគ្គនាយកដ្ឋានកសិកម្ម ដើម្បីសិក្សា និងរៀបចំគម្រោងនេះឲ្យបានសុក្រឹត្យធ្វើយ៉ាងណាឲ្យការអនុវត្តប្រព្រឹត្តទៅដោយរលូនផងដែរ» ៕
ចែករំលែកព័តមាននេះ